༄༅།།སློབ་གསོའི་རྒྱལ་ཁབ“ཆེན་པོ་ནས་སྟོབས་ཆེན་བར”འཕོ་འགྱུར་འགྲོ་བར་སྐུལ་འདེད་གཏོང་དགོས།

    ཧོང་ཁྲའོ།

    ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ཉེ་ཆར་བཀྲམ་པའི《སློབ་གསོའི་རྒྱལ་ཁབ་སྟོབས་ཆེན་འཛུགས་སྐྲུན་གྱི་འཆར་འགོད་རྩ་གནད（2024ལོ་ནས་2035ལོ་བར）》（གཤམ་དུ《རྩ་གནད》ཅེས་བསྡུ་རྒྱུ）ནི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ཁྱབ་བསྒྲགས་དང་ལག་ལེན་བསྟར་བའི་སློབ་གསོའི་བྱ་གཞག་འཕེལ་རྒྱས་གཏོང་བའི་རྩ་འཛིན་རང་བཞིན་གྱི་ཡིག་ཆ་ཞིག་ཡིན་ལ། སློབ་གསོའི་རྒྱལ་ཁབ་སྟོབས་ཆེན་བརྗོད་དོན་གཙོ་བོར་བྱས་པ་དང་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་ལ་ཕྱོགས་ཡོངས་ནས་ཞབས་འདེགས་ཞུ་རྒྱུ་དེ་ལས་འགན་གལ་ཆེན་དུ་བརྩིས་པའི་རྒྱལ་ཁབ་ཀྱི་བྱ་སྤྱོད་འཆར་གཞི་ཐོག་མ་དེའང་རེད།

    སློབ་གསོ་དར་ན་རྒྱལ་ཁབ་དར། སློབ་གསོ་སྟོབས་དང་ལྡན་ན་རྒྱལ་ཁབ་སྟོབས་དང་ལྡན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་སློབ་གསོ་དེ་ཉིད་རྒྱལ་ཁབ་ཀྱི་ཇུས་ཆེན་དང་ཏང་གི་ཇུས་ཆེན་ལ་བརྩི་རྒྱུ་མཐའ་འཁྱོངས་བྱས་ཏེ་སློབ་གསོ་དེང་རབས་ཅན་མགྱོགས་སུ་གཏོང་བ་དང་སློབ་གསོའི་རྒྱལ་ཁབ་སྟོབས་ཆེན་སྐྲུན་པའི་ཐབས་ཇུས་གལ་ཆེན་བཏོན་པ་དང་། ཏང་གི་ཚོགས་ཆེན་བཅུ་དགུ་པར་སློབ་གསོའི་རྒྱལ་ཁབ་སྟོབས་ཆེན་སྐྲུན་པའི་བརྗོད་གཞི་གལ་ཆེན་བཏོན་པ་ནས་ཏང་གི་ཚོགས་ཆེན་ཉི་ཤུ་པའི་ཐོག་2035ལོར་སླེབས་སྐབས་སློབ་གསོའི་རྒྱལ་ཁབ་སྟོབས་ཆེན་སྐྲུན་ཐུབ་པ་བྱེད་པའི་འཐབ་ཇུས་དམིགས་ཚད་བཏོན་པའི་བར། སློབ་གསོའི་རྨང་གཞིའི་རང་བཞིན་དང་། སྔོན་ཁྲིད་རང་བཞིན། སྤྱི་ཡོངས་རང་བཞིན་བཅས་ཀྱི་གནས་བབ་དང་ནུས་པ་སྔར་བས་མངོན་གསལ་དོད་དུ་ཕྱིན་ཡོད། སློབ་གསོའི་རྒྱལ་ཁབ་སྟོབས་ཆེན་སྐྲུན་མགྱོགས་སུ་བཏང་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་ཡོང་བའི་སྔོན་སྤེལ་བྱ་སྤྱོད་གལ་ཆེན་ལག་ལེན་ཡག་པོ་བསྟར་བ་དེས་ཚད་མཐོའི་ཐུན་མོང་གི་ངོས་འཛིན་དང་བྱ་སྤྱོད་ཀྱི་མཉམ་ཤུགས་གཅིག་སྒྲིལ་ཐུབ་ཡོད།

