༄༅།།《ལག་གདང་སྦྲེལ་ནས་སྐྱེ་ཁམས་བཟང་བའི་དེང་རབས་ཅན་གྱི་ཕྱོགས་སུ་སྐྱོད། ——ཞི་ཅིན་ཕིང་གི་སྐྱེ་ཁམས་ཤེས་དཔལ་དགོངས་
པས་གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ལ་ཕུལ་བའི་རིགས་པའི་གཞུང་ལུགས་ཀྱི་ལེགས་སྐྱེས་དང་
ལག་ལེན་གྱི་ཁྲིད་སྟོན》ཞེས་པའི་རིག་མཛོད་ཀྱི་སྙན་ཞུ་ཁྱབ་བསྒྲགས་བྱས་པ།

     ཤིན་ཧྭ་གསར་འགྱུར་ཁང་ཁྲེང་ཏུའུ་ནས་ཟླ་11ཚེས་21ཉིན་གློག་འཕྲིན་འབྱོར་གསལ། ཤིན་ཧྭ་གསར་འགྱུར་ཁང་རྒྱལ་ཁབ་རྩེར་སོན་རིག་མཛོད་དང་ཞི་ཅིན་ཕིང་གི་སྐྱེ་ཁམས་ཤེས་དཔལ་དགོངས་པ་ཞིབ་འཇུག་ལྟེ་གནས་ཀྱིས་ཐུན་མོང་ཐོག་རྩོམ་འབྲི་བྱས་པའི་རིག་མཛོད་སྙན་ཞུ《ལག་གདང་སྦྲེལ་ནས་སྐྱེ་ཁམས་བཟང་བའི་དེང་རབས་ཅན་གྱི་ཕྱོགས་སུ་སྐྱོད། ——ཞི་ཅིན་ཕིང་གི་སྐྱེ་ཁམས་ཤེས་དཔལ་དགོངས་པས་གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ལ་ཕུལ་བའི་རིགས་པའི་གཞུང་ལུགས་ཀྱི་ལེགས་སྐྱེས་དང་ལག་ལེན་གྱི་ཁྲིད་སྟོན》ཞེས་པ་ཚེས་21ཉིན་ཁྲེང་ཏུའུ་རུ་འཚོགས་པའི་2025ལོའི་གོ་ལ་ཧྲིལ་པོའི་དོམ་ཁྲའི་རོགས་ཟླའི་ཚོགས་ཆེན་ནས་གོ་ལ་ཧྲིལ་པོར་ཁྱབ་བསྒྲགས་བྱས་པ་རེད། དེ་ཉིན་བརྗོད་དོན་གཙོ་བོ་གཅིག་མཚུངས་ཀྱི་རིག་མཛོད་ཀྱི་སྙན་ཞུ་ཡང་པེ་ཅིང་དུ་འཚོགས་པའི་གོ་ལ་ཧྲིལ་པོའི་ལྷོ་ཕྱོགས་དེང་རབས་ཅན་གྱི་གླེང་སྟེགས་ཐོག་ཁྱབ་བསྒྲགས་བྱས་པ་རེད།

      རིག་མཛོད་ཀྱི་སྙན་ཞུར་ཡིག་འབྲུ་ཁྲི་1.6ཙམ་ཡོད་པ་དང་ནང་དོན་ཁག་གསུམ་ལ་དབྱེ་ནས་ཞི་ཅིན་ཕིང་གི་སྐྱེ་ཁམས་ཤེས་དཔལ་དགོངས་པའི་འཛམ་གླིང་གི་དོན་སྙིང་གཏིང་ཟབ་ལ་དམིགས་ཏེ། གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ཀྱི་འདུ་ཤེས་ལ་དགོངས་པ་འདི་དཔྱད་གཞིར་འཛིན་པ་དང་ཐོད་རྒལ་ཐད་གསལ་འགྲེལ་གཏིང་ཟབ་བྱས་པ་དང་། གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་གཏོང་བའི་ཀྲུང་གོའི་ཇུས་གཞི་དང་། ཀྲུང་གོའི་ཉམས་མྱོང་། ཀྲུང་གོའི་གྲོས་འགོ་བཅས་གོ་རིམ་ལྡན་པའི་སྒོ་ནས་གསེད་བཀྲོལ་བྱས་པ། གོ་ལ་ཧྲིལ་པོའི་སྐྱེ་ཁམས་ཤེས་དཔལ་མཉམ་སྐྲུན་མཉམ་གཏོད་བྱ་རྒྱུའི་རེ་འབོད་བྱས་ཏེ། འཛམ་གླིང་རྒྱལ་ཁབ་ཁག་གིས་ལག་གདང་སྦྲེལ་ནས་སྐྱེ་ཁམས་བཟང་བའི་དེང་རབས་ཅན་གྱི་ཕྱོགས་སུ་སྐྱོད་པར་བློ་སྒོ་ཕྱེ་ཡོད།

