༄༅།།2024ལོའི་ཀྲུང་གོའི་དྲང་ནུས་ལྡན་པའི་དྲ་རྒྱའི་བརྩམས་ཆོས་རྩེ་གྲ་བསྡུ་བ་དང་འགྲེམས་གཏོང་གི་བྱེད་སྒོ་སྤེལ་འགོ་ཚུགས་པ།

ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་བ་གཞིར་བཟུང་། ཚེས་16ཉིན། ཀྲུང་དབྱང་དྲ་འཕྲིན་གཞུང་དོན་ཁང་གིས་གཙོ་གཉེར་བྱས་པའི་2024ལོའི་ཀྲུང་གོའི་དྲང་ནུས་ལྡན་པའི་དྲ་རྒྱའི་བརྩམས་ཆོས་རྩེ་གྲ་བསྡུ་བ་དང་འགྲེམས་གཏོང་གི་བྱེད་སྒོ་སྤེལ་འགོ་ཚུགས་པ་རེད། བྱེད་སྒོ་སྤེལ་བའི་དམིགས་ཡུལ་ནི་2024ལོའི་ཟླ་1ཚེས་1ཉིན་ནས་ཟླ་12ཚེས་31ཉིན་བར་ཐོན་པའི་དྲ་དམངས་ཀྱི་ཁས་ལེན་ཐོབ་པ་དང་། སྤྱི་ཚོགས་ཀྱི་མོས་པ་ཐོབ་པ། ཤུགས་རྐྱེན་ཆེ་བ་བཅས་ཀྱི་དྲང་ནུས་ལྡན་པའི་དྲ་རྒྱའི་བརྩམས་ཆོས་རྩེ་གྲས་ཁག་གཅིག་བསྡུ་བ་དང་། འདེམས་སྒྲུག འགྲེམས་གཏོང་བཅས་བྱས་ནས། དྲང་ནུས་ཀྱིས་མི་ལ་ལྕག་སྐུལ་དང་། སྐུལ་མ། སྣེ་ཁྲིད་བཅས་བྱེད་པའི་ནུས་པ་གལ་ཆེན་གང་ལེགས་འདོན་རྒྱུ་དེ་རེད།

བྱེད་སྒོར་བླང་བྱ་ཁ་གསལ་བཏོན་དོན། འགྲན་ཞུགས་བརྩམས་ཆོས་ཀྱིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་ལག་བསྟར་དོན་འཁྱོལ་དང་། ཀྲུང་གོ་གསར་པ་དབུ་བརྙེས་ནས་ལོ་75འཁོར་བར་རྟེན་འབྲེལ་ཞུ་བ། རང་རྒྱལ་གྱིས་ཕྱོགས་ཡོངས་ནས་རྒྱལ་སྤྱིའི་དྲ་སྦྲེལ་དང་སྦྲེལ་མཐུད་བྱས་ནས་ལོ་30འཁོར་བ། ཨའོ་མོན་མེས་རྒྱལ་གྱི་པང་དུ་ལོག་ནས་ལོ་25འཁོར་བ། ཕ་རི་སིའི་ཨོ་རྩལ་འགྲན་ཚོགས་སོགས་ལོ་འཁོར་གྱི་བརྗོད་དོན་གཙོ་བོ་གལ་ཆེན་ལ་དམིགས་ཏེ། ཆབ་སྲིད་ཀྱི་ཁ་ཕྱོགས་ཡང་དག་དང་། གླེང་ཕྱོགས་ཡང་དག རིན་ཐང་གི་ལྟ་བ་འཛིན་ཕྱོགས་ཡང་དག་བཅས་མཐའ་འཁྱོངས་བརྟན་པོ་བྱས་ནས། མི་དམངས་ལྟེ་བར་འཛིན་རྒྱུ་མཐའ་འཁྱོངས་བྱེད་དགོས་ཀྱི་ཡོད།