༄༅།།བོད་ཀྱི་ཕྱིར་གཏོང་ཚོང་དོན་བསྡོམས་འབོར་གྱིས་ལོ་རྒྱུས་ཀྱི་ཟིན་ཐོ་གསར་པ་སླར་ཡང་བཏོད་པ།

འདི་ག་ཚགས་པར་ཁང་དུ་གནས་ཚུལ་འབྱོར་གསལ། བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། 2024ལོའི་དགུན་སྟོད་དུ་བོད་ལྗོངས་ལྷོ་ཁ་གྲོང་ཁྱེར་གྲ་ནང་རྫོང་རྣམ་སྲས་གླིང་གྲོང་ཚོའི་སྡོང་ཆུང་ཀུ་ཤུ་ཏུན་30ལྷག་ཙམ་བླུགས་པའི་ཟོག་འདྲེན་རླངས་འཁོར་གཉིས་སྐྱིད་གྲོང་འགག་སྒོ་བརྒྱུད་ནེ་པ་ལར་དབོར་འགོ་ཚུགས་པ་དང་བསྟུན་ནས། ལྷོ་ཁ་ནས་ཐོན་པའི་ཀུ་ཤུ་ཕྱིར་གཏོང་ཐེངས་དང་པོ་བྱས་ཡོད། ཀུ་ཤུ་ཏུན་30ལྷག་ཙམ་ཕྱིར་གཏོང་བྱས་པ་ལས་ལྗོངས་ཡོངས་ཀྱི་ས་ཁུལ་དང་གྲོང་ཁྱེར་ཁག་ཚང་མས་ཡུལ་ཟོག་ཐོན་རྫས་ཕྱིར་གཏོང་མངོན་འགྱུར་བྱུང་ཡོད།

གསར་འགོད་པར་བོད་རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་གསུམ་པ་ནས་ཤེས་རྟོགས་བྱུང་བར། ན་ནིང་ཟླ་དང་པོ་ནས་བཅུ་གཅིག་བར། རང་སྐྱོང་ལྗོངས་ཀྱི་ཕྱི་ཕྱོགས་ཚོང་དོན་གྱི་ཕྱིར་གཏོང་ནང་འདྲེན་དངུལ་འབོར་སྒོར་དུང་ཕྱུར་112.2ཟིན་ནས་དུས་མཚུངས་ལས་9.4%འཕར་ཡོད། སྔོན་དཔག་བྱས་ན། ལོ་ཧྲིལ་པོའི་ཕྱིར་གཏོང་ནང་འདྲེན་གྱི་ཚོང་དོན་དངུལ་འབོར་སྒོར་དུང་ཕྱུར་120ཟིན་ནས་ཚོང་དོན་བསྡོམས་འབོར་2015ལོ་ཚུན་གྱི་ལོ་རྒྱུས་ཀྱི་ཟིན་ཐོ་གསར་པ་སླར་ཡང་བཏོད་པ་རེད།

