༄༅།།ལྷོ་ཁོ་རེ་ཡའི་ཉེས་ཅན་ལ་ཚེ་བཙོན་གྱི་ཁྲིམས་ཐག་བཅད་པ།

     ལྷོ་ཁོ་རེ་ཡའི་སྨྱན་སྦྱོར་གྱི་གནས་འཕྲིན་ཕྱོགས་བསྡུས་ལྟར་ན། ཚེས་24ཉིན་ལྷོ་ཁོ་རེ་ཡའི་ཧྲོའར་ཀྲུང་དབྱང་ས་གནས་ཁྲིམས་ཁང་གིས་དྲ་རྒྱའི་རང་བཞིན་གྱི་ཉེས་གསོག་ཚོགས་པ་ཞིག་གི་ཉེས་ཅན་གཙོ་བོ་ཅིན་ལུའུ་ཡོན་(སྒྲ་སྒྱུར།)ལ་ཚེ་གང་བཙོན་འཇུག་བྱ་རྒྱུའི་ཁྲིམས་ཐག་བཅད་པ་རེད།

     གནས་འཕྲིན་སྤེལ་བར་གཞིགས་ན། ཧྲོའར་ཀྲུང་དབྱང་ས་གནས་ཁྲིམས་ཁང་གིས་ད་དུང་དྲ་རྒྱའི་ཐོག་ཁོའི་མི་སྒེར་གྱི་ཆ་འཕྲིན་ལོ་10ལ་ཡོངས་བསྒྲགས་བྱ་རྒྱུ་དང་། ལོ་30ལ་གློག་རྡུལ་ལྟ་སྐུལ་ཚོད་འཛིན་སྒྲིག་ཆས་འདོགས་དགོས་པ་སོགས་ཀྱི་བཀའ་བཏང་བ་རེད།

     གནས་འཕྲིན་སྤེལ་བར་གཞིགས་ན། ད་ལོ་ཅིན་ལུའུ་ཡོན་ནི་ལོ་33ཡིན་པ་དང་2020ལོའི་ཟླ་5པ་ནས་2025ལོའི་ཟླ་1པའི་བར་སྤྱི་ཚོགས་འབྲེལ་འདྲིས་སྨྱན་སྦྱོར་ལས་སྟེགས་“གློག་འཕྲིན་”ཞེས་པའི་ཐོག་གསང་སྡོམ་ཁ་བརྡ་ཁང་གཉེར་སྐྱོང་བྱས་ནས་ཉེས་གསོག་ཚོགས་པ་སྒྲིག་འཛུགས་བྱས་ཏེ། མི་261ལ་ཆགས་པའི་ནག་ཉེས་བསགས་པ་དང་འབྲེལ་ཡོད་ནང་དོན་བརྙན་བཟོས་ནས་ཁྱབ་སྤེལ་བྱས་པ་རེད།

     གནས་འཕྲིན་སྤེལ་བར་གཞིགས་ན། གྱོད་གཞི་དེ“ཁང་པ་ཨང་Nཔའི་”གྱོད་གཞི་དང་འདྲ་ས་ཧ་ཅང་མང་པོ་ཡོད་པ་རེད། “ཁང་པ་ཨང་Nཔའི་”གྱོད་གཞི་དེ་2019ལོ་ནས་བཟུང་ལྷོ་ཁོ་རེ་ཡའི་སྨྱན་སྦྱོར་གྱིས་ཁྱབ་བསྒྲགས་བྱས་རྗེས་ལྷོ་ཁོ་རེ་ཡའི་སྤྱི་ཚོགས་ཀྱིས་དོ་ཁུར་ཆེན་པོ་བྱས། ཉེས་གསོག་དོགས་ཡོད་མི་སྣས་གནོད་འཚེ་ཕོག་མཁན་ལ་བཙན་ཤེད་ཀྱིས་ཆགས་སྲེད་ཀྱི་བརྙན་ཕབ་པ་སོགས་ཀྱི་བྱ་ཐབས་བརྒྱུད་འབྲེལ་ཡོད་ནང་དོན་དེ་དུས་ཐོག་འཕྲིན་གཏོང་མཉེན་ཆས་ནང་གི་ཁ་བརྡ་ཁང་དུ་ཁྱབ་སྤེལ་བྱས་ནས་ཁེ་བཟང་རག་གི་ཡོད་པ་རེད། 2021ལོར“ཁང་པ་ཨང་Nཔའི་”ཉེས་ཅན་གཙོ་བོ་ཀྲའོ་ཀྲུའུ་པིན་ལ་དུས་བཙོན་ལོ་42ཀྱི་ཁྲིམས་ཐག་བཅད་པ་རེད།

     2024ལོའི་ཟླ་9པར་ལྷོ་ཁོ་རེ་ཡ་སྲིད་གཞུང་གི་བླང་བྱ་ལྟར། “གློག་འཕྲིན་”ལས་སྟེགས་ཀྱིས་ཆགས་སྲེད་ཀྱི་ནང་དོན་ལ་རྡུང་རྡེག་ནན་པོ་གཏོང་རྒྱུའི་ཁས་ལེན་བྱས་པ་མ་ཟད། འབྲེལ་ཡོད་སྡེ་ཁག་དང་མཉམ་ལས་བྱས་ཏེ་ལས་སྟེགས་ཀྱི་ཐོག་ཏུ་འབྲེལ་ཡོད་ཆགས་སྲེད་ཀྱི་ནང་དོན་དང་དེ་བཞིན་ཁྲིམས་འགལ་གྱི་ནང་དོན་གཞན་དག་བསུབ་རྒྱུ་ཁས་བླངས་པ་རེད།