༄༅།།ཨུ་རུ་སུ་དང་ཐུར་ཁེས་ཡུག་རེན་གྱི་གནད་དོན་ཐད་ནས་གྲོས་མོལ་བྱས་པ།

     ཚེས་24ཉིན་ཨུ་རུ་སུའི་ཙུང་ཐུང་ཕུའུ་ཅིང་དང་ཐུར་ཁེའི་ཙུང་ཐུང་ཨར་ཏོ་ཨན་གཉིས་ཀྱིས་ཁ་པར་བཏང་ནས་ཕྱོགས་གཉིས་པོས་ཡུག་རེན་གནད་དོན་ཐད་གཙོ་གནད་དུ་བསམ་འཆར་བརྗེ་རེས་བྱས་པ་རེད།

ཁེ་ལི་མེ་ལིན་ཕོ་བྲང་དྲ་ཚིགས་ཐོག་གནས་ཚུལ་སྤེལ་བར་གཞིགས་ན། ཨུ་རུ་སུ་དང་ཐུར་ཁེའི་འགོ་ཁྲིད་པས་ཁ་པར་གཏོང་སྐབས་ཨ་རིས་བཏོན་པའི་ཞི་བདེའི་ཐག་གཅོད་ཇུས་གཞི་ཚུད་པའི་ཡུག་རེན་གྱི་དུས་བབ་ཐད་བསམ་འཆར་བརྗེ་རེས་བྱས་པ་རེད། ཕུའུ་ཅིང་གིས་མིག་སྔར་ཨུ་རུ་སུ་ཕྱོགས་ཀྱིས་ཤེས་རྟོགས་བྱུང་བའི་ཨ་རི་ཕྱོགས་ཀྱི་གྲོས་འགོ་པར་གཞི་དེའི་ནང་དོན་ཁ་ཕྱོགས་དེ་སྔའི་ཨུ་རུ་སུ་དང་ཨ་རིའི་འགོ་ཁྲིད་ཀྱིས་ཨ་ལ་སི་ཅ་དབུ་ཚོགས་ཀྱི་གྲོས་བསྡུར་དང་མཐུན་པས། རྩ་དོན་ཐོག་མཐའ་མཇུག་གི་ཞི་བདེའི་ཐག་གཅོད་ཇུས་གཞིའི་རྨང་གཞིར་འགྱུར་ཆོག་ཅེས་བཤད་པ་རེད། ཕུའུ་ཅིང་གིས་ཨུ་རུ་སུ་ཕྱོགས་ཀྱིས་ཆབ་སྲིད་དང་ཕྱི་འབྲེལ་གྱི་ཐབས་ལམ་བརྒྱུད་ཡུག་རེན་གྱི་ཉམས་ཉེན་ཐག་གཅོད་བྱ་རྒྱུའི་འདོད་བློ་བསྐྱར་བསྒྲགས་བྱས་པ་རེད།

     ཨར་ཏོ་ཨན་གྱིས་ཐུར་ཁེ་ཕྱོགས་ཀྱིས་ཡུག་རེན་གནད་དོན་གྱི་གྲོས་མོལ་འཕེལ་རིམ་ལ་གཞོགས་འདེགས་བྱེད་འདོད་ཡོད་པ་མ་ཟད། དབྱི་སི་ཐན་པུར་གྲོས་མོལ་སྟེགས་བུར་བརྩི་རྩིས་ཡོད་ཅེས་བཤད་པ་རེད། རྒྱལ་ཁབ་གཉིས་ཀྱི་འགོ་ཁྲིད་པས་ཨུ་རུ་སུ་དང་ཐུར་ཁེ་རྒྱལ་ཁབ་གཉིས་ཀྱིས་ཡུག་རེན་གནད་དོན་ཐད་རིམ་པ་ཁག་གི་འབྲེལ་གཏུག་ལ་ཤུགས་རྒྱག་རྒྱུའི་མོས་མཐུན་གནང་བ་རེད།

