༄༅།།ཀྲུང་གོ་སོགས་རྒྱལ་ཁབ་12ཀྱིས་དབང་དོར་འདེམས་ཤོག་འཕངས་ཡོད། 

     ཀྲུང་གོ་ཕྱོགས་ཀྱིས་རྒྱལ་སྤྱིའི་སྤྱི་ཚོགས་ཀྱིས་ཨ་ཧྥུ་ཀ་ནི་སི་ཐན་གྱི་དུས་བབ་ལ་ཕྱོགས་ཡོངས་ནས་ཕྱི་རོལ་ཡུལ་དང་མཐུན་པའི་ལྟ་ཚུལ་འཛིན་རྒྱུའི་སྐུལ་མ་བྱས།

    ཚེས་7ཉིན། མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་འཐུས་མི་གཞོན་པ་ཀེང་ཧྲོང་གིས་མཉམ་འབྲེལ་རྒྱལ་ཚོགས་ཀྱི་ཚོགས་འདུའི་ཐོག ཨ་ཧྥུ་ཀ་ནི་སི་ཐན་གྱི་གནད་དོན་ལ་གྲོས་ཞིབ་བྱེད་སྐབས་གཏམ་བཤད་སྤེལ་ནས་རྒྱལ་སྤྱིའི་སྤྱི་ཚོགས་ཀྱིས་ཨ་ཧྥུ་ཀ་ནི་སི་ཐན་གྱི་དུས་བབ་ལ་ཕྱོགས་ཡོངས་དང་ཕྱི་རོལ་ཡུལ་གྱི་ལྟ་ཚུལ་འཛིན་དགོས་པའི་སྐུལ་མ་བཏང་བ་རེད།

     ཀེང་ཧྲོང་གིས་མིག་སྔར་ཨ་ཧྥུ་ཀ་ནི་སི་ཐན་ཞི་བདེའི་བསྐྱར་སྐྲུན་གྱི་འགག་རྩའི་དུས་མཚམས་སུ་གནས་ཡོད། དུས་བབ་སྤྱི་ཡོངས་ནས་བརྟན་བརླིང་རྒྱུན་འཁྱོངས་བྱས་པ་དང་། དཔལ་འབྱོར་རིམ་བཞིན་ལེགས་སུ་ཕྱིན་པ། ཕྱི་ཕྱོགས་འགྲོ་འོང་ཉིན་བཞིན་འཁྲུག་ཆ་དོད་པོར་གྱུར་ཡོད། དེ་དང་ཆབས་ཅིག་ཨ་ཧྥུ་ཀ་ནི་སི་ཐན་ལ་མི་ཆོས་དང་། འཕེལ་རྒྱས། འགྲོ་བ་མིའི་ཐོབ་ཐང་། འཇིགས་སྐུལ་ལ་ངོ་རྒོལ་བྱེད་པ། བུད་མེད་ཀྱི་ཁེ་དབང་སོགས་ཁྱབ་ཁོངས་སུ་སྔར་བཞིན་འབུར་ཐོན་གྱི་འགྲན་སློང་འཕྲད་ཡོད། ཀྲུང་གོ་ཕྱོགས་ཀྱིས་རྒྱལ་སྤྱིའི་སྤྱི་ཚོགས་ཀྱིས་ཨ་ཧྥུ་ཀ་ནི་སི་ཐན་གྱི་དུས་བབ་ལ་ཕྱོགས་ཡོངས་དང་ཕྱི་རོལ་ཡུལ་དང་མཐུན་པའི་ལྟ་ཚུལ་བཟུང་སྟེ་ཨ་ཧྥུ་ཀ་ནི་སི་ཐན་སྔ་ཙམ་རྒྱལ་སྤྱིའི་སྤྱི་ཚོགས་སུ་ཕྱིར་ལོག་པ་དང་། ཨ་ཧྥུ་ཀ་ནི་སི་ཐན་མི་དམངས་ཀྱིས་སྔ་ཙམ་བརྟན་བརླིང་གི་འཚོ་བ་སྐྱེལ་རྒྱུར་རྒྱབ་སྐྱོར་བྱ་ཆེད་དགེ་མཚན་ལྡན་པའི་ནུས་པ་འདོན་སྤེལ་བྱ་རྒྱུའི་རེ་སྒུག་བྱེད་ཀྱི་ཡོད།

