༄༅།།མོ་སི་ཁོ་ལ་འཇབ་རྒོལ་ཐེབས་པ།

     ཨུ་རུ་སུའི་མོ་སི་ཁོ་མངའ་སྡེ་ཡི་ཚ་གློག་ས་ཚིགས་ཤིག་ལ་འཇབ་རྒོལ་ཐེབས་ནས་མེ་སྐྱོན་ཕོག་ཡོད།

     ས་གནས་དེ་གའི་དུས་ཚོད་ཚེས་23ཉིན་ཨུ་རུ་སུའི་མོ་སི་ཁོ་མངའ་སྡེའི་འགོ་འཛིན་ཝོ་ལུའོ་པི་ཡུའེ་ཕུའུ་ཡིས་ཉིན་དེ་གའི་ཞོགས་པ་མངའ་སྡེ་དེའི་ཧྲ་ཐུའུ་ལ་ཚ་གློག་ས་ཚིགས་ལ་ཡུག་རེན་ཕྱོགས་ཀྱི་མི་མེད་གནམ་གྲུའི་འཇབ་རྒོལ་ཐེབས་ཡོད། མི་མེད་གནམ་གྲུ་ཁག་གཅིག་མཁའ་ཟོན་མ་ལག་གིས་གཏོར་ཡོད་པ་དང་། མི་མེད་གནམ་གྲུ་གཞན་པ་ཁ་ཤས་གློག་ཁང་ས་ཁོངས་སུ་ལྷུང་ནས་མེ་སྐྱོན་ཐོན་ཡོད་པ་རེད། མིག་སྔར་མེ་སྐྱོན་ཚོད་འཛིན་བྱས་ཟིན་པ་དང་འཕྲལ་སྡོམ་སྡེ་ཁག་གིས་སྔར་བཞིན་ཡུལ་དངོས་སུ་ཐག་གཅོད་བྱེད་བཞིན་ཡོད་པ་རེད།

     མོ་སི་ཁོ་མངའ་སྡེའི་འགོ་འཛིན་གྱིས། ས་གནས་དེ་གའི་གློག་མཁོ་འདོན་དེ་གྲ་སྒྲིག་སྐུད་ལམ་དུ་བསྒྱུར་ནས་གྲོང་མིར་གློག་སྤྱོད་མཚམས་ཆད་མེད་ཅེས་ཁ་གསབ་བྱས་ཡོད། གཞུང་ཕྱོགས་ཀྱིས་དོན་རྐྱེན་དེས་གྲོང་མིའི་བདེ་འཇགས་ལ་འཇིགས་སྐུལ་བཟོས་མེད་ཅེས་གཏན་འཁེལ་བྱས་ཡོད་པ་རེད།

     གཞན་ཡང་ཉིན་དེར་མོ་སི་ཁོ་གྲོང་ཁྱེར་གྱི་འགོ་འཛིན་སུའོ་པི་ཡ་ཉིང་གིས་མོ་སི་ཁོ་གྲོང་ཁྱེར་དུ་འཕུར་བའི་ཡུག་རེན་ཕྱོགས་ཀྱི་མི་མེད་གནམ་གྲུ་གསུམ་གཏོར་ཟིན་ཞེས་བཤད་པ་རེད།

     ཚེས་23ཉིན་ཡུག་རེན་མཁའ་དམག་གིས་བརྡ་ཁྱབ་ནང་ཚེས་22ཉིན་གྱི་ཆུ་ཚོད་19ནས་བཟུང་། ཨུ་རུ་སུའི་དམག་དཔུང་གིས་མི་མེད་གནམ་གྲུ་98སྤྱད་དེ་ཡུག་རེན་ལ་རྡུང་རྡེག་བཏང་ཞེས་བརྗོད་ཡོད་པ་རེད།