༄༅།།རོགས་སྐྱོབ་དང་འཚོལ་སྐྱོབ་ལས་དོན་དེ་གནོད་འཚེ་ཕོག་པའི་མང་ཚོགས་བཀོད་སྒྲིག་དང་གེགས་རྗེས་བསྐྱར་སྐྲུན་དུ་བསྒྱུར་བ།

འདི་ནི་ཟླ་1ཚེས་8ཉིན། བོད་ལྗོངས་གཞིས་རྩེ་གྲོང་ཁྱེར་གྱིས་དིང་རི་རྫོང་གི“1·07”ས་ཡོམ་གྱི་གནོད་འཚེ་ཕོག་ཚུལ་དང་རོགས་སྐྱོབ་ལས་དོན་སྤེལ་ཚུལ་སྐོར་གྱི་གསར་འགྱུར་ཡོངས་བསྒྲགས་ཚོགས་འདུ་ཐེངས་གཉིས་པ་འཚོག་ཡུལ་ཡིན་པ།

ཤིན་ཧྭ་གསར་འགྱུར་ཁང་ལྷ་ས་ནས་ཟླ་1ཚེས་8ཉིན་གློག་འཕྲིན་འབྱོར་གསལ། ཚེས་8ཉིན། བོད་རང་སྐྱོང་ལྗོངས་འཕྲལ་སྡོམ་དོ་དམ་ཐིང་གི་ཐིང་ཀྲང་ཧུང་ལི་ཡིས། དིང་རི་རྫོང་གི“1·07”ས་ཡོམ་བརྒྱབ་རྗེས་ཀྱི་རོགས་སྐྱོབ་འཚོལ་སྐྱོབ་ལས་དོན་དེ་གནོད་འཚེ་ཕོག་པའི་མང་ཚོགས་བཀོད་སྒྲིག་དང་གེགས་རྗེས་བསྐྱར་སྐྲུན་དུ་བསྒྱུར་ཡོད། གོམ་སྟབས་རྗེས་མར་རང་སྐྱོང་ལྗོངས་ཀྱིས་མུ་མཐུད་ས་ཡོམ་གྱི་གནས་ཚུལ་ལ་ལྟ་ཞིབ་ཚད་ལེན་དང་སྔོན་བརྡ་གཏོང་བར་ཤུགས་སྣོན་རྒྱག་པ་དང་། མུ་མཐུད་ནུས་ཤུགས་ཡོད་རྒུས་འཚོལ་སྐྱོབ་བྱེད་པ། མི་གཅིག་ཀྱང་མི་ལུས་པ་བྱེད་པ། རྨས་མ་སྐྱོབ་བཅོས་ཧུར་ཐག་བྱེད་པ། གནོད་འཚེ་ཕོག་པའི་མང་ཚོགས་བཀོད་སྒྲིག་དང་དགུན་དུས་དྲོད་སྲུང་ལས་དོན་ཡག་པོ་སྒྲུབ་པ། ཞོར་ཐོན་གནོད་འཚེ་གཏན་འགོག་བཅས་བྱས་ནས་གནོད་འཚེའི་གནས་ཚུལ་ལ་ཞིབ་བཤེར་དང་གེགས་རྗེས་བསྐྱར་སྐྲུན་ལས་དོན་ནུས་ཤུགས་ཡོད་རྒུས་མགྱོགས་མྱུར་སྤེལ་རྒྱུ་ཡིན་ཞེས་བརྗོད་པ་རེད།

