༄༅།།ཞི་ཅིན་ཕིང་གིས་ཀེ་རི་སེའི་གསར་དུ་བསྐོ་གཞག་བྱས་པའི་ཙུང་ཐུང་ཐཱ་སུའུ་ལཱ་སིར་རྟེན་འབྲེལ་གློག་འཕྲིན་བཏང་གནང་བ།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་13ཉིན་གློག་འཕྲིན་འབྱོར་གསལ། ཟླ་3ཚེས་13ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཁང་སི་ཐན་ཏིང་ནོ་སི·ཐཱ་སུའུ་ལཱ་སིར་གློག་འཕྲིན་བཏང་ནས་ཁོང་གིས་ཀེ་རི་སེ་སྤྱི་མཐུན་རྒྱལ་ཁབ་ཀྱི་ཙུང་ཐུང་གི་འགན་བཞེས་པར་རྟེན་འབྲེལ་ཞུས་པ་རེད།

ཞི་ཅིན་ཕིང་གིས། ཀྲུང་གོ་དང་ཀེ་རི་སེར་ལོ་རྒྱུས་ཡུན་རིང་ལྡན་ལ་འོད་སྟོང་འཕྲོ་བའི་རིག་གནས་ཡོད་པ་དང་། རྒྱལ་ཁབ་གཉིས་པོའི་མཛའ་གྲོགས་འབྲེལ་བར་ལོ་རྒྱུས་ཡུལ་རིང་ལྡན་པ། ཕན་ཚུན་རྒྱུས་མངའ་དང་འཆམ་མཐུན་ལྡན་པ་དང་གཉིས་ཁེ་གཉིས་ཕན་གྱི་ཕྱོགས་ཡོངས་ཀྱི་འཐབ་ཇུས་རོགས་ཟླ་ཞིག་རེད། ཉེ་བའི་ལོ་ཤས་རིང་ཕྱོགས་གཉིས་པོས་པི་ལེ་ཨའེ་ཧྥུའུ་སི་གྲུ་ཁའི་རྣམ་གྲངས་ལ་རྒྱུན་མཐུད་སྐུལ་འདེད་གཏོང་བ་དང་། “རྒྱུད་གཅིག་ལམ་གཅིག”མཉམ་སྐྲུན་མཉམ་ལས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་སྟེ། ཀྲུང་གོ་དང་ཀེ་རི་སེའི་ཤེས་དཔལ་ཕན་ཚུན་དཔྱད་གཞིར་འཛིན་པའི་ལྟེ་གནས་དང་ཨ་ཐེན་སི་ཀྲུང་གོའི་གནའ་བོའི་ཤེས་རིག་ཞིབ་འཇུག་ཁང་མཉམ་ལས་འཛུགས་སྐྲུན་བྱེད་པ་ལས་གནའ་བོའི་ཤེས་དཔལ་རྒྱལ་ཁབ་གཉིས་ཀྱི་འཆམ་མཐུན་དང་དུས་རབས་ཀྱི་འགན་འཁྲི་ཁུར་བ་མངོན་ཡོད་ཅེས་གསུངས་པ་རེད།

ཞི་ཅིན་ཕིང་གིས། དེང་གི་འཛམ་གླིང་ལ་ལོ་བརྒྱའི་འགྱུར་ལྡོག་མགྱོགས་མྱུར་འབྱུང་བཞིན་ཡོད་པས། རྒྱལ་ཁབ་ཁག་དབར་སྐྱིད་སྡུག་མཉམ་མྱོང་དང་། ལས་དབང་གཅིག་མཐུན། མཉམ་ལས་གཉིས་ཕན་བཅས་བྱ་རྒྱུ་ནི་གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་གཅོག་པར་བརྒྱུད་དགོས་ངེས་ཀྱི་ལམ་བུ་ཞིག་ཡིན། ངས་ཀྲུང་གོ་དང་ཀེ་རི་སེའི་འབྲེལ་བ་འཕེལ་རྒྱས་གཏོང་རྒྱུར་ཚད་མཐོའི་མཐོང་ཆེན་བྱེད་ཀྱི་ཡོད་ལ། སྐུ་ཞབས་ཙུང་ཐུང་དང་ལྷན་དུ་འབད་བརྩོན་བྱས་ཏེ་སྲོལ་རྒྱུན་མཛའ་གྲོགས་རྒྱུན་མཐུད་ཀྱིས་གཉིས་ཕན་མཉམ་ལས་དང་ཤེས་དཔལ་སྤེལ་རེས་ཀྱི་འབྲེལ་ཐག་ཆེན་པོ་གཉིས་དམ་དུ་གཏོང་བ་དང་། ཀྲུང་གོ་དང་ཀེ་རི་སེའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བའི་ནང་དོན་རྒྱུན་ཆད་མེད་པར་ཕུན་སུམ་ཚོགས་སུ་གཏོང་བ། ཀྲུང་གོ་དང་ཡོ་རོབ་ཀྱི་འབྲེལ་བ་སྐྱོན་བྲལ་ངང་འཕེལ་རྒྱས་རྒྱུན་མཐུད་འགྲོ་རྒྱུར་སྐུལ་འདེད་གཏོང་བ་བཅས་བྱས་ནས་འཛམ་གླིང་ཞི་བདེ་བརྟན་ལྷིང་དང་དར་རྒྱས་གོང་འཕེལ་ཡོང་བར་བློ་གྲོས་དང་སྟོབས་ཤུགས་སྐྱེས་སུ་འབུལ་འདོད་ཡོད་ཅེས་ནན་བཤད་གནང་བ་རེད།

（སྐལ་བཟང་མཆོག་སྐྱིད་ཀྱིས་བསྒྱུར། མཚམས་གཅོད་ཀྱིས་ཞུས）