༄༅།།བོད་ལྗོངས་སྐྱིད་གྲོང་འདམ་རུད་ཁྲོད་མི་21རྐྱེན་ལམ་ལ་ཤོར་བ་དང་དངོས་པོ་847རྙེད་འདུག 

     ཟླ་9ཚེས་2ཉིན། བོད་ལྗོངས་སྐྱིད་གྲོང་གི“8·26”འདམ་རྡོའི་ཆུ་རུད་ཀྱི་གནོད་འཚེའི་གསར་འགྱུར་ཡོངས་བསྒྲགས་ཚོགས་འདུ་འཚོགས།

    གསར་འགོད་པས་ཡོངས་བསྒྲགས་ཚོགས་འདུ་ནས་ཤེས་རྟོགས་བྱུང་དོན། ཟླ་9ཚེས་2ཉིན་གྱི་ཆུ་ཚོད་12པའི་བར། གནོད་འཚེའི་ཁྲོད་མི་21རྐྱེན་ལམ་དུ་ཤོར་བ་དང་མི་541དང་འབྲེལ་བ་ཆད་ཅིང་། ཤུལ་ལུས་དངོས་པོ་847རྙེད་འདུག

མིག་སྔའི་བར། རོགས་སྐྱོབ་ལས་དོན་ཐད་རིམ་རྩིས་བྱས་ན། རོགས་སྐྱོབ་སྟོབས་ཤུགས་མི་གྲངས་2300ལྷག་དང་། འཚོལ་སྐྱོབ་རླངས་འཁོར་ཐེངས་400ལྷག འཚོལ་སྐྱོབ་སྒྲིག་ཆས་ཆ་ཚང་8000ལྷག མི་མེད་གནམ་གྲུ་འཕུར་སྐྱོད་ཐེངས་800ལྷག དངོས་ཟོག་སྒྲིག་ཆས་སྟོང་པ་ཏུན་5.43བཅས་བཏང་བ་དང་། ལྟེ་བའི་ས་ཁོངས་སུ་གློག་སྒྲོན་4དང་། དམའ་གནོན་གློག་འདོན་རླངས་འཁོར་1 གློག་གསོག་གྲུ་ཤག་1བཅས་བཙུགས་པ་དང་། རྟེན་གཞིའི་ས་ཚིགས་12ཀྱི་འཕྲིན་གཏོང་སླར་གསོ་བྱུང་བ། འཚོལ་སྐྱོབ་ལས་དོན་ལ་འགན་ལེན་གང་ལེགས་མཁོ་འདོན་བྱས་པ་རེད། གནོད་འཚེ་ཐོན་ཚུན་རིམ་རྩིས་བྱས་ན་མི་ཐེངས་336བཏང་ནས། ལྟེ་བའི་ས་ཁོངས་སུ་གྲལ་བཤེར་ཞིབ་ཚགས་དང་རེ་རེ་བཞིན་འཚོལ་སྐྱོབ་ལས་ཀ་སྒྲུབ་པ་དང་། འཚོལ་སྐྱོབ་རྒྱ་ཁྱོན་རིམ་རྩིས་བྱས་ན་སྨི་གྲུ་བཞི་མ་ཁྲི་159.1ཟིན་ཡོད་པ་རེད།

    གནོད་འཚེ་ཐོན་རྗེས། རྒྱལ་ཁབ་ཕྱི་ནང་གི་འབྲེལ་བ་ཆད་པའི་མི་སྣའི་ནང་མིའི་ཞབས་ཞུའི་ཁ་པར་དུས་ཐོག་ཏུ་ཤར་གཏོང་ཐུབ་ཡོད། ཟླ9པའི་ཚེས་2ཉིན་གྱི་ཆུ་ཚོད་12བར། རིམ་རྩིས་བྱས་ན། ནང་མིའི་ཁ་པར་མི་ཐེངས་876འབྱོར་བ་དང་། དེའི་ནང་རྒྱལ་ནང་དུ་ཁ་པར་མི་ཐེངས་448དང་། ཕྱི་རྒྱལ་དུ་ཁ་པར་མི་ཐེངས་428འབྱོར་བ་དང་། ནང་མི་587ལ་སྣེ་ལེན་དང་བཀོད་སྒྲིག་བྱས། དེའི་ཁྲོད་དུ་རྒྱལ་ནང་གི་འབྲེལ་བ་ཆད་པ་དང་རྐྱེན་ལམ་དུ་ཤོར་མཁན་དང་འབྲེལ་བ་ཡོད་པའི་མི་253ཡོད།