      སའི་གོ་ལ་ནི་མིའི་རིགས་འཚོ་གནས་བྱེད་པའི་ཁྱིམ་གཞིས་འབའ་ཞིག་དེ་ཡིན། མིའི་རིགས་ཀྱི་སྤྱི་ཚོགས་བྱ་འཕུར་བ་ལྟར་འཕེལ་རྒྱས་ཕྱིན་པ་དང་བསྟུན་ནས་གནམ་གཤིས་འགྱུར་ལྡོག་ཕྱིན་པ་དང་། སྐྱེ་དངོས་སྣ་མང་རང་བཞིན་ཉམས་པ། ཁོར་ཡུག་ལ་སྦགས་བཙོག་ཕོག་པ་བཅས་ཀྱི“ཉམས་ཉེན་གསུམ”གྱི་དོན་དངོས་འགྲན་སློང་སྔར་བས་ཛ་དྲག་ཏུ་ཕྱིན་ཏེ། སྲོལ་རྒྱུན་དེང་རབས་ཅན་གྱི་རྣམ་པ་རྒྱུན་མཐུད་བྱེད་དཀའ་བའི་སྐྱེ་ཁམས་ཀྱི་དཀའ་གནས་སུ་གྱར་ཡོད། མིའི་རིགས་ཀྱི་ཤེས་དཔལ་ལོ་རྒྱུས་ཀྱི་ལམ་མདོར་སླེབས་སྐབས་གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ཇི་ལྟར་གཏོང་དགོས་སམ།

     སྙན་ཞུའི་ནང་ཞི་ཅིན་ཕིང་གི་སྐྱེ་ཁམས་ཤེས་དཔལ་དགོངས་པ་ནི་མར་ཁེ་སི་རིང་ལུགས་ཀྱི་གཞི་རྩའི་རྩ་བའི་རིགས་པ་དང་ཀྲུང་གོའི་སྐྱེ་ཁམས་ཤེས་དཔལ་འཛུགས་སྐྱོང་གི་ལག་ལེན་ཟུང་འབྲེལ་དང་ཀྲུང་ཧྭའི་ཕུལ་བྱུང་གི་སྲོལ་རྒྱུན་སྐྱེ་ཁམས་རིག་གནས་ཟུང་འབྲེལ་བྱས་པའི་གྲུབ་འབྲས་གལ་ཆེན་ཞིག་ཡིན་པས། སྐྱེ་ཁམས་ཤེས་དཔལ་འཛུགས་སྐྱོང་གི་ཀྲུང་གོའི་དྲི་བ་དང་། འཛམ་གླིང་དྲི་བ། མི་དམངས་ཀྱི་དྲི་བ། དུས་རབས་དྲི་བ་བཅས་ལ་ཚན་རིག་དང་མཐུན་པའི་སྒོ་ནས་དྲིས་ལན་བཏབ་ཡོད།

སྙན་ཞུའི་ནང་བསྟན་དོན། ཞི་ཅིན་ཕིང་གི་སྐྱེ་ཁམས་ཤེས་དཔལ་དགོངས་པའི་ཚན་རིག་དང་མཐུན་པའི་ཁྲིད་སྟོན་འོག ཀྲུང་གོས་མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་ཀྲུང་གོའི་ལུགས་ཀྱི་དེང་རབས་ཅན་གྱི་ལམ་བུར་བློ་བརྟན་འགྱུར་མེད་ངང་བསྐྱོད་པ་མ་ཟད། རྒྱལ་ཁབ་ཆེན་པོའི་འགན་ཁུར་ནས་གོ་ལ་ཧྲིལ་པོའི་སྐྱེ་ཁམས་ཤེས་དཔལ་འཛུགས་སྐྱོང་ནང་ཞུགས་མཁན་གལ་ཆེན་དང་། ལེགས་སྐྱེས་འབུལ་མཁན། སྣེ་ཁྲིད་མཁན་བཅས་མཐའ་འཁྱོངས་བྱས་ཏེ། གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ལ་གཏན་འཁེལ་རང་བཞིན་ཆེན་པོ་བསྣན་ཡོད།

     ཀྲུང་གོའི་ལྗང་མདོག་ལག་ལེན་གྱི་རྨང་གཞིའི་ཐོག་སྙན་ཞུའི་ནང་མ་ལག་ཆ་ཚང་དང་། ཚན་རིག་དང་མཐུན་ལ་ནུས་པ་ལྡན་པ། དཔྱད་གཞིར་འཛིན་ཆོག་པ་བཅས་ཀྱི་སྐྱེ་ཁམས་ཤེས་དཔལ་འཛུགས་སྐྱོང་གི་ཉམས་མྱོང་ཆ་ཚང་ཞིག་བཏོན་པ་སྟེ། རྒྱལ་ཁབ་ཀྱི་བློ་སྟོབས་ལ་བརྟེན་ནས་སྐྱེ་ཁམས་ཤེས་དཔལ་གྱི་འདུ་ཤེས་དེ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་སྤྱི་ཁོག་འཐབ་ཇུས་ནང་མཉམ་འདྲེས་ཡོང་བར་སྐུལ་འདེད་གཏོང་བ་དང་། བཅོས་སྐྱོང་མ་ལག་གི་འཕོ་འགྱུར་ལ་བརྟེན་ནས་རྒྱུན་མཐུད་ཆོག་པའི་འཕེལ་རྒྱས་ཀྱི་ལམ་ལུགས་ཀྱི་རྨང་གཞི་དང་འགན་སྲུང་སྲ་བརྟན་དུ་གཏོང་བ། ཚན་རྩལ་གསར་གཏོད་ལ་བརྟེན་ནས་རྒྱུན་མཐུད་ཆོག་པའི་འཕེལ་རྒྱས་ཀྱི་ནང་གནས་འགུལ་ནུས་ཆེ་རུ་གཏོང་བ། གནམ་འོག་ལ་བཅངས་པའི་བརྩེ་སེམས་ལ་བརྟེན་ནས་རྒྱུན་མཐུད་ཆོག་པའི་འཕེལ་རྒྱས་ཀྱི་གོ་ལ་ཧྲིལ་པོའི་མཉམ་ཤུགས་གཅིག་སྒྲིལ་བཅས་བྱས་ཡོད།

