༄༅།།ལྷ་ས་གོང་དཀར་རྒྱལ་སྤྱིའི་གནམ་ཐང་གི་ལོའི་འགྲུལ་པ་སྐྱེལ་འདྲེན་བྱེད་ཚད་ལས་ལོ་རྒྱུས་ཀྱི་ཟིན་ཐོ་གསར་པ་བཏོད་པ།

ཤིན་ཧྭ་གསར་འགྱུར་ཁང་ལྷ་ས་ནས་གློག་འཕྲིན་འབྱོར་གསལ། ཉེ་ཆར། གསར་འགོད་པས་དམངས་སྤྱོད་མཁའ་འགྲུལ་བོད་རང་སྐྱོང་ལྗོངས་དོ་དམ་ཅུས་ནས་ཤེས་རྟོགས་བྱས་པར་གཞིགས་ན། 2024ལོའི་ཟླ་12ཚེས་30ཉིན་གྱི་ཕྱི་དྲོའི་ཆུ་ཚོད་4དང་སྐར་མ་50ཙམ་ལ་ཀྲུང་གོ་རྒྱལ་སྤྱིའི་མཁའ་འགྲུལ་ཀུང་སིའི་དུས་གཏན་གནམ་གྲུ་CA4420བདེ་འཇགས་ངང་ལྷ་སར་འབྱོར་བ་དང་ཆབས་ཅིག ལྷ་ས་གོང་དཀར་རྒྱལ་སྤྱིའི་གནམ་ཐང་གི་ལོའི་འགྲུལ་པ་སྐྱེལ་འདྲེན་བྱེད་ཚད་མི་ཐེངས་ཁྲི་600ལས་ཐོག་མར་བརྒལ་ནས་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད།

བོད་རང་སྐྱོང་ལྗོངས་ཁོངས་ཀྱི་ལྟེ་བའི་གནམ་ཐང་ཡིན་པའི་ལྷ་ས་གོང་དཀར་རྒྱལ་སྤྱིའི་གནམ་ཐང་ཉེ་བའི་ལོ་ཤས་རིང་འཕེལ་རྒྱས་མྱུར་པོ་བྱུང་ནས་ལོའི་འགྲུལ་པ་སྐྱེལ་འདྲེན་བྱེད་ཚད་རྒྱུན་མཐུད་ངང་འཕར་ཡོད། བསྡོམས་རྩིས་བརྒྱབ་པར་གཞིགས་ན། 2024ལོའི་ཟླ་12ཚེས་30ཉིན་བར། ལྷ་ས་གོང་དཀར་རྒྱལ་སྤྱིའི་གནམ་ཐང་གི་ལོའི་འགྲུལ་པ་སྐྱེལ་འདྲེན་བྱེད་ཚད་མི་ཐེངས་ཁྲི་600ཟིན་པ་ན་ནིང་གི་དུས་མཚུངས་ལས་10%འཕར་བ་དང་། གནམ་གྲུ་ལན་གྲངས་ཁྲི་4.9འཕུར་འབབ་བྱས་པ་ན་ནིང་གི་དུས་མཚུངས་ལས་9.6%འཕར་བ། དངོས་ཟོག་དང་སྐུར་མ་འདོན་འཇུག་བྱེད་ཚད་ཏུན་ཁྲི་4.5ཟིན་པ་དུས་མཚུངས་ལས་9.6%འཕར་ཡོད་པ་རེད།

མཁའ་ལམ་དྲ་རྒྱའི་ཐད་ལྷ་ས་གོང་དཀར་རྒྱལ་སྤྱིའི་གནམ་ཐང་གིས་མཁའ་འགྲུལ་ཀུང་སི་དང་མཐུན་སྦྱོར་ཧུར་ཐག་བྱས་ནས་མཁའ་ལམ་དྲ་རྒྱའི་གྲུབ་ཆ་རྒྱུན་ཆད་མེད་པར་ལེགས་སུ་བཏང་ཞིང་། མིག་སྔར་རིམ་རྩིས་བརྒྱབ་ན་རྒྱལ་ཁབ་ཕྱི་ནང་གི་མཁའ་ལམ་ལམ་ཐིག་143ཤར་གཏོང་ཐུབ་པ་དང་མཁའ་འགྲུལ་ཤར་གཏོང་གྲོང་ཁྱེར་70ཟིན་ནས། རྒྱལ་ཡོངས་ཀྱི་གྲོང་ཁྱེར་གཙོ་བོ་དང་རྒྱལ་སྤྱིའི་གྲོང་ཁྱེར་ཁག་གཅིག་དང་འབྲེལ་མཐུད་ཐུབ་ཡོད།

མཁྲེགས་ཆས་སྒྲིག་བཀོད་ཐད་ལྷ་ས་གོང་དཀར་རྒྱལ་སྤྱིའི་གནམ་ཐང་གིས་རྣམ་གྲངས་གལ་ཆེན་འཛུགས་སྐྲུན་ཕྱོགས་ཡོངས་ནས་མགྱོཌ་སུ་བཏང་ཡོད། 2024ལོའི་ཟླ་7ཚེས་8ཉིན། ལྷ་ས་གོང་དཀར་རྒྱལ་སྤྱིའི་གནམ་ཐང་གི་T1གནམ་ཐང་བབས་ཚུགས་བསྐྱར་སྐྲུན་རྒྱས་སྐྲུན་ལས་གྲྭ་བསྐྲུན་ནས་སྤྱོད་འགོ་ཚུགས་པ་དང་། 2024ལོའི་ཟླ་7ཚེས་11ཉིན། གནམ་ཐང་གི་འགྲུལ་པ་ཞག་སྡོད་ཁང་པ་སྒྱུར་བཀོད་ལེགས་གྲུབ་བྱུང་ལ། 2024ལོའི་ཟླ་9ཚེས་20ཉིན། གནམ་ཐང་གི་གནམ་ལྕོག་གསར་པ་དང་འདབས་ཁང་བསྐྲུན་ནས་སྤྱོད་འགོ་ཚུགས་པ་རེད། （ལྷག་ཚེ་དང་བུ་ཁྲིད་ཀྱིས་སྒྱུར་ཞུས་བྱས）