༄༅།།ཞི་ཅིན་ཕིང་གིས་ཤང་ཀང་གི་ཤིན་ཅེ་ཏ་ཕུའུ་ཁུལ་གྱི་སྡོད་ཁང་ཐོག་སོ་མང་པོར་མེ་ཤོར་ནས་རྐྱེན་ལམ་དུ་ཤོར་བའི་མི་སྣ་དང་ལས་ཀའི་
དོན་དུ་རང་སྲོག་ཤོར་བའི་མེ་གསོད་རུ་མིར་མྱ་ངན་ཞུས་པ་དང་རྐྱེན་ལམ་དུ་ཤོར་མཁན་གྱི་
ནང་མི་དང་གནོད་འཚེ་ཕོག་པའི་མི་སྣར་སེམས་གསོའི་འཚམས་འདྲི་ཞུས་པ།

     ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་26ཉིན་གློག་འཕྲིན་འབྱོར་གསལ། ཟླ་11ཚེས་26ཉིན་གྱི་ཕྱི་དྲོར། ཤང་ཀང་གི་ཤིན་ཅེ་ཏ་ཕུའུ་ཝུའུ་ཚུན་ཧུང་ཧྥུའུ་ཡོན་གྱི་སྡོད་ཁང་ཐོག་སོ་མང་པོར་མེ་ཤོར་ནས་མི་སྣ་ཤི་རྨས་ཚབས་ཆེན་བྱུང་ཡོད།

     མེ་སྐྱོན་བྱུང་རྗེས། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་ཚད་མཐོའི་མཐོང་ཆེན་གནང་སྟེ། འཕྲལ་མར་མེ་གསོད་རོགས་སྐྱོབ་དང་མི་སྣ་ཤི་རྨས་སོགས་ཀྱི་གནས་ཚུལ་མཁྱེན་རྟོགས་གནང་བ་དང་། ཤང་ཀང་དུ་བཅའ་སྡོད་ཀྲུང་དབྱང་སྲིད་གཞུང་འབྲེལ་གཏུག་གཞུང་དོན་ཁང་གི་འགན་འཁུར་བར་ཤང་ཀང་དམིགས་བསལ་སྲིད་འཛིན་ཁུལ་གྱི་སྲིད་འཛིན་དཔོན་ལི་ཅ་ཁྲའོ་ལ་རྐྱེན་ལམ་དུ་ཤོར་བའི་མི་སྣ་དང་ལས་ཀའི་དོན་དུ་རང་སྲོག་ཤོར་བའི་མེ་གསོད་རུ་མིར་མྱ་ངན་ཞུ་རོགས་དང་རྐྱེན་ལམ་དུ་ཤོར་མཁན་གྱི་ནང་མི་དང་གནོད་འཚེ་ཕོག་པའི་མི་སྣར་སེམས་གསོའི་འཚམས་འདྲི་ཞུ་དགོས་པའི་མཛུབ་སྟོན་གནང་བ་དང་། ཀྲུང་དབྱང་ཀང་ཨའོ་གཞུང་དོན་ཁང་དང་ཤང་ཀང་དུ་བཅའ་སྡོད་ཀྲུང་དབྱང་སྲིད་གཞུང་འབྲེལ་གཏུག་གཞུང་ལས་ཁང་ལ། ཤང་ཀང་དམིགས་བསལ་སྲིད་འཛིན་ཁུལ་གྱི་སྲིད་གཞུང་ལ་རྒྱབ་སྐྱོར་བྱས་ནས་ནུས་ཤུགས་ཡོད་རྒུས་མེ་གསོད་རོགས་བྱེད་པ་དང་། མི་སྣ་འཚོལ་སྐྱོབ་དང་། རྨས་མ་སྐྱོབ་བཅོས། རྗེས་འཇུག་སེམས་གསོ་སོགས་ཀྱི་ལས་དོན་ཐབས་བརྒྱ་ཇུས་སྟོང་གིས་ཡག་པོ་སྒྲུབ་པ། འབྲེལ་ཡོད་སྡེ་ཚན་དང་ས་གནས་ལ་དགོས་ངེས་ཀྱི་རོགས་སྐྱོར་བཅས་བྱས་ཏེ། མེ་སྐྱོན་ནང་ཤི་རྨས་དང་གྱོང་གུན་ཕོག་ཚད་ཆུང་དུ་གཏོང་གང་ཐུབ་བྱེད་དགོས་པའི་བླང་བྱ་བཏོན་གནང་བ་རེད།

     ཤང་ཀང་དམིགས་བསལ་སྲིད་འཛིན་ཁུལ་སྲིད་གཞུང་གིས་འཕྲལ་སྡོམ་རོགས་སྐྱོབ་ལམ་སྲོལ་ལག་ལེན་བསྟར་འགོ་བཙུགས་པ་དང་། ཤང་ཀང་དུ་བཅའ་སྡོད་ཀྲུང་དབྱང་སྲིད་གཞུང་འབྲེལ་གཏུག་གཞུང་དོན་ཁང་གིས་འཕྲལ་སྡོམ་ལས་དོན་ཆེད་སྒྲུབ་ཚོགས་ཆུང་བཙུགས་ཏེ། དམིགས་བསལ་སྲིད་འཛིན་ཁུལ་གྱི་སྲིད་གཞུང་དང་འབྲེལ་གཏུག་དམ་ཟབ་བྱས་ནས་རོགས་སྐྱོབ་ལས་དོན་ཡག་པོ་སྒྲུབ་པར་ནུས་ཤུགས་ཡོད་རྒུས་རྒྱབ་སྐྱོར་བྱེད་བཞིན་ཡོད། མིག་སྔར་འབྲེལ་ཡོད་ལས་དོན་སྤེལ་བཞིན་ཡོད་པ་རེད།