ཀྲུང་དབྱང་མཁའ་འགྲུལ་དོ་དམ་གཞུང་དོན་ཁང་གིས།
གསར་འགྱུར་སྤེལ་དུས། 【2025ལོའི་ཟླ་ 03ཚེས་17ཉིན། 13:40】 ཡོང་ཁུངས།:མི་དམངས་ཉིན་རེའི་ཚགས་པར། (རྩོམ་སྒྲིག་འགན་འཁུར་པ། མཁའ་འགྲོ།)
ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། ས་གནས་མང་པོ་ཞིག་ཏུ་ཐོན་པའི་མི་མེད་གནམ་གྲུས་དམངས་སྤྱོད་མཁའ་འགྲུལ་གྱི་གནམ་གྲུ་འཕུར་སྐྱོད་ལ་འགོག་རྐྱེན་བཟོས་པའི་གནད་དོན་ལ་དམིགས་ཏེ་དམངས་སྤྱོད་སྐྱེལ་འདྲེན་གནམ་ཐང་དང་དེ་བཞིན་མཐའ་འཁོར་ས་ཁོངས་ཀྱི་བདེ་འཇགས་སྔོན་འགོག་ཚོད་འཛིན་ལས་དོན་ལ་སྔར་བས་ཤུགས་སྣོན་རྒྱག་ཆེད། ཀྲུང་དབྱང་མཁའ་འགྲུལ་དོ་དམ་ཨུ་ཡོན་ལྷན་ཁང་ལ་ཞིབ་བཤེར་ཆོག་མཆན་བྱ་རྒྱུར་ཕུལ་བ་བརྒྱུད། ཉེ་ཆར། ཀྲུང་དབྱང་མཁའ་འགྲུལ་དོ་དམ་ཨུ་ཡོན་ལྷན་ཁང་གཞུང་དོན་ཁང་གིས་ཀྲུང་དབྱང་དང་རྒྱལ་ཁབ་ལས་ཁུངས་དང་དམག་དཔུང་གི་འབྲེལ་ཡོད་ཚན་པ་དང་མཉམ་དུ་ཆེད་དོན་བྱེད་ཐབས་ཞིབ་འཇུག་བྱས་ཏེ་བཀྲམ་ནས་དམངས་སྤྱོད་སྐྱེལ་འདྲེན་གནམ་ཐང་དུ་མི་མེད་གནམ་གྲུས་གནམ་གྲུ་འཕུར་སྐྱོད་ལ་འགོག་རྐྱེན་བཟོ་བར་དོགས་ཟོན་བྱེད་པའི་ལས་དོན་ལ་སྐུལ་འདེད་བཏང་ཡོད།
འདི་ནི་གསར་འགོད་པས་ཚེས་14ཉིན་ཀྲུང་དབྱང་མཁའ་འགྲུལ་དོ་དམ་གཞུང་དོན་ཁང་ནས་ཤེས་རྟོགས་བྱུང་བའི་གནས་ཚུལ་ཞིག་རེད།
ཀྲུང་དབྱང་མཁའ་འགྲུལ་དོ་དམ་གཞུང་དོན་ཁང་གི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན། བཀོད་སྒྲིག་ལ་དམིགས་ཏེ་མི་མེད་གནམ་གྲུས་མཁའ་འགྲུལ་ལ་འགོག་རྐྱེན་བཟོ་བར་དོགས་ཟོན་བྱེད་པའི་ལས་དོན་སྤེལ་བ་དང་། ཀྲུང་དབྱང་མཁའ་འགྲུལ་དོ་དམ་གཞུང་དོན་ཁང་གིས་རྩེ་རིམ་གྱི་སྤྱི་འདོམས་མཐུན་སྦྱོར་ལམ་སྲོལ་འཐུས་སྒོ་ཚང་དུ་གཏོང་བ། སྲིད་ཇུས་དང་ཁྲིམས་སྲོལ་མཐུན་སྦྱོར་ལ་ཤུགས་སྣོན་རྒྱག་པ། རྒྱུན་རྣམ་གྱི་ལྟ་སྐུལ་མཛུབ་ཁྲིད་བྱེད་ཤུགས་ཆེ་རུ་གཏོང་བ། སྲིད་གཞུང་སྡེ་ཚན་གྱི་དབང་འགན་འབྲེལ་བ་ཞིབ་ཚགས་སུ་གཏོང་བ། ས་གནས་སྲིད་གཞུང་གི་མཉམ་འགོག་མཉམ་སྡོམ་ལམ་སྲོལ་འཐུས་སྒོ་ཚང་དུ་གཏོང་བ། མི་མེད་གནམ་གྲུ་ཁྲིམས་འགལ་སྒྲིག་འགལ་ངང་འཕུར་བར་མཉམ་འབྲེལ་ཐོག་རྩད་ཞིབ་ཐག་གཅོད་བཅས་བྱ་རྒྱུ་རེད།