    སྐྱེ་ཁམས་ཉམས་ཉེན་དེ་མིའི་རིགས་ཀྱི་འཚོ་གནས་འཕེལ་རྒྱས་ལ་འཇིགས་སྣང་བཟོ་བའི་འགྲན་སློང་ཆེན་པོ་ཞིག་ཏུ་གྱུར་སྐབས། དྭངས་གཙང་མཛེས་སྡུག་ལྡན་ལ་རྒྱུན་མཐུད་ཆོག་པའི་ཁྱིམ་གཞིས་འཛུགས་སྐྲུན་བྱེད་པའི་ལས་འགན་དེ་བས་གལ་ཆེ་བར་འགྱུར་གྱི་ཡོད། སྙན་ཞུའི་ནང་རྒྱལ་ཁབ་ཁག་གིས་ལག་གདང་སྦྲེལ་ནས་དྭངས་གཙང་མཛེས་སྡུག་ལྡན་ལ་རྒྱུན་མཐུད་ཆོག་པའི་འཛམ་གླིང་མཉམ་དུ་སྐྲུན་དགོས་པའི་རེ་འབོད་བྱས་ཡོད། ལོ་རྒྱུས་ཀྱི་འགོ་འཛུགས་ས་གསར་པའི་ཐོག་ཀྲུང་གོས་མུ་མཐུད་སྒོ་དབྱེ་བསྟུན་མཁས་དང་མཉམ་ལས་གཉིས་ཕན་གྱི་རྩ་དོན་རྒྱུན་འཁྱོངས་བྱས་ཏེ། དངོས་སྒྲུབ་ཀྱི་བྱ་སྤྱོད་ལ་བརྟེན་ནས་གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་གཏོང་བ་དང་འཛམ་གླིང་རྒྱལ་ཁབ་ཁག་དང་ལག་གདང་སྦྲེལ་ནས་སྐྱེ་ཁམས་བཟང་བའི་དེང་རབས་ཅན་གྱི་ཕྱོགས་སུ་སྐྱོད་བཞིན་ཡོད།

      2025ལོའི་གོ་ལ་ཧྲིལ་པོའི་དོམ་ཁྲའི་རོགས་ཟླའི་ཚོགས་ཆེན་ཐོག་སྙན་ཞུ་དེ་ཤིན་ཧྭ་གསར་འགྱུར་ཁང་གི་སྤྱི་ཁྱབ་རྩོམ་སྒྲིག་པ་དང་ཤིན་ཧྭ་གསར་འགྱུར་ཁང་རྒྱལ་ཁབ་རྩེར་སོན་རིག་མཛོད་རིག་གཞུང་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ལུའེ་ཡན་སུང་གིས་གཙོ་སྐྱོང་བྱས་ནས་ཁྱབ་བསྒྲགས་བྱས་པ་རེད། འདི་ནི་2024ལོའི་ཟླ་11པར་ཤིན་ཧྭ་གསར་འགྱུར་ཁང་རྒྱལ་ཁབ་རྩེར་སོན་རིག་མཛོད་དང་ཞི་ཅིན་ཕིང་གི་སྐྱེ་ཁམས་ཤེས་དཔལ་དགོངས་པ་ཞིབ་འཇུག་ལྟེ་གནས་ཀྱིས་ཁྲེང་ཏུར《འཛམ་གླིང་གིས་མཛེས་སྡུག་ལྡན་པའི་ཀྲུང་གོའི“ལྗང་མདོག་གསང་ཨང”རྟོགས་པར་བྱེད། ——ཞི་ཅིན་ཕིང་གི་སྐྱེ་ཁམས་ཤེས་དཔལ་དགོངས་པའི་ཀྲུང་གོའི་ལག་ལེན་དང་འཛམ་གླིང་གི་ལེགས་སྐྱེས》ཁྱབ་བསྒྲགས་བྱས་རྗེས། ཞི་ཅིན་ཕིང་གི་སྐྱེ་ཁམས་ཤེས་དཔལ་དགོངས་པར་གསལ་འགྲེལ་བྱས་པའི་རིག་མཛོད་ཀྱི་སྙན་ཞུ་གལ་ཆེན་གཞན་ཞིག་རེད།