༄༅།།ཧོ་པེས་མཐུན་སྦྱོར་དང་གསར་གཏོད་མ་ལག་འཐུས་སྒོ་ ཚང་དུ་གཏོང་བར་ཤུགས་སྣོན་བརྒྱབ་པ།

   འདི་ག་ཚགས་པར་གྱི་གསར་འགོད་པ། དབན་ཞིའུ་པིན། ཧྲི་ཙེ་ཆང་།
    ཧོ་པེ་ཅིང་ཁྲེ་ནི་ཅིང་ཅིན་ཅི་གསུམ་མཐུན་སྦྱོར་དང་འཕེལ་རྒྱས་ཁྲོད་ཀྱི་གསར་གཏོད་རྣམ་གྲངས་ཤིག་རེད། པེ་ཅིང་དང་ཧོ་པེ་ས་ཁུལ་གཉིས་མཉམ་ལས་བྱས་ཏེ་པེ་ཅིང་གྲོང་ཁྱེར་རྨང་གཞིའི་སྒྲིག་བཀོད་མ་འཇོག་ཚད་ཡོད་ཀུང་སིས་པའོ་ཏིང་དུ་ཧོ་པེ་ཅིང་ཁྲེ་བཙུགས་ནས“པེ་ཅིང་གིས་ཞིབ་སྤེལ+ཧོ་པེས་བཟོ་སྐྲུན”གྱི་བྱེད་ཐབས་སྤྱད་དེ། པེ་ཅིང་མ་འཇོག་སྒྲིག་ཆས་ལག་རྩལ་ཞིབ་འཇུག་ཁང་དེ་ཞིབ་སྤེལ་ལས་སྟེགས་དང་ཧོ་པེ་ཅིང་ཁྲེ་དེ་ཞིབ་སྤེལ་གྲུབ་འབྲས་གཞན་སྒྱུར་གྱི་ཐོན་སྐྱེད་རྟེན་གཞིར་བྱས་ཡོད། ཧོ་པེ་ཅིང་ཁྲེས་རིམ་རྩིས་བརྒྱབ་ན་རླངས་འཁོར་གསར་པ་དབྱིབས་མི་འདྲ་བ་17ཐོན་སྐྱེད་བྱས་ནས་2023ལོར་ཐོན་རྫས་རིན་ཐང་སྒོར་དུང་ཕྱུར་13.5ཟིན་ཡོད།
    སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་2023ལོའི་ཟླ་5པར་ཅིང་ཅིན་ཅི་མཐུན་སྦྱོར་འཕེལ་རྒྱས་ལ་སྐུལ་འདེད་གཏིང་ཟབ་གཏོང་བའི་བཞུགས་མོལ་ཚོགས་འདུ་གཙོ་སྐྱོང་གནང་སྐབས“རྒྱལ་ཡོངས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྣེ་ཁྲིད་ཀྱི་སྒུལ་ཤུགས་འབྱུང་ཁུངས་གལ་ཆེན་གསུམ་གྱི་གྲས་ཤིག་ཡིན་པའི་ཅིང་ཅིན་ཅི་ལ། སློབ་གླིང་རྩེ་གྲ་དང་ཞིབ་འཇུག་ཤེས་ལྡན་པ་རྩེར་སོན་མང་པོ་ཡོད་པ་མ་ཟད། གསར་གཏོད་ཀྱི་རྨང་གཞི་བརྟན་པ་དང་སྟོབས་ཤུགས་ཆེན་པོ་ཡོད་པས་མཐུན་སྦྱོར་གསར་གཏོད་དང་ཐོན་ལས་མཉམ་ལས་ལ་ཤུགས་སྣོན་བརྒྱབ་སྟེ་ཆུ་ཚད་མཐོ་བའི་ཚན་རྩལ་རང་ཚུགས་རང་དར་མངོན་འགྱུར་བྱེད་པའི་ཁྲོད་དཔེ་སྟོན་སྣེ་ཁྲིད་ཀྱི་ནུས་པ་འདོན་དགོས”ཞེས་གསུངས་ཡོད།
    སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱས་ཏེ་ཧོ་པེས་མཐུན་སྦྱོར་གསར་གཏོད་ཀྱི་མ་ལག་འཐུས་སྒོ་ཚང་དུ་གཏོང་བར་ཤུགས་སྣོན་རྒྱག་པ་དང་། ཐོན་སློབ་ཞིབ་གསུམ་གྱི་མཉམ་ལས་བྱེད་ཐབས་གསར་པ་གཏོད་པ། ཚན་རྩལ་གྲུབ་འབྲས་ཁྱབ་ཁོངས་ནང་ཁུལ་གྱི་ཕྱོགས་སྒྱུར་ལས་ཕྱོད་དང་བསྡུར་ཚད་རྒྱུན་ཆད་མེད་པར་མཐོ་རུ་གཏོང་བ་བཅས་བྱས་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་ཡོད།
   ཐབས་ལམ་ཤར་བགྲོད་བྱས་ནས“པེ་ཅིང་དང་ཐེན་ཅིན་གྱི་ཞིབ་འཇུག་གསར་སྤེལ་དང་ཧོ་པེའི་ཕྱོགས་སྒྱུར”ལ་མགྱོགས་མྱུར་སྐུལ་འདེད་བཏང་བ།
   ཧོ་པེས་པེ་ཅིང་དང་ཐེན་ཅིན་གྱི་མཐོ་སློབ་དང་ཚན་རིག་ཞིབ་འཇུག་ཁང་དང་སུའོ་དང་འབྲེལ་མཐུད་མཉམ་ལས་ལ་ཤུགས་སྣོན་བརྒྱབ་ནས་ལག་རྩལ་གཞན་སྒྱུར་ལས་སྟེགས་དང་འབྲིང་རིམ་ཚོད་ལྟའི་རྟེན་གཞི་བསྐྲུན་ཏེ་པེ་ཅིང་དང་ཐེན་ཅིན་གྱི་གསར་གཏོད་ཐོན་ཁུངས་དང་ཚན་རྩལ་གྲུབ་འབྲས་ཧོ་པེར་སྐྱོང་གསོ་དང་གཞན་སྒྱུར་བྱས་ཡོད། ཧོ་པེ་དང་ཅིང་ནན་རྒྱལ་ཁབ་ཚན་རྩལ་གྲུབ་འབྲས་གཞན་སྒྱུར་དཔེ་སྟོན་ཁུལ་བསྐྲུན་པར་སྐུལ་འདེད་ཧུར་ཐག་བཏང་ནས་སྲིད་ཇུས་སྔོན་ལ་ལག་བསྟར་དང་ཚོད་ལྟ་བྱེད་པར་སྐུལ་འདེད་བཏང་ཡོད། ཞིང་ཆེན་རིམ་པ་ཡན་གྱི་ལག་རྩལ་གཞན་སྒྱུར་ཞབས་ཞུའི་སྒྲིག་གཞི་ཁག་168བསྐྲུན་ཡོད།
   2023ལོར་ཧོ་པེས་པེ་ཅིང་དང་ཐེན་ཅིན་གྱི་ལག་རྩལ་གན་འཇོག་དངུལ་འབོར་སྒོར་དུང་ཕྱུར་810བསྡུ་ལེན་བྱས་པ་དེ་2014ལོའི་ལྡབ་12ཡིན་པ་རེད། པེ་ཅིང་དང་ཐེན་ཅིན་གྱི་ཁེ་བེད་བདག་ཐོབ་ལག་རྩལ་ཧོ་པེ་རུ་ཐེངས་1339གཞན་སྒྱུར་བྱས་ནས་དུས་མཚུངས་ལས་74.74%འཕར་ཡོད།
    པེ་ཅིང་དང་ཐེན་ཅིན་ལག་གདང་སྦྲེལ་ནས་ཐུན་མོང་རང་བཞིན་གྱི་ལག་རྩལ་དཀའ་གནད་འགག་སྒྲོལ་བྱས་པ།