    མི་གང་ཞིག་གསོ་སྐྱོང་བྱེད་པ་དང་། ཇི་ལྟར་གསོ་སྐྱོང་བྱེད་པ། སུའི་ཆེད་དུ་གསོ་སྐྱོང་བྱེད་པ་བཅས་ནི་སློབ་གསོའི་རྩ་བའི་གནད་དོན་ཡིན་ལ། སློབ་གསོའི་རྒྱལ་ཁབ་སྟོབས་ཆེན་སྐྲུན་པའི་ལྟེ་བའི་ཞིབ་འཇུག་བྱ་གཞི་ཞིག་ཀྱང་རེད། 《རྩ་གནད》ལག་ལེན་བསྟར་བ་དང་བསྟུན་ནས་རིམ་ཁག་སློབ་གྲྭ་སྣ་ཚོགས་བློ་སྦྱོང་བསླབ་སྐྱོང་བྱེད་པའི་གཡུལ་ས་གལ་ཆེན་དུ་གྱུར་ཏེ་མི་རིགས་བསྐྱར་དར་གྱི་འགན་འཁྲི་ཆེན་པོ་འཁུར་བའི་དུས་རབས་ཀྱི་མི་གསར་སྐྱོང་བར་རྨང་གཞི་བརྟན་པོ་འདིང་ཐུབ་ངེས་རེད།

    སློབ་གསོའི་རྒྱལ་ཁབ་སྟོབས་ཆེན་སྐྲུན་པར་མི་དམངས་བློ་ཡིད་ཚིམ་པའི་སློབ་གསོ་ཡག་པོ་གཉེར་གང་ཐུབ་བྱེད་དགོས། མི་འབོར་གྱི་འགྱུར་ལྡོག་དང་འཚམ་པའི་རྨང་གཞིའི་སློབ་གསོའི་ཐོན་ཁུངས་སྤྱི་འདོམས་བཀོད་སྒྲིག་གི་ལམ་སྲོལ་འཐུས་སྒོ་ཚང་དུ་གཏོང་བ་དང་། རྨང་གཞིའི་སློབ་གསོའི་སྤུས་ཚད་ལེགས་སུ་དང་རྒྱ་བསྐྱེད་ཀྱི་ལས་གྲྭ་ལག་ལེན་གཏིང་ཟབ་བསྟར་བ། སློབ་ཡོན་མི་དགོས་པའི་སློབ་གསོའི་ཁྱབ་ཁོངས་རིམ་བཞིན་རྒྱ་ཆེར་གཏོང་སྟངས་འཚོལ་ཞིབ་བྱས་པ་སོགས། སློབ་གསོའི་སྤུས་ལེགས་ཐོན་ཁུངས་བཀོད་སྒྲིག་ལེགས་སུ་གཏོང་བའི་བྱེད་ཐབས་རབ་དང་རིམ་པ་བརྒྱུད། 《རྩ་གནད》ནང་མི་དམངས་གོང་དུ་བཀུར་བའི་འདུ་ཤེས་བརྟན་པོར་བསྲུངས་ཏེ་དེ་བས་དྲང་གཞག་དང་སྤུས་ཚད་མཐོ་བའི་སློབ་གསོའི་ཐད་ཀྱི་མི་དམངས་མང་ཚོགས་ཀྱི་རེ་སྒུག་གསར་པར་ལན་ཏན་ཏིག་བསློགས་ཡོད།

