༄༅།།སྡེ་ཚན་གསུམ་གྱིས་མཉམ་དུ་བརྡ་ཐོ་བཀྲམ་ནས་བླང་བྱ་བཏོན་པ། གནམ་ལོ་གསར་ཚེས་དང་དཔྱིད་གསར་དུས་ཆེན་རིང་གི་དམག་བཀུར་ཁྱིམ་སྐྱོང་དང་སྲིད་བཀུར་དམངས་གཅེས་ཀྱི་ལས་དོན་ཡག་པོ་སྒྲུབ་དགོས།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་12ཚེས་16ཉིན་གློག་འཕྲིན་འབྱོར་གསལ། 2025ལོའི་གནམ་ལོ་གསར་ཚེས་དང་དཔྱིད་གསར་དུས་ཆེན་འཆར་ལ་ཉེ་བའི་མཚམས་འདིར། གནམ་ལོ་གསར་ཚེས་དང་དཔྱིད་གསར་དུས་ཆེན་རིང་གི་གཉིས་བཀུར་ལས་དོན་ཡག་པོ་སྒྲུབ་ཆེད། ཉེ་ཆར། དམག་ཞབས་ཐིམ་པའི་དམག་མིའི་ལས་དོན་པུའུ་དང་། ཀྲུང་དབྱང་དམག་ཨུད་ཆབ་སྲིད་ལས་དོན་པུའུ། རྒྱལ་ཡོངས་གཉིས་བཀུར་ལས་དོན་འགོ་ཁྲིད་ཚོགས་ཆུང་གཞུང་དོན་ཁང་བཅས་ཀྱིས་མཉམ་དུ་བརྡ་ཐོ་བཀྲམ་ནས་ས་གནས་ཁག་དང་དཔུང་སྡེ་ཁག་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱེད་པ་དང་། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ཕྱོགས་ཡོངས་ནས་ལག་བསྟར། དམག་སྲིད་དང་དམག་དམངས་མཐུན་སྒྲིལ་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་ལག་བསྟར་གཏིང་ཟབ་བྱས་ནས་དུས་ཆེན་རིང་གི་དམག་བཀུར་ཁྱིམ་སྐྱོང་དང་སྲིད་བཀུར་དམངས་གཅེས་ཀྱི་ལས་དོན་ཏན་ཏིག་བསྒྲུབས་ནས་རང་རེའི་མི་དམངས་ལ་དགའ་ཞེན་དང་རང་རེའི་དམག་དཔུང་ལ་དགའ་ཞེན་གྱི་རྣམ་པ་བཟང་པོ་རྒྱུན་ཆད་མེད་པར་སྲ་བརྟན་དང་འཕེལ་རྒྱས་བཏང་སྟེ་དམག་དམངས་གཅིག་སེམས་གཅིག་སྒྲིལ་ངང་འབད་འབུངས་བྱས་ནས་རྒྱལ་ཁབ་སྟོབས་ཆེན་དང་དམག་དཔུང་སྟོབས་ཆེན་འཛུགས་སྐྲུན་ལ་ལྕག་སྐུལ་གཏོང་དགོས་པའི་བླང་བྱ་བཏོན་ཡོད།

བརྡ་ཐོའི་ནང་། གཉིས་བཀུར་གྱི་དྲིལ་བསྒྲགས་སློབ་གསོར་ཤུགས་སྣོན་བརྒྱབ་ནས་ཐུན་མོང་གི་སྙིང་སྟོབས་དང་སྟོབས་ཤུགས་གཅིག་ཏུ་སྒྲིལ་དགོས་པ་དང་། ས་གནས་ཁག་དང་དཔུང་སྡེ་ཁག་གིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་དང་། ཀྲུང་དབྱང་དམག་ཨུད་ཀྱི་ཆབ་སྲིད་ལས་དོན་ཚོགས་འདུའི་དགོངས་དོན་སློབ་སྦྱོང་དང་ལག་བསྟར་བྱ་རྒྱུ་གོ་སྐབས་སུ་བྱས་ཐོག ཏང་ཨུད་ཀྱི་དམག་དོན་གྲོས་མོལ་ཚོགས་འདུ་དང་། དམག་སྲིད་ཀྱི་བཞུགས་མོལ་ཚོགས་འདུ། གཉིས་བཀུར་ལས་དོན་འགོ་ཁྲིད་ཚོགས་ཆུང་གི་ཚོགས་འདུ་སོགས་དང་ཟུང་འབྲེལ་བྱས་ཏེ། “དམག་སྲིད་དང་དམག་དམངས་མཐུན་སྒྲིལ་བྱ་རྒྱུ་ནི་རང་རེའི་དམག་ལ་རྒྱལ་ཁ་ཐོབ་པའི་ཐབས་མཆོག་ཅིག་ཡིན་པའི”ཆབ་སྲིད་ཀྱི་ནང་དོན་ལ་གོ་བ་གཏིང་ཟབ་ལེན་པ་དང་། “གཉིས་བཀུར་ལས་དོན་གྱི་ལམ་སྲོལ་འཐུས་སྒོ་ཚང་དུ་གཏོང་བའི”སྒྱུར་བཅོས་བཀོད་སྒྲིག་གི་ལག་བསྟར་ཕྱོགས་སྟོན་ཁོང་དུ་གཏིང་ཟབ་ཆུད་པར་བྱས་ནས། དུས་རབས་གསར་པའི་གཉིས་བཀུར་ལས་དོན་གྱི་ཆབ་སྲིད་ཀྱི་འགན་འཁྲི་དང་ལས་འགན་ཡག་པོ་སྒྲུབ་པར་ཤུགས་སྣོན་ཟམ་མི་ཆད་པར་རྒྱག་དགོས། མང་ཚོགས་ཀྱི་དུས་ཆེན་གྱི་རིག་གནས་འཚོ་བ་ཕུན་སུམ་ཚོགས་སུ་གཏོང་རྒྱུ་དང་ཟུང་འབྲེལ་གྱིས། རྣམ་པ་སྣ་ཚོགས་ཀྱི་གཉིས་བཀུར་དྲིལ་བསྒྲགས་དང་དམངས་ཡོངས་ཀྱི་རྒྱལ་སྲུང་སློབ་གསོ་སྤེལ་རྒྱུར་སྤྱི་འདོམས་བྱས་ཏེ། དམག་དམངས་ཀྱིས་ལྟ་འདོད་ལ་ཉན་སྤྲོ་བའི་མཐུན་འབྲེལ་མཉམ་སྤྲོ་དང་རིག་རྩལ་སྐོང་འཁྲབ་སོགས་མང་ཚོགས་རང་བཞིན་གྱི་བྱེད་སྒོ་རྒྱ་ཁྱབ་ཏུ་སྤེལ་ནས། བརྩེ་བ་མཉམ་འདྲེས་དམ་ཟབ་དང་དུས་ཆེན་གྱི་རྣམ་པ་ཟབ་ཏུ་བཏང་སྟེ། གཉིས་བཀུར་གྱི་གཟི་བརྗིད་སྲོལ་རྒྱུན་མི་རབས་ནས་མི་རབས་བར་རྒྱུན་འཛིན་དང་དར་སྤེལ་ཤུགས་ཆེན་གཏོང་བར་སྐུལ་འདེད་གཏོང་དགོས་ཚུལ་བསྟན་ཡོད།

（ཚེ་དབང་ལྷ་མོས་བསྒྱུར། པ་སངས་ཚེ་རིང་གིས་ཞུས）