༄༅།།ཟླ་བཅུ་པར་ལག་རྩལ་མཐོ་བའི་ཐོན་ལས་ཀྱི་བྲིན་ཚོང་ཡོང་འབབ་དུས་མཚུངས་ལས་13.6%འཕར་བ།

     འདི་ག་ཚགས་པར་ཁང་དུ་པེ་ཅིང་ནས་ཟླ་11ཚེས་24ཉིན་གློག་འཕྲིན་འབྱོར་གསལ། རྒྱལ་ཁབ་ཁྲལ་དོན་སྤྱི་ཁྱབ་ཅུས་ཀྱིས་གསར་དུ་ཡོངས་བསྒྲགས་བྱས་པའི་གྲངས་གཞི་ལས་མངོན་པར། ཟླ་བཅུ་པར་རང་རྒྱལ་གྱི་ཐོན་སྐྱེད་ནུས་ཤུགས་གསར་མ་རྒྱུན་མཐུད་སྐྱེད་སྲིང་དང་སྟོབས་ཆེར་ཕྱིན་ཞིང་། རྩེར་སོན་བཟོ་སྐྲུན་དང་། གསར་གཏོད་ཐོན་ལས། གྲངས་དངོས་དཔལ་འབྱོར་མཉམ་འདྲེས་བཅས་ཁྱབ་ཁོངས་ཆེན་པོ་གསུམ་གྱི་འཕེལ་ཕྱོགས་སྤྱིར་ན་བརྟན་པོ་ཡོད་པས། དཔལ་འབྱོར་འཕེལ་རྒྱས་ལ་གསོན་ཤུགས་གསར་པ་རྒྱུན་མཐུད་བསྣན་ཡོད།

     རྩེར་སོན་བཟོ་སྐྲུན་གྱིས་མུ་མཐུད་ནུས་ཤུགས་བཏོན་པ། ཟླ་བཅུ་པར་སྒྲིག་ཆས་བཟོ་སྐྲུན་ལས་རིགས་ཀྱི་བྲིན་ཚོང་ཡོང་འབབ་དུས་མཚུངས་ལས་7.3%འཕར་ཞིང་། ད་ལོ་ཚུན་དུ་བཟོ་སྐྲུན་ལས་རིགས་ཀྱི་ཆ་སྙོམས་ཆུ་ཚད་ལས་མུ་མཐུད་མཐོ་བ་ཡོད། དེའི་ནང་རྩིས་འཁོར་འཕྲིན་གཏོང་སྒྲིག་ཆས་བཟོ་སྐྲུན་ལས་རིགས་དང་། གྲུ་གཟིངས་དང་དེ་བཞིན་འབྲེལ་ཡོད་སྒྲིག་ཆས་བཟོ་སྐྲུན་ལས་རིགས། གློག་རྫས་བཟོ་སྐྲུན་ལས་རིགས་བཅས་ཀྱི་བྲིན་ཚོང་ཡོང་འབབ་དུས་མཚུངས་ལས་10.1%དང་། 24.4% 27.2%བཅས་སོ་སོར་འཕར་ནས་འཕེལ་རྒྱས་ཀྱི་གསོན་ཤུགས་ཆེན་པོ་ཞིག་མངོན་ཡོད།

     གསར་གཏོད་ཐོན་ལས་འཕེལ་རྒྱས་མགྱོགས་པོ་ཕྱིན་པ། ཟླ་བཅུ་པར་ལག་རྩལ་མཐོ་བའི་ཐོན་ལས་ཀྱི་བྲིན་ཚོང་ཡོང་འབབ་དུས་མཚུངས་ལས་13.6%འཕར་ཞིང་། དེའི་ནང་ལག་རྩལ་མཐོ་བའི་ཞབས་ཞུའི་ལས་རིགས་ཀྱི་བྲིན་ཚོང་ཡོང་འབབ་དུས་མཚུངས་ལས་16.1%འཕར་བ་དང་། ལག་རྩལ་མཐོ་བའི་བཟོ་སྐྲུན་ལས་རིགས་ཀྱི་བྲིན་ཚོང་ཡོང་འབབ་དུས་མཚུངས་ལས་10.1%འཕར་བ། འདུས་གྲུབ་གློག་སྐུད་དང་། བཟོ་ལས་འཕྲུལ་མི། མི་མེད་གནམ་གྲུ་བཅས་བཟོ་སྐྲུན་གྱི་བྲིན་ཚོང་ཡོང་འབབ་དུས་མཚུངས་ལས་32.5%དང་། 41.7% 38.4%བཅས་སོ་སོར་འཕར་ཡོད།

     གྲངས་དངོས་དཔལ་འབྱོར་མཉམ་འདྲེས་ལ་རྒྱུན་ཆད་མེད་པར་ཚད་བརྒལ་བྱུང་བ། ཟླ་བཅུ་པར་གྲངས་འཛིན་དཔལ་འབྱོར་གྱི་ལྟེ་བའི་ཐོན་ལས་ཀྱི་བྲིན་ཚོང་ཡོང་འབབ་དུས་མཚུངས་ལས་8.5%འཕར་ཞིང་། དེའི་ནང་གྲངས་འཛིན་ཐོན་རྫས་ཞབས་ཞུའི་ལས་རིཌ་དང་གྲངས་འཛིན་ལག་རྩལ་བཀོལ་སྤྱོད་ལས་རིགས་ཀྱི་བྲིན་ཚོང་ཡོང་འབབ་དུས་མཚུངས་ལས་10.2%དང་13.1%སོ་སོར་འཕར་བ་དང་། གྲངས་འཛིན་འཛད་སྤྱོད་ཀྱི་སྐུལ་ཁྲིད་ནུས་པ་མངོན་གསལ་དོད་པ་དང་གྲངས་འཛིན་གྱི་ནང་དོན་དང་སྨྱན་སྦྱོར་ལས་རིགས་ཀྱི་བྲིན་ཚོང་ཡོང་འབབ་དུས་མཚུངས་ལས་15.2%འཕར་ཡོད།