༄༅།།མཐུན་རྐྱེན་བཟང་པོ་བསྐྲུན། བློ་གྲོས་གཅིག་ཏུ་བསྡུས།

     ཤིན་ཧྭ་གསར་འགྱུར་ཁང་གི་གསར་འགོད་པ། པའེ་ཧྲའོ་པོ།
     ཉེ་ཆར། གསར་འགོད་པར་བོད་རང་སྐྱོང་ལྗོངས་ཚན་རིག་ལག་རྩལ་ཐིང་ནས་ཤེས་རྟོགས་བྱུང་བར། མིག་སྔའི་བར་བོད་ཀྱིས“གཉིས་གཏོད”གཞི་རྟེན་ཁག་138བསྐྲུན་པ་ཕུགས་བསམ་ལྡན་པའི་གཞོན་ནུར་ཕུགས་འདུན་དོན་གཉེར་བྱེད་པའི་ལས་སྟེགས་སུ་གྱུར་ཡོད།
     ལོ་25ལ་སླེབས་པའི་པ་སངས་དོན་གྲུབ་སློབ་ཆེན་ཐོན་རྗེས་སློབ་གྲྭ་ཆེ་མོ་བའི་ལས་གཏོད་དཔུང་ཁག་ཆེ་མོར་ཞུཌ་པ་དང་། ཕ་ཡུལ་གྱི་ཕུན་སུམ་ཚོགས་པའི་ཡུལ་སྐོར་ཐོན་ཁུངས་ལས་ཁོང་ལ་བསམ་བཀོད་ཅིག་རྙེད་པ་སྟེ། “ཇ་ཁང་ཞིག་བཙུགས་ཏེ་རྒྱལ་ཡོངས་ས་གནས་ཁག་ནས་ཡོང་བའི་ཡུལ་སྐོར་བས་ཕོ་བྲང་པོ་ཏ་ལར་རྒྱང་ལྟ་བྱེད་ཞོར་དུ། ཇ་བཏུངས་ནས་བོད་ཀྱི་ཞི་བདེ་བག་ཕེབས་ཀྱི་འཚོ་བར་མྱོང་རོལ་བྱ་རྒྱུ་དེ་རེད”
     ལྷ་ས་སྐྱིད་ཆུའི་ལྷོ་ངོས་སུ་གནས་པའི་བོད་ལྗོངས་རིག་གནས་ཡུལ་སྐོར་བསམ་བཀོད་གླིང་གི་ལས་གཏོད་གསར་གཏོད་རྟེན་གཞི་དེ་ཕོ་བྲང་པོ་ཏ་ལ་དང་གཙང་པོ་གཅིག་གིས་ཆོད་ཅིང་། འདི་ནི་པ་སངས་དོན་གྲུབ་དང་རོགས་ཟླ་ཚོའི་ཕུགས་འདུན་དོན་གཉེར་བྱེད་ས་རེད། པ་སངས་དོན་གྲུབ་ཀྱིས། རྟེན་གཞིས་ཁོང་ཚོར་སྤུས་རྟགས་དྲིལ་བསྒྲགས་དང་རིན་མེད་འགྲེམས་ཚོང་བྱེད་རོགས་བྱས་པ་མ་ཟད། ད་དུང་བཅའ་སྡོད་ཁེ་ལས་ལ་གསོ་སྦྱོང་དང་སློབ་སྦྱོང་བྱེད་པའི་གོ་སྐབས་ཀྱང་མཁོ་འདོན་བྱས་བྱུང་ཞེས་བཤད། ཇ་ཁང་སྒོ་ཕྱེ་མ་ཐག་གྲོང་མི་དང་ཡུལ་སྐོར་བ་མང་པོ་ཞིག་དེ་གར་ཡོང་རྒྱུའི་ཡིད་དབང་བཀུག་ཡོད་པ་རེད།
     ལོ་27ལ་སླེབས་པའི་བསྟན་འཛིན་སྐལ་བཟང་བོད་ལྗོངས་ཉིང་ཁྲི་ནས་ཡིན་པ་དང་། དེ་གར་ནགས་ཚལ་སྟུག་ལ་ཐོན་ཁུངས་ཕུན་སུམ་ཚོགས་པོ་ཡོད་པས“བོད་ཀྱི་སྔོ་ལྗང་མཛེས་ལྗོངས་ཁུལ”ཞེས་བརྗོད་ཀྱི་ཡོད། ཁོང་གིས་ཀླུ་ནང་གཉིས་གཏོད་ཐོན་ལས་གླིང་དུ་ཡུལ་ཐོན་ཁྱད་རྫས་བྲིན་ཚོང་གཙོ་བོར་བྱེད་པའི་ཁེ་ལས་ཤིག་བཙུགས་ནས་ས་གནས་དེ་གའི་ཞིང་འབྲོག་པ་འབབ་འཕར་ཕྱུག་འགྱུར་ཡོང་བར་སྐུལ་ཁྲིད་བྱས་ཡོད། “རང་ཉིད་ལ་སྤྱི་ཚོགས་ཀྱི་ཉམས་མྱོང་མི་འདང་བས་དང་ཐོག་ལས་གཏོད་བྱེད་སྐབས་ལམ་ལྷོངས་མ་བྱུང་། ཐོན་ལས་གླིང་གི་ལས་གཏོད་དགེ་རྒན་གྱི་མཛུབ་ཁྲིད་འོག་ད་ཆ་ཁེ་ལས་ཀྱི་ཚོང་རིམ་གྱིས་ཡག་ཏུ་ཕྱིན་ནས་ལོ་རེའི་ལས་གཉེར་ཡོང་འབབ་སྒོར་ཁྲི་180ལྷག་ཙམ་ཟིན་གྱི་འདུག”ཅེས་བཤད།
     ཉེ་བའི་ལོ་ཤས་རིང་བོད་རང་སྐྱོང་ལྗོངས་ཀྱིས་གསར་གཏོད་ལས་གཏོད་ཀྱི་ལས་དོན་ལ་ཚད་མཐོའི་མཐོང་ཆེན་བྱས་པས“གཉིས་གཏོད”ཀྱི་གཞི་རྟེན་འཛུགས་སྐྱོང་ཐད་འཕེལ་རྒྱས་མྱུར་པོ་བྱུང་ནས། ལས་གཏོད་བྱེད་མཁན་ལ་ལས་དར་དང་ཕུགས་འདུན་དོན་གཉེར་བྱེད་རོགས་བྱས་ཡོད། བོད་རང་སྐྱོང་ལྗོངས་ཚན་རིག་ལག་རྩལ་ཐིང་ཚན་རྩལ་ལས་གཏོད་ཞབས་ཞུ་ལྟེ་གནས་ཀྱི་ཀྲུའུ་རེན་པའོ་ཧན་ཝུན་གྱིས་ངོ་སྤྲོད་བྱས་པར་གཞིགས་ན། མིག་སྔའི་བར་རང་སྐྱོང་ལྗོངས་ཀྱིས་རིམ་རྩིས་བྱས་ན་མ་དངུལ་སྒོར་དུང་ཕྱུར་1.57བཏང་ནས་རིགས་ཁག་གི“གཉིས་གཏོད”གཞི་རྟེན་138བསྐྲུན་ཡོད་པ་རེད། དེའི་ནང་རྒྱལ་ཁབ་རིམ་པའི“གཉིས་གཏོད”གཞི་རྟེན་22དང་རང་སྐྱོང་ལྗོངས་རིམ་པའི“གཉིས་གཏོད”གཞི་རྟེན་38ཡོད་པ་རེད།