༄༅།།མྱུར་སྐྱེལ་ཁུག་མ་ལྗང་མདོག་ཅན་དང་། འབོར་འཕྲི་ཅན། འཁོར་རྒྱུག་ཆོག་པ་བཅས་བཀོད་སྒྲིག་བྱས་པ།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་12ཉིན་གློག་འཕྲིན་འབྱོར་གསལ། ཟླ་3ཚེས་12ཉིན་འཚོགས་པའི་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་ཚོགས་འདུའི་ཐོག《〈མྱུར་སྐྱེལ་གནས་སྐབས་ལག་བསྟར་སྲོལ་ཡིག〉ལ་བཟོ་བཅོས་རྒྱག་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གི་གཏན་འབེབས(འཆར་ཟིན)》ལ་གྲོས་ཞིབ་བྱས་ནས་གྲོས་འཆམ་བྱུང་ཞིང་། མྱུར་སྐྱེལ་ཁུག་མ་ལྗང་མདོག་ཅན་དང་། འབོར་འཕྲི་ཅན། འཁོར་རྒྱུག་ཆོག་པ་བཅས་ལ་སྐུལ་མ་བཏང་ནས་ལྗང་མདོག་གི་ཐོན་སྐྱེད་དང་འཚོ་བ་སྐྱེལ་སྟངས་མགྱོགས་མྱུར་ཆགས་རྒྱུ་ཡིན་པ་རེད།

     ཚོགས་འདུའི་ཐོག་བསྟན་དོན། བརྒྱུད་རིམ་ལྡན་པའི་བཅོས་སྐྱོང་དང་མཐུན་སྦྱོར་བཅོས་སྐྱོང་མཐའ་འཁྱོངས་ཀྱིས་མྱུར་སྐྱེལ་ཁེ་ལས་ཀྱི་བྱེད་པོའི་འགན་འཁྲི་བརྟན་དུ་བཏང་སྟེ། ཐོན་སྐྱེད་ཁེ་ལས་དང་། ཚོང་པ། འཛད་སྤྱོད་པ་བཅས་ལ་ཁྲིད་སྟོན་ཚད་ལྡན་དུ་གཏོང་རྒྱུར་ཤུགས་སྣོན་བརྒྱབ་ནས་འཁོར་འབྲེལ་ཧྲིལ་པོ་བཅོས་སྐྱོང་ལ་སྐུལ་འདེད་གཏོང་དགོས། མྱུར་སྐྱེལ་ཁུག་མ་ལྗང་མདོག་ཕྱོགས་སྒྱུར་གྱི་ཕྱོགས་བསྡུས་རང་བཞིན་གྱི་རྒྱབ་སྐྱོར་སྲིད་ཇུས་འཐུས་སྒོ་ཚང་དུ་བཏང་ནས་ཁུག་མ་དང་། ཚུར་བསྡུ། གཙང་འཁྲུ། གཏོང་འདྲེན་སོགས་གཉེར་སྐྱོང་མ་གནས་དམའ་རུ་ནུས་ལྡན་གཏོང་བ་དང་ཕྱོགས་ཁག་གི་ཧུར་སེམས་གང་ལེགས་འཕེལ་བར་བྱས་ནས་ལྗང་མདོག་འཕེལ་རྒྱས་ཀྱི་སྤྱི་ཚོགས་ཀྱི་ཁོར་ཡུག་བཟང་པོ་ཞིག་གཏོད་དགོས།

     ཡོན་ཐུང་འཕེལ་རྒྱས་ཞིབ་འཇུག་ལྟེ་གནས་ཀྱི་ཀྲུའུ་རེན་གཞོན་པ་ཞུས་ཅུན་ཅུན་གྱིས། ད་ཐེངས་ཆེད་དོན་བཟོ་བཅོས་ཀྱི་ལྟེ་བ་ནི་མྱུར་སྐྱེལ་ཁུག་མའི་སྦགས་བཙོག་གནད་དོན་ཐག་གཅོད་བྱས་ཏེ་མྱུར་སྐྱེལ་ཁུག་མ་དེ་བས་ཁོར་ཡུག་སྲུང་སྐྱོང་དང་། དེ་བས་གྲོན་ཆུང་། བསྐྱར་སྤྱོད་བཅས་ཐུབ་པ་བྱེད་ཁར། བསྐུར་མ་མང་པོ་སྒྲིལ་ནས་རྒྱུ་ཆ་འཕྲོ་བརླག་གཏོང་བའི་སྣང་ཚུལ་ཉུང་དུ་བཏང་སྟེ་ཁོར་ཡུག་གི་ཁུར་པོ་ཡང་དུ་གཏོང་རྒྱུ་དེ་ཡིན་པའི་ངོས་འཛིན་བྱེད་ཀྱི་ཡོད་པ་རེད།

