༄༅།།ཀུའེ་ཀྲོའུ་ཡིས“གྲོང་ཚོའི་ལུས་རྩལ་འགྲན་བསྡུར”ལ་རྒྱུན་མཐུད་ཤུགས་སྣོན་བརྒྱབ་པ།

    ཤིན་ཧྭ་གསར་འགྱུར་ཁང་ཀུའེ་དབྱང་ནས་ཟླ་1ཚེས་22ཉིན་གློག་འཕྲིན་འབྱོར་གསལ། “ལོ་གསར་པར། ‘གྲོང་ཚོ་མཉམ་འགྲན’གྱིས་ས་གནས་དང་རྒྱལ་ཁབ་ཀྱི་འཐབ་ཇུས་ལ་ཞབས་འདེགས་ཞུ་བའི་དམིགས་ཚད་ཕྱོགས་སུ་མུ་མཐུད་མདུན་སྐྱོད་བྱས་ནས་འཛད་སྤྱོད་ལ་རོགས་རམ་དང་གྲོང་གསེབ་དར་རྒྱས་སོགས་ཐད་ཀྱི་སྣ་མང་ནུས་པ་སྔར་བས་འདོན་སྤེལ་ཡག་པོ་བྱ་རྒྱུ་རེད” མིག་སྔར་འཚོག་བཞིན་པའི་2025ལོའི་ཀུའེ་ཀྲོའུ་ཞིང་ཆེན་གྱི་ཚོགས་འདུ་གཉིས་ཀྱི་ཐོག ཀུའེ་ཀྲོའུ་ཞིང་ཆེན་མི་དམངས་འཐུས་ཚོགས་ཀྱི་འཐུས་མི་དང་རུང་ཅང་རྫོང་ཨུད་ཀྱི་ཧྲུའུ་ཅི་ཞུས་པོ་ཡིས་ཀུའེ་ཀྲོའུ་ཞིང་ཆེན་སྲིད་གཞུང་གི་ལས་དོན་སྙན་སྒྲོན་ནང“གྲོང་ཚོ་མཉམ་འགྲན”དང“གྲོང་ཚོའི་BA”ཡིས་མཚོན་པའི་ལུས་རྩལ་འགྲན་དོན་བྱེད་སྒོ་མུ་མཐུད་ཡག་པོ་གཉེར་བ་དང་ལུས་རྩལ་འཛད་སྤྱོད་ཀྱི་མི་མངོན་པའི་སྟོབས་ཤུགས་སྔར་བས་འདོན་སྤེལ་བྱེད་དགོས་ལུགས་གླེང་ཡོད་པས་དེས་ང་ལ་སེམས་ཤུགས་ཆེན་པོ་འཕེལ་བྱུང་ཅེས་བརྗོད།

    ཉེ་བའི་ལོ་ཤས་རིང་ཀུའེ་ཀྲོའུ་ཞིང་ཆེན་ཤར་ལྷོའི་མེའོ་རིགས་ཏུང་རིགས་རང་སྐྱོང་ཀྲོའུ་ཐའེ་ཅང་རྫོང་གྱི“གྲོང་ཚོའི་BA”དང་། རུང་ཅང་རྫོང་གི“གྲོང་ཚོ་མཉམ་འགྲན”དང་། ཀུའེ་ཀྲོའུ་ལྷོ་རྒྱུད་པུའུ་དབྱི་རིགས་མེའོ་རིགས་རང་སྐྱོང་ཀྲོའུ་སན་ཏུའུ་ཧྲུའེ་རིགས་རང་སྐྱོང་རྫོང་གི“གྲོང་ཚོའི་རྟ་རྒྱུག”གིས་མཚོན་པའི“གྲོང་ཚོའི་མིང་ཅན”གྱི་ལུས་རྩལ་འགྲན་དོན་བྱེད་སྒོ་གཅིག་རྗེས་གཉིས་མཐུད་ངང་ཐོན་པ་དག་ས་གནས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་གྲོང་གསེབ་དར་རྒྱས་ཀྱི་སྒུལ་ཤུགས་སྟོབས་ཆེན་ཞིག་ཏུ་གྱུར་ཡོད།

    ཞུས་པོ་ཡིས“‘གྲོང་ཚོ་མཉམ་འགྲན’‘གྲོང་ཚོའི་BA’’དང་།‘གྲོང་ཚོའི་རྟ་རྒྱུག’སོགས་“གྲོང་ཚོའི་མིང་ཅན”གྱི་ལུས་རྩལ་འགྲན་དོན་བྱེད་སྒོ་ཆར་རྗེས་ཀྱི་མྱུ་གུ་ལྟར་ཐོན་པའི་རྣམ་པ་དེས་གྲོང་གསེབ་ཀྱི་རིག་གནས་ནང་རྩ་བ་ཚུགས་པའི་ལུས་རྩལ་འགྲན་དོན་བྱེད་སྒོར་མི་མངོན་པའི་སྟོབས་ཤུགས་ཆེན་པོ་ལྡན་པ་དང་སྔར་བས་སྔོག་འདོན་དང་གསོ་སྐྱོང་བྱེད་རིན་ཡོད་པ་ཞིག་ཡིན་པ་གསལ་བཤད་བྱས་ཡོད། ‘གྲོང་ཚོའི་མིང་ཅན’གྱི་ལུས་རྩལ་འགྲན་དོན་བྱེད་སྒོ་དེས་བཟའ་སྡོད་འགྲོ་འགྲུལ་ཉོ་རྩེད་སོགས་ཐད་ཀྱི་འཛད་སྤྱོད་ལ་སྐུལ་འདེད་གཏོང་ཐུབ་པས། འབྱུང་འགྱུར་རིམ་བཞིན‘ཤིང་སྡོང་ཡོད་པ་དང་། ལྡུམ་ཤིང་ལྡན་པ། རྩྭ་ཕྲན་ཡོད་པ྇’བཅས་ཕུན་སུམ་ཚོགས་པའི་སྐྱེ་ཁམས་ཆགས་རྗེས། དཔལ་འབྱོར་དང་སྤྱི་ཚོགས་འཕེལ་རྒྱས་དང་གྲོང་གསེབ་ཁྱོན་ཡོངས་ནས་དར་རྒྱས་ཡོང་བར་སྔར་བས་སྐུལ་མ་ཐེབས་རྒྱུ་རེད་ཅེས་བརྗོད།