ན་ནིང་ཚུན་དུ་རང་ལྗོངས་ཀྱི་རྒྱལ་སྒྲོལ་དྲ་ཐོག་ཚོང་དོན་གྱི་རྒྱལ་ཕྱིའི་མཛོད་ཁང་ལ་ཕྱིར་གཏོང་དང་། ཐད་ཀར་ཕྱིར་གཏོང་། དྲ་ཐོག་ཉོ་སྒྲུབ་ཁྲལ་སྲུང་ནང་འདྲེན་བཅས་ཐོག་མར་མངོན་འགྱུར་བྱུང་བ་དང་། གཞིས་རྩེའི་ཨེ་ཤེ་ཡ་ལྷོ་མའི་དུས་གཏན་མེ་འཁོར་ཐེངས་དང་པོ་ཚོད་ལྟའི་འཁོར་སྐྱོད་བྱས་པ། ཕྱི་རྒྱལ་གྱི་མ་དངུལ་གཏོང་འཐུས་ཀྱི་རྒྱལ་དམངས་ཐོབ་ཐང་སྐོར་གྱི་སྲིད་ཇུས་དང་བྱེད་ཐབས་དོན་འཁྱོལ་ནན་ཏན་བྱས་པ། ཀུ་ཤུ་དང་། རྒུན་འབྲུམ་ཨ་རག ཨར་འདམ། ཤ་མོའི་རིགས་སོགས་ཡུལ་ཟོག་གཅིག་རྗེས་གཉིས་མཐུད་ངང་ཕྱིར་གཏོང་བྱས་ཡོད། རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་དང་རང་སྐྱོང་ལྗོངས་ཚོང་དོན་ཐིང་གི་ཐིང་ཀྲང་གཞོན་པ་བདེ་སྐྱིད་མཚོ་མོས། རང་ལྗོངས་ཀྱི་ལས་རྣམ་གསར་པ་སྐྱེད་སྲིང་བྱས་པར་གྲུབ་འབྲས་རགས་ཙམ་ཐོབ་ཅིང་། བགྲོད་ལམ་གྱི་ནུས་པ་སྔར་བས་མངོན་གསལ་དོད་པ་དང་། ཕྱི་ཕྱོགས་སྤེལ་རེས་སྤུས་འབྲས་ལེགས་གཉེར་བྱུང་བ། མཐའ་དར་དམངས་ཕྱུག་ལག་བསྟར་གཏིང་ཟབ་ཐུབ་པ་བཅས་བྱུང་བས། རང་ལྗོངས་ཀྱི་ཕྱི་ཕྱོགས་ཚོང་དོན་སྤུས་ཚད་མཐོ་བའི་འཕེལ་རྒྱས་དང་ཕྱིར་གཏོང་ཚོང་དོན་བསྡོམས་འབོར་གྱིས་ལོ་རྒྱུས་ཀྱི་ཟིན་ཐོ་གསར་པ་སླར་ཡང་གཏོད་རྒྱུར་སྒུལ་ཤུགས་ཆེན་པོ་བསྣན་ཡོད་ཅེས་གསུངས་པ་རེད།

ཕྱི་ཕྱོགས་སྤེལ་རེས་ཐད། བོད་ཀྱིས་རྒྱལ་ནང་ཚོང་དོན་དང་ཕྱི་ཕྱོགས་ཚོང་དོན་ཁེ་ལས་482སྒྲིག་འཛུགས་ཀྱིས་ཀོང་ཀྲོའུ་ཚོང་འདུས་སོགས་འགྲེམས་ཚོགས་སྣ་ཚོགས་ཐེངས་21ལ་ཞུགས་པ་དང་། ཀྲུང་ནེའི་དཔལ་འབྱོར་ཚོང་དོན་མཐུན་སྦྱོར་ཨུ་ལྷན་གྱི་ཚོགས་འདུ་འཚོགས་ནས་མཉམ་ལས་ཀྱི་ཐུན་མོང་ངོས་འཛིན་ཁག་29བྱུང་བ། ཕྱི་ཕྱོགས་ཚོང་དོན་ཁེ་ལས་27གསར་དུ་བཙུགས་པ། ཕྱི་རྒྱལ་གྱི་མ་འཇོག་ཁེ་ལས་6གསར་འཕར་བྱུང་བ། མ་འཇོག་བསྡོམས་འབོར་ཨ་སྒོར་ཁྲི་4270.80ཟིན་པ་བཅས་རེད།

མཐའ་དར་དམངས་ཕྱུག་ཐད། ཟླ་11པའི་ཟླ་མཇུག་བར། ནེ་པ་ལར་ཕྱོགས་པའི་སྲོལ་རྒྱུན་མཐའ་མཚམས་ཚོང་དོན་ས་ཚིགས་14ཚང་མ་སྒོ་དབྱེ་སླར་གསོ་ཐུབ་ནས་ཉོ་ཚོང་དངུལ་འབོར་སྒོར་ཁྲི་5744.79ཟིན་ཡོད་པ་རེད།

（པད་ཆོས་དང་ལྷག་ཚེས་སྒྱུར་ཞུས་བྱས）