༄༅།།“སྤུས་ཚད་མཐོ་བའི‘རྒྱུད་གཅིག་ལམ་གཅིག’མཉམ་སྐྲུན་ལ་གྲུབ་འབྲས་དེ་བས་མང་བ་ཐོབ་རྒྱུར་མཉམ་དུ་སྐུལ་འདེད་གཏོང་དགོས”

འདི་ག་ཚགས་པར་གྱི་གསར་འགོད་པ། ཧའོ་རུའེ་རྨིན། ལི་ཤིན་དབྱི།

“ཐུ་ནི་སི་དང་ཀྲུང་གོ་ནི་གྲོགས་པོ་བཟང་པོ་དང་སྤུན་ཟླ་ཡག་པོ་ཡིན་ཞིང་། རྒྱལ་ཁབ་གཉིས་པོའི་མཛའ་གྲོགས་འབྲེལ་བར་ལོ་རྒྱུས་ཡུན་རིང་ལྡན་ཡོད། ན་ནིང་གི་ཟླ་5པར་རྒྱལ་ཁབ་གཉིས་པོའི་བར་འཐབ་ཇུས་རོགས་ཟླའི་འབྲེལ་བ་བཙུགས་ཡོད། ང་ཚོས་དཔལ་འབྱོར་ཚོང་དོན་དང་། ཚན་རྩལ། རིག་གནས་སོགས་ཁྱབ་ཁོངས་སུ་ཀྲུང་གོ་དང་མཉམ་ལས་བྱེད་པར་སྔར་བས་སྐུལ་འདེད་གཏོང་རྒྱུ་དང་། ཀྲུང་གོའི་འབྲེལ་ཡོད་འཕེལ་རྒྱས་ཀྱི་ཉམས་མྱོང་ལ་སློབ་སྦྱོང་བྱ་རྒྱུ་མ་ཟད། ཐུ་ནི་སིའི་དམངས་ཚོགས་དེ་བས་མང་བ་ཀྲུང་གོར་སྤེལ་རེས་ལ་འགྲོ་རྒྱུར་གོ་སྐབས་གཏོད་རྒྱུའི་རེ་བའང་ཡོད”ཅེས་ཐུ་ནི་སིའི་མི་དམངས་ལས་འགུལ་གྱི་སྤྱི་ཁྱབ་ཧྲུའུ་ཅིའི་ལས་རོགས་དང་གསར་འགྱུར་ལས་དོན་གྱི་འགན་འཁུར་བ་ཧོའུ་སའེ་མུའུ·ཧྲ་ཧྥེས་ཉིན་ཤས་གོང་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས་དེ་ལྟར་བརྗོད།

དུས་ཡུན་རིང་པོའི་ནང་། ཐུ་ནི་སིའི་མི་དམངས་ལས་འགུལ་གྱིས་ཀྲུང་གོ་གུང་ཁྲན་ཏང་དབར་གྱི་འབྲེལ་བ་འཕེལ་རྒྱས་ཧུར་ཐག་བཏང་ཡོད། “ཉེ་བའི་ལོ་ཤས་རིང་། ཐུ་ནི་སིའི་མི་དམངས་ལས་འགུལ་དང་ཀྲུང་གོ་གུང་ཁྲན་ཏང་དབར་གྱི་འབྲེལ་བ་སྔར་བས་སྲ་བརྟན་དང་གོང་མཐོར་ཕྱིན་པ་ལས་ང་རང་ལ་སྤོབས་པ་ཆེན་པོ་སྐྱེ་གི་འདུག ང་ཚོས་ཀྲུང་གོར་མི་སྣ་ཐེངས་མང་མངགས་ནས་གསོ་སྦྱོང་ལ་ཞུགས་སུ་བཅུག་ཡོད། མི་མང་པོ་ལོག་ཡོང་རྗེས་གསོ་སྦྱོང་ཐད་གྲུབ་འབྲས་ཆེན་པོ་ཐོབ་བྱུང་ཞེས་ངར་བརྗོད་བྱུང་། ཀྲུང་གོར་གསོ་སྦྱོང་ལ་བསྐྱོད་པ་དེས་ཁོ་ཚོའི་མཐོང་རྒྱ་ཆེ་རུ་དང་ཤེས་ཚད་ཟབ་ཏུ་ཕྱིན་ཡོད”ཅེས་ཧོའུ་སའེ་མུའུ་ཡིས་བརྗོད་ཅིང་། ཁོང་གིས། ཐུ་ནི་སིའི་མི་དམངས་ལས་འགུལ་གྱིས་མུ་མཐུད་ཀྲུང་གོ་གུང་ཁྲན་ཏང་དབར་རྒྱལ་སྐྱོང་སྲིད་འཛིན་གྱི་ཉམས་མྱོང་སྤེལ་རེས་ལ་ཤུགས་སྣོན་བརྒྱབ་སྟེ་ཕན་ཚུན་རྒྱུས་མངའ་ལོན་ཚད་ཆེ་རུ་དང་མི་སྣ་འགྲོ་འོང་ཟབ་ཏུ་གཏོང་གི་ཡིན། “ཏང་གཉིས་དབར་གྱི་འབྲེལ་བ་བཟང་པོས་རྒྱལ་ཁབ་གཉིས་པོའི་སྲོལ་རྒྱུན་གྱི་མཛའ་གྲོགས་རྒྱུན་མཐུད་དང་ཁྱབ་ཁོངས་ཁག་གི་སྤེལ་རེས་མཉམ་ལས་རྒྱུན་ཆད་མེད་པར་ཟབ་ཏུ་གཏོང་བར་ཕན་སླེབས་ཆེ་ཞིང་། ཐུ་ནི་སི་དང་ཀྲུང་གོའི་འབྲེལ་བ་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་གཏོང་ཆེད་སྟོབས་ཤུགས་ལེགས་སྐྱེས་སུ་འབུལ་ཐུབ་པར་ང་ཚོར་ཡིད་ཆེས་ཀྱིས་ཁེངས་ཡོད”ཅེས་བརྗོད།