     ཀེང་ཧྲོང་གིས་ཀྲུང་གོ་ཕྱོགས་ཀྱིས་སྲོལ་རྒྱུན་གྱི་ཞལ་འདེབས་འབུལ་མཁན་དང་ལྷག་པར་དུ་ཨ་ཧྥུ་ཀ་ནི་སི་ཐན་གྱི་ད་ལྟའི་གནས་ཚུལ་ལ་ལོ་རྒྱུས་ཀྱི་འགན་འཁྲི་ཡོད་པའི་རྒྱལ་ཁབ་ཀྱིས་མ་དངུལ་གཏོང་ཤུགས་ཆེ་རུ་བཏང་ནས། ཨ་ཧྥུ་ཀ་ནི་སི་ཐན་མི་དམངས་ཀྱིས་དཀའ་ངལ་སྒྲོལ་རྒྱུར་རོགས་རམ་བྱེད་དགོས་པའི་རེ་འབོད་བྱེད་པ། ཕྱོགས་ཁག་གིས་མུ་མཐུད་ཕྱོགས་གཉིས་དང་ཕྱོགས་མང་པོའི་ས་ཁོངས་མཉམ་ལས་ལམ་སྲོལ་བརྒྱུད། ཨ་ཧྥུ་ཀ་ནི་སི་ཐན་ལ་རང་བདག་འཕེལ་རྒྱས་གཏོང་བའི་ནུས་པ་ཆེ་རུ་གཏོང་བ་དང་རིམ་བཞིན་ས་ཁུལ་དང་འཛམ་གླིང་གི་དཔལ་འབྱོར་ནང་ཞུགས་རྒྱུར་རོགས་རམ་བྱེད་དགོས་པའི་རེ་འབོད་བྱེད་པ། འབྲེལ་ཡོད་རྒྱལ་ཁབ་ཀྱིས་ཨ་ཧྥུ་ཀ་ནི་སི་ཐན་ལ་ཁྲིམས་འགལ་ངང་ཕྱོགས་རྐྱང་གི་བཀག་སྡོམ་བྱས་པ་འཕྲལ་མར་མེད་པ་བཟོས་ནས། ཆ་རྐྱེན་མེད་པའི་སྒོ་ནས་ཨ་ཧྥུ་ཀ་ནི་སི་ཐན་གྱི་ཕྱི་རྒྱལ་གྱི་རྒྱུ་ནོར་བཀག་རྒྱ་ལྷོད་པ་དང་འབྲེལ་ཕྱིར་སྤྲོད་བྱས་ཏེ། ཨ་ཧྥུ་ཀ་ནི་སི་ཐན་གྱི་དངུལ་རྩའི་མ་ལག་བསྐྱར་སྐྲུན་དང་དཔལ་འབྱོར་དང་དམངས་འཚོ་འཕེལ་རྒྱས་གཏོང་རྒྱུར་ཆ་རྐྱེན་བསྐྲུན་རྒྱུའི་རེ་འབོད་བྱས་པ་རེད།

     ཀེང་ཧྲོང་གིས། ཀྲུང་གོ་ཕྱོགས་ཀྱིས་རྒྱལ་སྤྱིའི་སྤྱི་ཚོགས་དང་ཨ་ཧྥུ་ཀ་ནི་སི་ཐན་གྱི་གནས་སྐབས་སྲིད་གཞུང་བར་འབྲེལ་གཏུག་དང་འགྲོ་འོང་བྱེད་ཤུགས་ཆེ་རུ་གཏོང་བ་དང་། བསམ་ཤེས་དང་ཡིད་ཆེས་ཟབ་ཏུ་གཏོང་བ། ཕྱོགས་ཁག་གིས་དོ་ཁུར་བྱེད་པའི་ཐག་གཅོད་བྱེད་ཐབས་ནུས་ལྡན་འཚོལ་བ། ཨ་ཧྥུ་ཀ་ནི་སི་ཐན་གྱི་གནས་སྐབས་སྲིད་གཞུང་གིས་བྱེད་ཐབས་སྤྱད་དེ་བུད་མེད་དང་བྱིས་པ་བུ་མོའི་གཞི་རྩའི་ཁེ་དབང་སྲུང་སྐྱོབ་བྱ་རྒྱུའི་སྐུལ་མ་གཏོང་རྒྱུ་དང་འབྲེལ་ཁྲིད་སྟོན་བྱ་རྒྱུ་བཅས་ལ་རྒྱབ་སྐྱོར་བྱེད་ཀྱི་ཡོད། འཇིགས་སྐུལ་ལ་ངོ་རྒོལ་བྱེད་པའི་གནད་དོན་ཐད་ཚད་གཞི་ཉིས་བརྩེགས་དང་གདམ་གསེས་རང་བཞིན་གྱིས་སྤྱོད་རྒྱུར་ངོ་རྒོལ་མཐའ་གཅིག་ཏུ་བྱེད་པ་དང་། འཇིགས་སྐུལ་ལ་ངོ་རྒོལ་བྱེད་པའི་གནད་དོན་བཀོལ་སྤྱོད་བྱས་ནས་ས་བབ་འཐབ་ཇུས་ལ་ཞབས་འདེགས་ཞུ་རྒྱུར་ངོ་རྒོལ་བྱས་ནས་རྒྱལ་སྤྱིའི་འཇིགས་སྐུལ་ལ་ངོ་རྒོལ་བྱེད་པའི་མཉམ་ལས་ཀྱི་ཁྱོན་ཡོངས་སྲུང་སྐྱོང་ཧུར་ཐག་བྱེད་དགོས།

     ཚེས་7ཉིན་མཉམ་འབྲེལ་རྒྱལ་ཚོགས་ཚོགས་ཆེན་གྱིས་ཨ་ཧྥུ་ཀ་ནི་སི་ཐན་གྱི་དུས་བབ་སྐོར་གྱི་གྲོས་ཆོད་ཅིག་ལ་གྲོས་འཆམ་བྱུང་། ཀྲུང་གོ་དང་། ཨུ་རུ་སུ། རྒྱ་གར། དབྱི་རན་སོགས་རྒྱལ་ཁབ་12ཀྱིས་དབང་ཆ་དོར་བའི་འདེམས་ཤོག་འཕངས་ཡོད་པ་རེད། ཀེང་ཧྲོང་གིས་གཏམ་བཤད་སྤེལ་སྐབས་གྲོས་ཆོད་འཆར་ཟིན་ལ་སྔར་བཞིན་ལེགས་སུ་གཏོང་བའི་བར་སྟོང་ངེས་ཅན་ཞིག་ཡོད་པ་དང་། བསམ་འཆར་གལ་ཆེན་ཁག་ཅིག་དང་ལེན་དང་མངོན་ཐུབ་མེད་པ་བརྗོད།