     ཨུ་རུ་སུ་དང་ཐུར་ཁེའི་འགོ་ཁྲིད་པས་ད་དུང་མིག་སྔའི་ཕྱོགས་གཉིས་པོའི་མཉམ་ལས་གྲོས་གཞིར་གྲོས་བསྡུར་བྱས་པ་དེའི་ནང་གཙོ་གནད་དུ་ཕྱོགས་གཉིས་པོའི་ཉོ་ཚོང་དང་མ་འཇོག་འབྲེལ་བ་སྔར་བས་རྒྱ་ཆེར་གཏོང་རྒྱུ་དང་། དེ་བཞིན་ནུས་རྒྱུའི་ཁྱབ་ཁོངས་སུ་འཐབ་ཇུས་ཀྱི་དོན་སྙིང་ལྡན་པའི་རྣམ་གྲངས་ལག་བསྟར་བྱ་རྒྱུ་ཚུད་ཡོད་པ་རེད། རྒྱལ་ཁབ་གཉིས་ཀྱི་ཙུང་ཐུང་གིས་དུས་བཀག་གི་འབྲེལ་གཏུག་རྒྱུན་འཁྱོངས་བྱེད་པར་མོས་མཐུན་བྱས།

     ཉིན་དེར་ཨུ་རུ་སུའི་ཙུང་ཐུང་ལས་རོགས་པ་ཝུའུ་ཧྲ་ཁོ་ཧྥུའུ་ཡིས་མིག་སྔར་ཨུ་རུ་སུ་ཕྱོགས་ལ་འབྱོར་བའི་ཡུག་རེན་གྱི་གནད་དོན་ཐག་གཅོད་བྱ་རྒྱུའི་སྐོར་གྱི་ཨ་རིའི“འཆར་གཞི་གསར་པ་28”ནང་གི་དོན་ཚན་ཁག་གཅིག་ཨུ་རུ་སུ་ཕྱོགས་ཀྱིས་བལྟས་ན་དང་ལེན་བྱེད་ཆོག་མོད། འོན་ཀྱང་དོན་ཚན་གཞན་དག་ཁག་གཅིག་ལ་ད་དུང་ཕྱོགས་ཁག་གིས་ཁྱོན་ཡོངས་ནས་གྲོས་བསྡུར་དང་གྲོས་མོལ་གཏིང་ཟབ་བྱེད་དགོས་ཞེས་བཤད་པ་རེད།

     གཞན་ཡང་ཨུ་རུ་སུའི་ཙུང་ཐུང་གསར་འགྱུར་དྲུང་ཡིག་ཕེ་སི་ཁོ་ཧྥུའུ་ཡིས་ཉིན་དེའི་སྔ་ཙམ་གོང་ཨུ་རུ་སུ་ཕྱོགས་ལ་ཨ་རི་དང་ཡུག་རེན་གྱིས་སུའེ་ཙེར་ཇེ་ནེ་ཝར་གྲོས་མོལ་བྱས་རྗེས་བཟོ་བཅོས་བརྒྱབ་པའི་ཞི་བདེའི་འཆར་གཞིའི་ཡིག་ཆ་ད་དུང་འབྱོར་མེད་ཅེས་བཤད་པ་རེད། ཁོང་གིས་ཨུ་རུ་སུ་ཕྱོགས་ཀྱིས་ཤེས་རྟོགས་བྱས་པར་གཞིགས་ན། ཨ་རི་ཕྱོགས་ཀྱིས་དེ་གོང་ཨུ་རུ་སུ་ཕྱོགས་ལ་སྤྲད་པའི་པར་གཞི་དང་བསྡུར་ན། ཞི་བདེའི་འཆར་གཞིའི་ཡིག་དེབ་དེ་“ལེགས་སྒྲིག་ཁ་ཤས་བྱས་ཡོད་”ཅེས་བཤད་པ་རེད།