“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་ནས་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་། གོ་ལ་ཧྲིལ་པོའི་བདེ་འཇགས་ཀྱི་གྲོས་འགོ གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་བཅས་བར་དུ་ཀྲུང་གོས་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་རྒྱུར་སྐུལ་འདེད་ཧུར་ཐག་བཏང་ནས་འཛམ་གླིང་འདི་ཉིད་ཞི་བདེ་དང་། བདེ་འཇགས། དར་རྒྱས། ཡར་ཐོན་བཅས་ཀྱི་འོད་ཟེར་སྟོང་ལྡན་གྱི་ལམ་དུ་བསྐྱོད་པར་སྐུལ་འདེད་ནུས་ལྡན་བཏང་ཡོད། ‘རྒྱུད་གཅིག་ལམ་གཅིག’མཉམ་སྐྲུན་ལས་དཔལ་འབྱོར་འཕེལ་རྒྱས་ཀྱི་གསོན་ཤུགས་འཕེལ་བ་མ་ཟད། མཉམ་སྐྲུན་རྒྱལ་ཁབ་དབར་གྱི་རིག་གནས་སྤེལ་རེས་དང་ཕན་ཚུན་བསམ་ཤེས་བྱེད་ཤུགས་ཀྱང་ཆེ་རུ་ཕྱིན་ཡོད། ‘རྒྱུད་གཅིག་ལམ་གཅིག’མཉམ་སྐྲུན་གྱི་གྲོས་འགོ་དེ་དགའ་བསུ་ཆེན་པོ་ཐོབ་པའི་རྒྱལ་སྤྱིའི་སྤྱི་པའི་ཐོན་རྫས་དང་རྒྱལ་སྤྱིའི་མཉམ་ལས་ལས་སྟེགས་ཤིག་ཏུ་གྱུར་ནས་མཉམ་སྐྲུན་རྒྱལ་ཁབ་དབར་མཉམ་ལས་གཉིས་ཁེ་ཡོང་བར་ཕན་པ་ཐོབ་ཡོད། རྒྱལ་ཁབ་དེ་བས་མང་བ‘རྒྱུད་གཅིག་ལམ་གཅིག’མཉམ་སྐྲུན་གྱི་ཁྱིམ་ཚང་ཆེན་པོའི་ནང་ཞུགས་པ་དང་བསྟུན་ནས་གོ་ལ་ཧྲིལ་པོའི་འཕེལ་རྒྱས་ལ་གོ་སྐབས་དེ་བས་མང་བ་ཐོབ་རྒྱུ་རེད”ཅེས་ཧོའུ་སའེ་མུའུ་ཡིས་བརྗོད།