   ཁེ་ལས་ཀྱི་དགོས་མཁོ་དངོས་དང་བསྟུན་ནས་ཧོ་པེས་པེ་ཅིང་དང་ཐེན་ཅིན་སོགས་ས་ཁུལ་གྱི་ཚན་ཞིབ་ཐོན་ཁུངས་ནང་འདྲེན་བྱས་པ་མ་ཟད། ཞིང་ཆེན་ནང་ཁུལ་གྱི་ཐོན་ལས་ལག་རྩལ་ཞིབ་འཇུག་ཁང་11དང་ཐོན་སློབ་ཞིབ་གསུམ་གྱི་མཉམ་ལས་བྱེད་ཐབས་གསར་པ་བསྐྲུན་ནས་འགག་རྩའི་ཐུན་མོང་རང་བཞིན་གྱི་ལག་རྩལ་དཀའ་གནད་ཁག་30ལྷག་ཙམ་འགག་སྒྲོལ་བྱས་ཡོད།
   ཤིང་ཐའེ་གྲོང་ཁྱེར་ལིན་ཤིས་རྫོང་དུ་གནས་པའི་ཧོ་པེ་ཞིང་ཆེན་འཁོར་རྟེན་ཐོན་ལས་ལག་རྩལ་ཞིབ་འཇུག་ཁང་གི་ཞིབ་འཇུག་གསར་སྤེལ་རྟེན་གཞིའི་ཚོད་ལྟའི་འཁོར་ཁང་དུ་སྐྱོད་སྐབས“བཟོ་ལས་འཕྲུལ་མིའི་མྱུར་ཚད་དལ་གཏོང་ཡོ་བྱད”ཞིབ་འཇུག་གསར་སྤེལ་གྱི་ཞིབ་འཇུག་བྱ་གཞི་ཚོགས་ཆུང་གི་ལག་རྩལ་མི་སྣ་ཁག་གཅིག་གིས་ཐོན་རྫས་གསར་པའི་འཁོར་རྟེན་ཞིབ་ཚགས་ཚད་ལེགས་སུ་གཏོང་བཞིན་ཡོད་པ་རེད།
   ལིན་ཤིས་རྫོང་གི་འཁོར་རྟེན་ཐོན་ལས་ལ་ལོ་50ཙམ་གྱི་ལོ་རྒྱུས་ཡོད་མོད། འོན་ཀྱང་བཟོ་ལས་འཕྲུལ་མིའི་མྱུར་ཚད་དལ་གཏོང་ཡོ་བྱད་ཀྱི་འཁོར་རྟེན་ཐོན་སྐྱེད་འགོ་ཚུགས་འགོར་བར་བརྟེན་འཕེལ་རྒྱས་འགྲོ་འགོར་པོ་ཡོད། གནད་དོན་དེ་ཇི་ལྟར་ཐག་གཅོད་བྱེད་དགོས་སམ། ཧོ་པེ་ཚན་རྩལ་སྡེ་ཚན་གྱིས་པེ་ཅིང་མཁའ་འགྲུལ་འཇིག་རྟེན་འཕུར་སྐྱོད་སློབ་ཆེན་གྱི་ཚན་ཞིབ་ཚོགས་པ་གདན་དྲངས་ནས་ཧོ་པེ་ཞིང་ཆེན་འཁོར་རྟེན་ཐོན་ལས་ལག་རྩལ་ཞིབ་འཇུག་ཁང་དང་མཉམ་དུ་དཀའ་གནད་འགག་སྒྲོལ་བྱས་ཡོད། 2023ལོར་ཕྱོགས་གཉིས་པོས་བཟོ་ལས་འཕྲུལ་མིའི་སོ་སྒྲོམ་གྱི་མྱུར་ཚད་དལ་གཏོང་ཡོ་བྱད་ཀྱི་ཆེད་སྤྱོད་འཁོར་རྟེན་མཉམ་དུ་ཞིབ་བཟོ་བྱས་ཡོད།
    གསར་གཏོད་མཉམ་འགུལ་ལ་བརྟེན་ནས་ཐོན་ལས་མཉམ་ལས་ཟམ་མི་ཆད་པར་ཟབ་ཏུ་བཏང་བ།
