མི་དམངས་དྲ་བ།

༄༅།།བོད་ལྗོངས་ཀྱི་ས་ཡོམ་རྒུད་སྐྱོབ་ལ་རྒྱབ་སྐྱོར་བྱེད། ནོར་སྲིད་པུའུ་ཡིས་ཞིང་ལས་ཐོན་སྐྱེད་ཀྱི་གནོད་འགོག་གེགས་སེལ་རྒུད་སྐྱོབ་མ་དངུལ་སྒོར་ཁྲི་8000འཕྲལ་བསྟུན་ངང་བཏང་།

གསར་འགྱུར་སྤེལ་དུས། 　【2025ལོའི་ཟླ་ 01ཚེས་10ཉིན། 14:15】 ཡོང་ཁུངས།：མི་དམངས་དྲ་བ། （རྩོམ་སྒྲིག་འགན་འཁུར་པ། མཁའ་འགྲོ།）

ཚེས་8ཉིན། གསར་འགོད་པས་ནོར་སྲིད་པུའུ་ནས་ཤེས་རྟོགས་བྱས་པར་གཞིགས་ན། བོད་ལྗོངས་གཞིས་ཀ་རྩེ་གྲོང་ཁྱེར་དིང་རི་རྫོང་གི་ས་ཡོམ་རིམ་པ་6.8བརྒྱབ་ནས་ས་ཁུལ་ཁག་ཅིག་གི་ཞིང་ཁའི་སྒྲིག་བཀོད་དང་། དྲོད་ཁང་། ཕྱུགས་ར་སོགས་ལ་གཏོར་སྐྱོན་ཕོག་པ་དང་། དེ་བཞིན་སྒོ་ཕྱུགས་ཤི་བ་སོགས་ཀྱི་གནས་ཚུལ་ལ་དམིགས་ནས། ནོར་སྲིད་པུའུ་ཡིས་ཞིང་ལས་གྲོང་གསེབ་པུའུ་དང་མཉམ་དུ་མགྱོགས་མྱུར་གནོད་འཚེའི་གནས་ཚུལ་ཞིབ་འཇུག་དང་གེགས་སྐྱོན་དབྱེ་ཞིབ་བྱས་ཏེ། ཚེས་8ཉིན། ཀྲུང་དབྱང་ནོར་སྲིད་ཀྱི་ཞིང་ལས་ཐོན་སྐྱེད་ཀྱི་གནོད་འགོག་རྒུད་སྐྱོབ་མ་དངུལ་སྒོར་ཁྲི་8000འཕྲལ་བསྟུན་ངང་སྔོན་གཏོང་བྱས་ཏེ། བོད་ལྗོངས་ཀྱིས་ས་ཡོམ་གྱི་གནོད་འཚེ་ཕོག་པའི་ཞིང་ལས་ཐོན་སྐྱེད་དང་ཕྱུགས་རིགས་གསོ་སྤེལ་སྒྲིག་བཀོད་ཉམས་གསོ་སོགས་འབྲེལ་ཡོད་རྒུད་སྐྱོབ་ལས་དོན་ཡག་པོ་བྱེད་པར་རྒྱབ་སྐྱོར་བྱས་པ་མ་ཟད། གནོད་འཚེ་ཐེབས་རྗེས་ཀྱི་ཐོན་སྐྱེད་སླར་གསོ་བྱེད་པར་སྨན་ཆས་དང་། འབར་སྣུན། གཟན་ཆས་སོགས་ཉོ་བར་ཁ་གསབ་འོས་འཚམ་སྤྲད་ནས། གནོད་ཁུལ་གྱི་ཞིང་ལས་ཐོན་སྐྱེད་སྒྲིག་ལམ་གང་མགྱོགས་སླར་གསོ་བྱ་རྒྱུར་སྐུལ་འདེད་བཏང་བ་དང་། གནོད་འཚེའི་གྱོང་གུན་ཚད་ཆེས་ཆུང་དུ་གཏོང་རྒྱུ་རེད།