༄༅།།རྒྱལ་ཡོངས་བུད་མེད་མཉམ་འབྲེལ་ལྷན་ཚོགས་ཀྱིས་བུད་མེད་གསར་གསུམ་ཁྱབ་ཁོངས་ལ་དྲོ་སྐྱིད་སྦྱིན་པའི་ལོ་གསུམ་བྱ་སྤྱོད་སྤེལ་འགོ་བཙུགས་པ།

     འདི་ག་ཚགས་པར་ཁང་དུ་པེ་ཅིང་ནས་ཟླ་1ཚེས་21ཉིན་གློག་འཕྲིན་འབྱོར་གསལ། དཔལ་འབྱོར་རྩ་འཛུགས་གསར་པ་དང་། སྤྱི་ཚོགས་རྩ་འཛུགས་གསར་པ། ལས་ཞུགས་ཚོགས་སྤྱི་གསར་པ་སོགས་ཁྱབ་ཁོངས་གསར་པའི་བུད་མེད་མཉམ་འབྲེལ་ལྷན་ཚོགས་ཀྱི་རྩ་འཛུགས་འཛུགས་སྐྱོང་གཏིང་ཟབ་ཏུ་བཏང་ནས“གསར་གསུམ”ཁྱབ་ཁོངས་ཀྱི་བུད་མེད་མང་ཚོགས་ལ་སྣེ་ཁྲིད་དང་ཞབས་ཞུའི་འབྲེལ་གཏུག་བྱེད་ཤུགས་ཆེ་རུ་གཏོང་ཆེད། ཚེས་21ཉིན་རྒྱལ་ཡོངས་བུད་མེད་མཉམ་འབྲེལ་ལྷན་ཚོགས་ཀྱིས་པེ་ཅིང་དུ་བུད་མེད་གསར་གསུམ་ཁྱབ་ཁོངས་ལ་དྲོ་སྐྱིད་སྦྱིན་པའི་ལོ་གསུམ་གྱི་བྱ་སྤྱོད་སྤེལ་འགོ་བཙུགས་ཤིང་། འགོ་ཚུགས་མཛད་སྒོའི་ཐོག་རྒྱལ་ཡོངས་བུད་མེད་མཉམ་འབྲེལ་ལྷན་ཚོགས་དང་། ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་31དང་ཤིན་ཅང་ཐོན་སྐྱེད་འཛུགས་སྐྲུན་པིང་ཐོན་གྱི་བུད་མེད་མཉམ་འབྲེལ་ལྷན་ཚོགས་ཀྱི་བུད་མེད་གསར་གསུམ་ཁྱབ་ཁོངས་ལ་དྲོ་སྐྱིད་སྦྱིན་པའི་རྩ་གཉིས་བཤེར་རྟགས་ཁྱབ་བསྒྲགས་བྱས་པ་དང་། རྩ་གཉིས་བཤེར་རྟགས་བཤེར་ཚེ་སྲིད་ཇུས་ཀྱི་མཛུབ་ཁྲིད་དང་། བཅའ་ཁྲིམས་ཀྱི་རོགས་སྐྱོར། བུད་མེད་ཀྱི་བདེ་ཐང་། ཁྱིམ་ཚང་གི་སློབ་གསོ། མཉེན་སྒྲིག་གྲོགས་སྒྲིག་སོགས་ཀྱི་ཞབས་ཞུ་དང་ཆ་འཕྲིན་ཤེས་རྟོགས་ཐུབ་ཀྱི་ཡོད།

    2024ལོའི་ལོ་མཇུག་བར“གསར་གསུམ”ཁྱབ་ཁོངས་སུ་བུད་མེད་མཉམ་འབྲེལ་ལྷན་ཚོགས་ཀྱི་རྩ་འཛུགས་ཁྲི་53ལྷག་ཙམ་བཙུགས་པར་དཔལ་འབྱོར་གསར་པ་དང་སྤྱི་ཚོགས་རྩ་འཛུགས་གསར་པ་ཁྲི་125ལ་ཁྱབ་ཡོད། ཉིན་ཤས་གོང་རྒྱལ་ཡོངས་བུད་མེད་མཉམ་འབྲེལ་ལྷན་ཚོགས་ཀྱིས《བུད་མེད་གསར་གསུམ་ཁྱབ་ཁོངས་ལ་དྲོ་སྐྱིད་སྦྱིན་པའི་ལོ་གསུམ་གྱི་བྱ་སྤྱོད་ཇུས་གཞི(2025—2027ལོ)》བཀྲམ་ནས། “གསར་གསུམ”ཁྱབ་ཁོངས་ཀྱི་བུད་མེད་སྒྲོག་འགྲེལ་པ་ཁྲི་3གསོ་སྐྱོང་ཧུར་ཐག་བྱེད་པ་དང་། སྡེ་ཁུལ་ཞབས་ཞུ་སོགས་ཀྱི་བུད་མེད་སྤྱི་ཚོགས་རྩ་འཛུགས་3000ལ་གཙོ་གནད་ཐོག་རྒྱབ་སྐྱོར་བྱེད་པ། “གསར་གསུམ”ཁྱབ་ཁོངས་ཀྱི་བུད་མེད་མཉམ་འབྲེལ་ལྷན་ཚོགས་རྩ་འཛུགས་ཀྱི་དཔེ་མཚོན་བརྒྱ་སྔོག་འདོན་གཏིང་ཟབ་བྱེད་པ། བུད་མེད་མཉམ་འབྲེལ་ལྷན་ཚོགས་རྩ་འཛུགས་ཀྱི་སྦྲེལ་ཟམ་ནུས་པ་འདོན་པ། བུད་མེད་མཉམ་འབྲེལ་ལྷན་ཚོགས་ཀྱི་རྩ་འཛུགས་དང་ལས་ཀའི་ཁྱབ་རྒྱ་སྣུར་སྲིང་ནུས་ལྡན་ཐུབ་པར་སྐུལ་འདེད་གཏོང་བ་བཅས་བྱས་ཏེ“གསར་གསུམ”ཁྱབ་ཁོངས་ཀྱི་བུད་མེད་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་རྒྱུན་ཆད་མེད་པར་ཆེ་རུ་གཏོང་དགོས་པའི་བླང་བྱ་བཏོན་ཡོད།