ཧོའུ་སའེ་མུའུ་ཡིས་ཀྲུང་གོའི་འཕེལ་རྒྱས་ལ་ཡུན་རིང་དོ་ཁུར་བྱེད་ཅིང་། ཀྲུང་གོར་འཚམས་འདྲིར་ཡང་ཐེངས་མང་ཡོང་མྱོང་། ཁོང་གིས། ཀྲུང་གོ་གུང་ཁྲན་ཏང་གི་འགོ་ཁྲིད་འོག ཀྲུང་གོ་སྲིད་གཞུང་གིས་ཚན་རིག་དང་མཐུན་པའི་འཕེལ་རྒྱས་ཀྱི་ཐབས་ལམ་འཆར་འགོད་བྱས་པ་མ་ཟད། འབྲེལ་ཡོད་སྲིད་ཇུས་ལག་བསྟར་དོན་འཁྱོལ་བྱེད་པར་སྐུལ་འདེད་ནུས་ལྡན་ཡང་བཏང་བས། མི་རྣམས་ཀྱིས་དོ་སྣང་བྱེད་འོས་པའི་འཕེལ་རྒྱས་ཀྱི་གྲུབ་འབྲས་ཐོབ་ཡོད། “ཀྲུང་གོ་གུང་ཁྲན་ཏང་གི་འགོ་ཁྲིད་དང་དེ་བཞིན་བརྟན་ལྷིང་གི་ཆབ་སྲིད་དང་སྤྱི་ཚོགས་ཁོར་ཡུག་ལས་དབུལ་སྒྲོལ་འགག་སྒྲོལ་དང་། དཔལ་འབྱོར་འཕེལ་རྒྱས། ཚན་རྩལ་གསར་གཏོད་སོགས་ཁྱབ་ཁོངས་སུ་ཀྲུང་གོར་གཡུར་དུ་ཟ་བའི་གྲུབ་འབྲས་ཐོབ་ཡོད”ཅེས་བརྗོད། ཀྲུང་གོའི་དབུལ་སྒྲོལ་འགག་སྒྲོལ་གྱི་གྲུབ་འབྲས་ཐད“ཀྲུང་གོས་གནད་སྨིན་དབུལ་སྐྱོར་གྱི་སྲིད་ཇུས་བཏོན་ནས་ལེགས་ལྡན་ཐོན་ལས་སྐྱེད་སྲིང་དང་རྨང་གཞིའི་སྒྲིག་བཀོད་ལེགས་སུ་བཏང་བས། དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ཐོབ་པ་དང་། ཕྱོགས་ཡོངས་ནས་འབྱོར་འབྲིང་མངོན་འགྱུར་བྱུང་སྟེ། མི་དམངས་ཀྱི་བདེ་རྩ་ཆེ་རུ་ཕྱིན་ཡོད”ཅེས་ཧོའུ་སའེ་མུའུ་ཡིས་བག་ཆགས་ཟབ་མོས་བརྗོད།

ཧོའུ་སའེ་མུའུ་ཡིས། ཕྱི་འབྲེལ་བཙུགས་ནས་ལོ་60ལྷག་ཙམ་སོང་རིང་། ཐུ་ནི་སི་དང་ཀྲུང་གོ་རྒྱལ་ཁབ་གཉིས་པོས་ཐོག་མཐའ་བར་གསུམ་དུ་ཕན་ཚུན་བརྩི་འཇོག་དང་། འདྲ་མཉམ་གྱི་ལྟ་སྟངས་འཛིན་པ། ཕན་ཚུན་རྒྱབ་སྐྱོར་བཅས་བྱས་ནས་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱིས་སྐྱིད་སྡུག་མཉམ་མྱོང་དང་ཕན་ཚུན་ལྟ་སྐྱོང་བྱེད་པའི་གསོན་ཉམས་དོད་པའི་ལེའུ་བརྩམས་ཡོད། ཉེ་བའི་ལོ་ཤས་རིང་ཐུ་ནི་སིས་ཀྲུང་གོ་ནས་ནང་འདྲེན་བྱས་པའི་བསྡོམས་འབོར་རྒྱུན་ཆད་མེད་པར་མང་དུ་ཕྱིན་པ་དང་། ཀྲུང་གོའི་ཁེ་ལས་ཀྱིས་ཐུ་ནི་སིར་གཉེར་བའི་རྣམ་གྲངས་ཀྱི་གྲངས་འབོར་རྒྱུན་ཆད་མེད་པར་མང་དུ་ཕྱིན་ཡོད། ཀྲུང་གོའི་སྤུས་རྟགས་ཀྱི་རླངས་འཁོར་ལ་ས་གནས་དེ་གའི་ཁྲོམ་རར་དགའ་བསུ་ཆེན་པོ་ཐོབ་ཡོད། “འབྱུང་འགྱུར་རྒྱལ་ཁབ་གཉིས་པོས་འཕྲོད་བསྟེན་དང་། འགྲིམ་འགྲུལ། ལྗང་མདོག་འཕེལ་རྒྱས། སློབ་གསོ་སོགས་ཁྱབ་ཁོངས་ཀྱི་མཉམ་ལས་སྔར་བས་ཟབ་ཏུ་གཏོང་བ་དང་། བཟོ་ལས་དང་ཚན་རྩལ་སོགས་ཁྱབ་ཁོངས་ཀྱི་ཉམས་མྱོང་སྤེལ་རེས་ལ་ཤུགས་སྣོན་བརྒྱབ་སྟེ་སྤུས་ཚད་མཐོ་བའི‘རྒྱུད་གཅིག་ལམ་གཅིག’མཉམ་སྐྲུན་ལ་གྲུབ་འབྲས་དེ་བས་མང་བ་ཐོབ་རྒྱུར་མཉམ་དུ་སྐུལ་འདེད་གཏོང་རྒྱུའི་རེ་བ་ཡོད”ཅེས་བརྗོད།

（སྐལ་མཆོག་གིས་བསྒྱུར། སྤེན་ཚེས་ཞུས）