     ལས་རིགས་གཅིག་པའི་མི་སྣས། སྲོལ་ཡིག་ལ་བཟོ་བཅོས་བརྒྱབ་པ་དེས་ཁེ་ལས་ཀྱི་ལག་རྩལ་རིམ་སྤོར་ལ་ལྡོག་སྐུལ་ཐེབས་རྒྱུ་ཡིན་པས། མྱུར་སྐྱེལ་ཀུང་སིས་ཁུག་མ་རྒྱག་པའི་བརྒྱུད་རིམ་ལེགས་སུ་གཏོང་བ་དང་ཁོར་ཡུག་སྲུང་སྐྱོང་གི་རྒྱུ་ཆ་སྤྱོད་དགོས་པ་མ་ཟད། དྲ་ཐོག་ཚོང་པ་དང་མཉམ་དུ“ཐོག་མའི་ཁུག་མ་ཐད་བསྐུར”གྱི་བྱེད་སྟངས་ཁྱབ་གདལ་གཏོང་ཆོག་གི་ཡོད། བྱེད་སྟངས་དེས་དུས་ཐུང་ནང་མ་གནས་མཐོ་རུ་འགྲོ་སྲིད་མོད། འོན་ཀྱང་ཕུགས་ལ་བལྟས་ན་ལས་ཆོད་ཆེ་རུ་དང་སྤུས་རྟགས་ཀྱི་གཟུགས་བརྙན་ལེགས་སུ་འགྲོ་ཐུབ། དེ་དང་ཆབས་ཅིག་དེས་འཁོར་འབྲེལ་ཧྲོལ་པོའི་ཁོར་ཡུག་སྲུང་སྐྱོང་གི་འགན་འཁྲི་སྔར་བས་ཁ་གསལ་བཟོས་ནས་ཁུག་མ་ཐོན་སྐྱེད་ཚོང་དུད་ནས་དྲ་ཐོག་ཚོང་དོན་ལས་སྟེགས་དང་། མྱུར་སྐྱེལ་ཀུང་སི། འཛད་སྤྱོད་པ་བཅས་བར་གྱི་ལྷུ་ཚིགས་ཚང་མས་ཁོར་ཡུག་སྲུང་སྐྱོང་གི་འགན་འཁྲི་འཁུར་དགོས་པའི་ངོས་འཛིན་བྱེད་ཀྱི་ཡོད་པ་རེད།

     ཞུས་ཅུན་ཅུན་གྱིས། ད་ཐེངས་ཀྱི་བཟོ་བཅོས་ནི་མྱུར་སྐྱེལ་ལས་རིགས་ཀྱི“ཁོར་ཡུག་སྲུང་སྐྱོང་གི་ཚོད་བགམ”ཞིག་ཡིན་པ་མ་ཟད། འཚོ་བ་སྐྱེལ་སྟངས་ཀྱི་འཕོ་འགྱུར་ཞིག་དེ་བས་ཀྱང་རེད། ཁུག་མ་ཚད་ལྡན་དུ་གཏོང་བ་དང་འཁོར་རྒྱུག་བེད་སྤྱོད་ལ་སྐུལ་མ་གཏོང་བ་དེས་ཐོན་ཁུངས་འཕྲོ་བརླག་འགྲོ་ཚད་ཉུང་དུ་གཏོང་ཐུབ་པ་མ་ཟད། ཁེ་ལས་ཀྱི་གསར་གཏོད་ལའང་སྐུལ་མ་ཐེབས་ནས་མཐར་མྱུར་སྐྱེལ་སྔར་ལས་ལས་ཕྱོད་ཆེ་བ་དང་ཁོར་ཡུག་སྔར་ལས་གཙང་དུ་འགྲོ་ཐུབ་ཅེས་བཤད་པ་རེད།