༄༅།།ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རང་མོས་ཚོང་དོན་ཁུལ་གྱི་པར་གཞི་3.0གྱི་གསར་གཏོད་ལག་བསྟར་ཞིབ་སྦྱོང་འཛིན་གྲྭ་ནན་ཉིང་དུ་སློབ་འགོ་ཚུགས་པ།

    འདི་ག་ཚགས་པར་ཁང་དུ་ནན་ཉིང་ནས་གློག་འཕྲིན་འབྱོར་གསལ། ཉིན་ཤས་གོང་། ཀྲུང་གོ་ཚོང་དོན་པུས་གཙོ་གཉེར་བྱས་པ་དང་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་འགྲེམས་ཚོགས་དྲུང་ཡིག་ཁྲུའུ་ཡིས་གཉེར་འགན་ཁུར་བའི་2025ལོའི་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་རང་མོས་ཚོང་དོན་ཁུལ་གྱི་པར་གཞི་3.0གྱི་གསར་གཏོད་ལག་བསྟར་ཞིབ་འཇུག་ཟབ་སྦྱོང་འཛིན་གྲྭ་ཀོང་ཤིས་ནན་ཉིང་དུ་དངོས་སུ་སློབ་འགོ་ཚུགས་པ་རེད། པུ་རུ་ནེ་དང་། ཁམ་ཕུ་ཁྲེ། ཧིན་རྡུ་ཉི་ཞི་ཡ། ལོ་སི། མ་ལེ་ཞི་ཡ། འབར་མ། ཧྥི་ལི་ཕིན། ཐེ་ལན། ཝེ་ཐེ་ནམ་བཅས་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རྒྱལ་ཁབ་9དང་དེ་བཞིན་ཨེ་ཤེ་ཡ་ཤར་ལྷོའི་མནའ་འབྲེལ་དྲུང་ཡིག་ཁྲུའུ་ཡི་སློབ་གཉེར་བ་41ཞིབ་འཇུག་ཟབ་སྦྱོང་འཛིན་གྲྭར་ཞུགས་ཡོད་པ་རེད།

     ཨེ་ཤེ་ཡ་ཤར་ལྷོའི་མནའ་འབྲེལ་དྲུང་ཡིག་ཁྲུའུ་ཡི་དྲུང་ཆེ་གཞོན་པ་ཁྲེང་ཀུང་གིས། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རང་མོས་ཚོང་དོན་ཁུལ་གྱི་པར་གཞི་3.0གྱི་རིམ་སྤོར་གྲོས་ཆོད་ཡི་གེར་དངོས་སུ་མིང་རྟགས་བཀོད་ཅིང་། མིག་སྔར་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཁག་དང་ཕྱོགས་ཁག་གིས་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རང་མོས་ཚོང་དོན་ཁུལ་གྱི་པར་གཞི་3.0གྱི་འབྲེལ་ཡོད་ནང་དོན་ལ་རྒྱུས་མངའ་དེ་བས་ལོན་དགོས་པ་དང་། ད་ཐེངས་ཀྱི་ཞིབ་འཇུག་ཟབ་སྦྱོང་འཛིན་གྲྭ་འཚོགས་པ་དེ་ནི་དུས་ལ་ཏག་ཏག་འཁེལ་བས། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རང་མོས་ཚོང་དོན་ཁུལ་གྱི་པར་གཞི་3.0གྱི་གསར་གཏོད་ལག་བསྟར་ལ་སྐུལ་འདེད་གཏོང་བར་དགེ་མཚན་ལྡན་པའི་ནུས་པ་ཐོན་རྒྱུ་རེད་ཅེས་བཤད།

    ཨེ་ཤེ་ཡ་ཤར་ལྷོའི་མནའ་འབྲེལ་དྲུང་ཡིག་ཁྲུའུ་ཡི་ལས་རོགས་ཅུས་ཀྲང་ཁྲེན་པོ་ཆང་གིས་སློབ་མའི་འཐུས་མི་ཡིན་པའི་ངོས་ནས་གཏམ་བཤད་སྤེལ་སྐབས། ཨེ་ཤེ་ཡ་ཤར་ལྷོའི་མནའ་འབྲེལ་དང་ཀྲུང་གོའི་དཔལ་འབྱོར་ཚོང་དོན་མཉམ་ལས་ཉིན་རེ་བཞིན་ཟབ་ཏུ་འགྲོ་བཞིན་ཡོད་ལ། ལོ་མང་བསྟུད་མར་ཕན་ཚུན་ཚོང་དོན་རོགས་ཟླ་ཆེ་ཤོས་སུ་གྱུར་ཡོད། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རང་མོས་ཚོང་དོན་ཁུལ་གྱི་པར་གཞི་3.0གྱི་རིམ་སྤོར་གྲོས་ཆོད་ཡི་གེར་མིང་རྟགས་བཀོད་པ་དེས་ཕྱོགས་གཉིས་པོའི་རོགས་ཟླའི་འབྲེལ་བའི་ལེའུ་གསར་པ་རྩོམ་འགོ་ཚུགས་པས། ཕྱོགས་ཁག་གིས་མཉམ་ལས་ཀྱི་འཕེལ་རིམ་མགྱོགས་སུ་བཏང་ནས་མཉམ་དུ་ས་ཁོངས་རྒྱུན་མཐུད་དར་རྒྱས་གོང་འཕེལ་གཏོང་བའི་རེ་སྒུག་བྱེད་ཀྱི་ཡོད་ཅེས་བཤད།