    སྐྱེ་དངོས་སྨན་རྫས་ནི་ཧོ་པེས་གཙོ་གནད་དུ་འཕེལ་རྒྱས་གཏོང་བའི་ཐོན་ལས་ཀྱི་གྲས་ཤིག་ཡིན། ཉེ་བའི་ལོ་ཤས་རིང་། ཅིང་ཅིན་ཅི་གསུམ་གྱིས་མཉམ་དུ་ཁག་དང་པོའི་གཙོ་གནད་ཐོན་ལས་འཁོར་འབྲེལ་གྱི་བསྟར་བསྒྲིགས་རི་མོ་6འཆར་འགོད་བྱས་པར་སྐྱེ་དངོས་སྨན་རྫས་དང་། ཆིང་ནུས། དྲ་རྒྱའི་བདེ་འཇགས་དང་བཟོ་ལས་དྲ་སྦྲེལ། རྩེར་སོན་བཟོ་ལས་འཕྲུལ་ཆས་ཨ་མ། ནུས་རྒྱུ་གཙང་མ་དང་རིག་ནུས་དྲ་སྦྲེལ་རླངས་འཁོར། འཕྲུལ་མི་བཅས་ཚུད་ཡོད།
    ས་ཁོངས་གསར་གཏོད་འཁོར་འབྲེལ་དང་། ཐོན་ལས་འཁོར་འབྲེལ། མཁོ་སྤྲོད་འཁོར་འབྲེལ་བཅས་མཉམ་འདྲེས་གཏིང་ཟབ་ལ་སྐུལ་འདེད་གཏོང་ཆེད། ཧོ་པེ་ཞིང་ཆེན་གྱིས་འཕྲུལ་མིའི་ཐོན་ལས་མནའ་འབྲེལ་འཛུགས་པར་སྐུལ་འདེད་བཏང་བ་དང་ཁོངས་མིའི་ཚན་པའི་ནང་ཀྲུང་ཀོན་ཚུན་གྱི་འཕྲུལ་མིའི་ཐོན་ལས་གསར་གཏོད་འཕེལ་རྒྱས་ཚད་ཡོད་ཀུང་སི་དང་ཐང་ཧྲན་པའེ་ཁྲོན་རིག་ནུས་འཕྲུལ་ཆས་མ་རྐང་ཚད་ཡོད་ཀུང་སི་སོགས་ཡོད། 2023ལོར་ཧོ་པེར་འཕྲུལ་མིའི་ཁེ་ལས་235ཡོད་པ་དང་ལས་སྒོ་གཙོ་བོའི་ཡོང་འབབ་སྒོར་དུང་ཕྱུར་102.9ཟིན་ནས་དུས་མཚུངས་ལས་57.1%འཕར་ཡོད།
   གསར་གཏོད་མཉམ་འགུལ་བྱས་པར་བརྟེན་ཧོ་པེ་ལྕགས་དང་ངར་ལྕགས་སོགས་སྲོལ་རྒྱུན་ཐོན་ལས་རྩེར་སོན་ཅན་དང་། རིག་ནུས་ཅན། ལྗང་མདོག་ཅན་བཅས་རིམ་སྤོར་སྒྱུར་བཀོད་ཀྱི་གོམ་སྟབས་མགྱོགས་སུ་ཕྱིན་པ་མ་ཟད། སྐྱེ་དངོས་སྨན་རྫས་དང་། གློག་རྡུལ་ཆ་འཕྲིན། ནུས་རྒྱུ་གསར་པའི་རླངས་འཁོར་སོགས་གསར་དར་ཐོན་ལས་མགྱོགས་མྱུར་འཕེལ་རྒྱས་ཕྱིན་ཡོད། 2024ལོའི་དུས་ཚིགས་དང་པོར་ཧོ་པེ་ཞིང་ཆེན་གྱི་གཞི་ཁྱོན་ཡན་གྱི་བཟོ་ལས་འཐབ་ཇུས་རང་བཞིན་གྱི་གསར་དར་ཐོན་ལས་ཀྱི་འཕར་ཐང་དུས་མཚུངས་ལས་9.3%འཕར་བ་དང་གཞི་ཁྱོན་ཡན་གྱི་མཐོ་གསར་ལག་རྩལ་ཐོན་ལས་ཀྱི་འཕར་ཐང་དུས་མཚུངས་ལས་13%འཕར་ཡོད།