༄༅།།རང་རྒྱལ་གྱིས་བདེ་སྐྱིད་ལྡན་པའི་ཆུ་བོ་དང་མཚོ་འཛུགས་སྐྱོང་ལ་ཕྱོགས་ཡོངས་ནས་སྐུལ་འདེད་བཏང་བ།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་1ཚེས་22ཉིན་གློག་འཕྲིན་འབྱོར་གསལ། ཉེ་ཆར། ཆུ་བེད་པུའུ་སོགས་སྡེ་ཚན་དྲུག་གིས་མཉམ་དུ《ཕྱོགས་ཡོངས་ནས་བདེ་སྐྱིད་ལྡན་པའི་ཆུ་བོ་དང་མཚོ་འཛུགས་སྐྱོང་ལ་སྐུལ་འདེད་གཏོང་རྒྱུའི་སྐོར་གྱི་བསམ་འཆར》བཀྲམ་པའི་ནང་། 2035ལོར་སླེབས་སྐབས་རང་རྒྱལ་གྱི་གཙང་པོ་དང་། ཆུ་བོ། མཚོ་མཚེའུ་བཅས་སྲུང་སྐྱོང་དང་བཅོས་སྐྱོང་གི་ནུས་པ་ཆེ་རུ་དང་ཆུ་ཚད་མངོན་གསལ་དོད་པོས་མཐོ་རུ་བཏང་ནས་ཆུ་བོ་དང་མཚོའི་རྣམ་པ་ཕྱོགས་ཡོངས་ནས་མཐོར་གཏོང་རིམ་སྤོར་བྱས་ཏེ“ཆུ་གཙང་མཚོ་གསལ་དང་། ཆུ་དྭངས་ཉ་བདེ། ངོགས་ལྗང་ཡུལ་མཛེས། གནས་འཕྲོད་ལས་འཚམ། མི་ཆུ་མཉམ་གནས”བཅས་ཀྱི་བདེ་སྐྱིད་ལྡན་པའི་ཆུ་བོ་དང་མཚོ་སྤྱིར་ན་འཛུགས་སྐྱོང་ཐུབ་པ་བྱ་རྒྱུ་ཡིན་པ་བཏོན་ཡོད།

    གོང་གསལ་གྱི་ཆ་འཕྲིན་དག་ནི་ཚེས་22ཉིན་ཆུ་བེད་པུས་འཚོགས་པའི་གསར་འགྱུར་ཡོངས་བསྒྲགས་ཚོགས་འདུ་ནས་གསར་འགོད་པར་ཤེས་རྟོགས་བྱུང་བ་ཞིག་རེད།

    ཆུ་བེད་པུའི་པུའུ་ཀྲང་གཞོན་པ་ཀྲུའུ་ཁྲེང་ཆིང་གིས། བསམ་འཆར་ནང་། ཆུ་བོ་དང་མཚོའི་བདེ་འཇགས་འགན་སྲུང་གི་ཆུ་ཚད་མཐོ་རུ་གཏོང་བ་དང་། ཆུ་བོ་དང་མཚོའི་ཚེ་སྲོག་བདེ་ཐང་སྲུང་སྐྱོང་། ཆུ་བོ་དང་མཚོ་གཙང་ཞིང་མཛེས་པ། ཆུ་བོ་དང་མཚོའི་སྐྱེ་ཁམས་ཐོན་རྫས་ཀྱི་རིན་ཐང་ཕྱོགས་སྒྱུར་ལ་སྐུལ་འདེད་གཏོང་བ། གཙང་པོ་དང་ཆུ་བོའི་རིག་གནས་སྲུང་སྐྱོང་དང་། རྒྱུན་འཛིན། དར་སྤེལ་བཅས་ཕྱོགས་ལྔ་ནས་བདེ་སྐྱིད་ལྡན་པའི་ཆུ་བོ་དང་མཚོ་འཛུགས་སྐྱོང་གི་་ལས་འགན་བཀོད་སྒྲིག་བྱས་ཚུལ་ངོ་སྤྲོད་བྱས་ཤིང་། བསམ་འཆར་ནང་། ཆུ་དཔོན་དང་མཚོ་དཔོན་ལམ་ལུགས་ཀྱི་ནུས་པ་གང་ལེགས་བཏོན་ཏེ་ཆུ་བོ་འབབ་རྒྱུད་ཚན་པར་བྱས་ནས་ཆུའི་གནོད་འཚེ་དང་། ཆུའི་ཐོན་ཁུངས། ཆུའི་སྐྱེ་ཁམས། ཆུའི་ཁོར་ཡུག ཆུའི་རིག་གནས། ཆུ་རྒྱུད་སྲུང་སྐྱོང་བཅས་སྤྱི་འདོམས་སུ་བྱས་ཏེ་ཆུའི་གནོད་འཚེ་བཅོས་སྐྱོང་དང་། ཆུ་སྤྱོད་པའི་ཕན་པ། ཆུ་བོའི་མཛེས་སྡུག་མངོན་པ་བཅས་དང་། སྤུས་ཚད་མཐོ་བའི་ཆུ་བོ་དང་མཚོའི་སྐྱེ་ཁམས་ཁོར་ཡུག་ལ་བརྟེན་ནས་ཆུ་བོ་འབབ་རྒྱུད་ཀྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་བྱེད་དགོས་པ་ཁ་གསལ་བཏོན་ཡོད་ཅེས་བརྗོད།

ཉེ་བའི་ལོ་ཤས་རིང་། ཆུ་བེད་པུའུ་ཡིས་ས་གནས་ཁག་དང་འབྲེལ་ཡོད་སྡེ་ཚན་ཁག་དང་མཉམ་དུ་བདེ་སྐྱིད་ལྡན་པའི་ཆུ་བོ་དང་མཚོ་འཛུགས་སྐྱོང་ལ་སྐུལ་འདེད་ཧུར་ཐག་བཏང་ཡོད། ངོ་སྤྲོད་བྱས་པར་གཞིགས་ན། 2022ལོ་ཚུན་དུ་ཆུ་བེད་སྡེ་ཚན་གྱིས་ནོར་སྲིད་པུའུ་དང་མཉམ་དུ་རྒྱལ་ཡོངས་ཀྱི་ཆུ་བོ་དང་མཚོ་62བདམས་ནས་བདེ་སྐྱིད་ལྡན་པའི་ཆུ་བོ་དང་མཚོ་འཛུགས་སྐྱོང་གི་རྣམ་གྲངས་ལག་ལེན་བསྟར་བ་རེད།