ཧུང་ལི་ཡིས། གཞིས་རྩེའི་དིང་རི་རྫོང་གི“1·07”ས་ཡོམ་གྱི་གནོད་འཚེ་ཕོག་ཚུལ་དང་རོགས་སྐྱོབ་ལས་དོན་སྤེལ་ཚུལ་སྐོར་གྱི་གསར་འགྱུར་ཡོངས་བསྒྲགས་ཚོགས་འདུ་ཐེངས་གཉིས་པའི་ཐོག མིག་སྔར་གེགས་ཁུལ་གྱི་ལས་དོན་དེ་འཕྲལ་མར་རོགས་སྐྱོབ་ནས་མང་ཚོགས་བཀོད་སྒྲིག་གི་དུས་མཚམས་སུ་སླེབས་པ་མ་ཟད། གྲང་ངར་ཆེ་བའི་དགུན་ཁ་ཡིན་སྟབས་གེགས་ཁུལ་དུ་གསོ་རླུང་དཀོན་པ་དང་། ལམ་ཐག་རིང་བ། རོགས་སྐྱོབ་དཔུང་ཁག་འདང་ངེས་བཅས་ཡོད་པས། གེགས་ཁུལ་ནས་མིན་པའི་དམངས་ཁྲོད་རོགས་སྐྱོབ་རུ་ཁག་སོགས་སྤྱི་ཚོགས་རྩ་འཛུགས་དང་། དང་བླངས་པས་ད་ལྟའི་དུས་མཚམས་སུ་ཞིབ་བཤེར་ཆོག་མཆན་མ་ཐོབ་པར་གེགས་ཁུལ་དུ་སྐྱོད་མི་རུང་ཞེས་བརྗོད་པ་རེད།

གཞིས་རྩེ་གྲོང་ཁྱེར་གྱི་ཧྲེ་ཀྲང་ཝང་ཧྥང་ཧུང་གིས། ས་ཡོམ་བརྒྱབ་པ་ནས་བཟུང་། ནུབ་རྒྱུད་དམག་ཁུལ་གྱི་དཔོན་དམག་དང་། དྲག་ཆས་ཉེན་རྟོག་གཞིས་རྩེ་ཉིང་ལག་རུ་ཁག སྤྱི་བདེ་ལས་བྱེད་ཉེན་རྟོག་པ། རང་སྐྱོང་ལྗོངས་རིམ་ཁག་མེ་ཟོན་རོགས་སྐྱོབ་དཔུང་ཁག འཕྲལ་སྡོམ་རོགས་སྐྱོབ་དཔུང་ཁག ནགས་ཚལ་མེ་ཟོན་སྟོབས་ཤུགས་བཅས་དང་དེ་བཞིན་སྤྱི་ཚོགས་ཀྱི་འཕྲལ་སྡོམ་རོགས་སྐྱོབ་སྟོབས་ཤུགས་མི་ཁྲི་ལྷག་ཙམ་བཏང་ནས་ཡོངས་ཁྱབ་དང་ཁུག་ཆ་མི་ལུས་པར་འཚོལ་སྐྱོབ་བྱས་པས། བསྡོམས་ཉེན་གྱར་མང་ཚོགས་མི་407འཚོལ་སྐྱོབ་ཐུབ་ནས། མི་སྣ་འཚོལ་སྐྱོབ་ཀྱི་ལས་ཀ་སྤྱིར་ན་མཇུག་འགྲིལ་ཡོད་ཅེས་བརྗོད་པ་རེད།

ཝང་ཧྥང་ཧུང་གིས། མིག་སྔའི་བར་གེགས་ཁུལ་དུ་གནས་སྤོ་བཀོད་སྒྲིག་བྱ་ཡུལ་187བཙུགས་ནས་གནོད་འཚེ་ཕོག་པའི་མང་ཚོགས་ཁྲི་4.65གནས་སྤོ་བཀོད་སྒྲིག་བྱས་ཡོད། གཞན་ཡང་། དིང་རི་རྫོང་གི་ཡུལ་སྐོར་བ་484ཚང་མ་གཞིས་རྩེ་གྲོང་ཁྱེར་དུ་ཕྱིར་ལོག་ཟིན་པ་དང་མི་སྣ་ཤི་རྨས་བྱུང་མེད་ཅེས་བརྗོད་པ་རེད།