     རྒྱལ་ཁབ་ཀྱི་ཇུས་ཆེན་དང་ཏང་གི་ཇུས་ཆེན་ཡིན་པའི་ཆ་ནས། སློབ་གསོའི“ཆེ་ལུགས”ནི་དེའི་མངོན་གསལ་དོད་པའི་འཐབ་ཇུས་ཀྱི་ངོ་བོར་ཐུག་ཡོད། དུས་རབས་གསར་པར་སླེབས་སྐབས“སྤྱི་ཡོངས་གཉིས”ལ་གཞི་ཚུགས་པ་དང་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་ལོ་རྒྱུས་འཕེལ་རིམ་ལ་དམིགས་པས། སློབ་གསོའི་འཐབ་ཇུས་ངེས་གནས་དེ་སྔ་སླེབས་མྱོང་མེད་པའི་མཐོ་ཚད་དུ་མཐོ་རུ་ཕྱིན་ཡོད། 《རྩ་གནད》ནང་རྒྱང་ལྟའི་རང་བཞིན་གྱི་བཀོད་སྒྲིག་བྱས་ཏེ་སློབ་གསོའི་རྒྱལ་ཁབ་སྟོབས་ཆེན་བསྐྲུན་རྒྱུ་དེ་རྒྱལ་ཁབ་ཀྱི་འཕེལ་རྒྱས་འཐབ་ཇུས་སྤྱི་ཡོངས་ནང་བཅུག་ནས་རྩེར་སོན་གྱི་གསར་གཏོད་ཤེས་ལྡན་པ་གསར་རྙེད་དང་གསོ་སྐྱོང་ལམ་སྲོལ་འཐུས་སྒོ་ཚང་དུ་གཏོང་བ་དང་། རྒྱལ་ཁབ་ཀྱི་འཐབ་ཇུས་ཚན་རྩལ་སྟོབས་ཤུགས་སྐྱེད་སྲིང་དང་སྟོབས་ཆེར་གཏོང་བ། སློབ་གསོ་གྲངས་འཛིན་ཅན་ལ་བརྟེན་ནས་འཕེལ་རྒྱས་ཀྱི་འགྲན་ལམ་གསར་པ་གཏོད་པ་སོགས་ལ་དུས་ཚོད་རེའུ་མིག་དང་ལམ་ཐིག་དཔེ་རིས་བཟོས་པ་དེ་ཐོག་ནས། སློབ་གསོ་དང་ཚན་རྩལ་ཤེས་ལྡན་པ་གཞི་གཅིག་སྤྱི་འདོམས་ངང་འཕེལ་རྒྱས་གཏོང་བར་ཕྱོགས་ཡོངས་ནས་སྐུལ་འདེད་གཏོང་བ་དང་རྒྱལ་ཁབ་ཀྱི་གསར་གཏོད་མ་ལག་གི་ནུས་ཕྱོད་ཧྲིལ་པོ་ཆེ་རུ་གཏོང་བའི་རྩེ་རིམ་ཇུས་འགོད་དང་། སློབ་གསོའི་སྟོབས་ཤུགས་ལ་བརྟེན་ནས་རྒྱལ་ཁབ་སྟོབས་འབྱོར་གྱི་རྨང་གཞི་བརྟན་དུ་གཏོང་བའི་འཐབ་ཇུས་ཀྱི་ངེས་གནས་མཚོན་ཡོད།

     སློབ་གསོའི་རྒྱལ་ཁབ་ཆེན་པོ་ནས་སློབ་གསོའི་རྒྱལ་ཁབ་སྟོབས་ཆེན་དུ་འགྱུར་བ་ནི་བརྒྱུད་རིམ་རང་བཞིན་གྱི་འཕོ་འགྱུར་དང་ངོ་བོའི་འགྱུར་ལྡོག་ཅིག་ཡིན་པས། ངེས་པར་དུ་སྒྱུར་བཅོས་གསར་གཏོད་སྒུལ་ཤུགས་སུ་འཛིན་དགོས། 《རྩ་གནད》ནང“གོམ་པ་གཉིས”ཀྱི་འཐབ་ཇུས་བཀོད་སྒྲིག་བཏོན་པ་སྟེ། 2027ལོར་སླེབས་སྐབས་སློབ་གསོའི་རྒྱལ་ཁབ་སྟོབས་ཆེན་སྐྲུན་པར་དུས་མཚམས་རང་བཞིན་གྱི་ཕན་འབྲས་གལ་ཆེན་ཐོན་པར་བྱེད་དགོས་པ་དང་། 2035ལོར་སླེབས་སྐབས་སློབ་གསོའི་རྒྱལ་ཁབ་སྟོབས་ཆེན་སྐྲུན་དགོས། ལས་འགན་དཀའ་ཚེགས་ཆེ་ཞིང་དུས་ཚོད་ཀྱིས་མི་མི་སྒུག་པས། རིམ་ཁག་ཏང་ཨུད་དང་སྲིད་གཞུང་གིས་སློབ་གསོའི་རྒྱལ་ཁབ་སྟོབས་ཆེན་སྐྲུན་པའི་ཆབ་སྲིད་ཀྱི་འགན་འཁྲི་ཏན་ཏིག་ཁུར་ནས་སློབ་གསོའི་རྒྱལ་ཁབ་སྟོབས་ཆེན་མགྱོགས་མྱུར་སྐྲུན་པའི་འགན་འཁྲི་འཁུར་སེམས་དང་། ལས་འགན་སྒྲུབ་སེམས། དགོས་གཏུག་གི་བསམ་པ་བཅས་ཆེ་རུ་གཏོང་དགོས་པ་མ་ཟད། གཞུང་འཁྱོངས་གསར་འབྱེད་ཀྱིས་གསར་གཏོད་དང་འགག་སྒྲོལ་བྱེད་ཕོད་པའི་ངར་ཤུགས་དང་བློ་སྟོབས་ཀྱང་དེ་བས་ཆེ་རུ་གཏོང་དགོས་ཀྱི་ཡོད།