༄༅།།ཞི་ཅིན་ཕིང་གིས་པར་ཙིར་གྱི་ཙུང་ཐུང་ལུའུ་ལཱ་དང་གྲོས་མོལ་གནང་བ།

ས་གནས་དེ་གའི་དུས་ཚོད་ཟླ་11ཚེས་20ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པ་ཞི་ལི་ཡའི་ཙུང་ཐུང་ལས་ཤག་ལི་མིང་ཕོ་བྲང་དུ་པར་ཙིར་གྱི་ཙུང་ཐུང་ལུའུ་ལཱ་དང་གྲོས་མོལ་གནང་བ།

ས་གནས་དེ་གའི་དུས་ཚོད་ཟླ་11ཚེས་20ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པ་ཞི་ལི་ཡའི་ཙུང་ཐུང་ལས་ཤག་ལི་མིང་ཕོ་བྲང་དུ་པར་ཙིར་གྱི་ཙུང་ཐུང་ལུའུ་ལཱ་དང་གྲོས་མོལ་གནང་ཞིང་། གྲོས་མོལ་མ་གནང་གོང་། ཙུང་ཐུང་ལུའུ་ལཱ་དང་སྐུ་ཟླ་ལུའོ་སང་རེ་ལ་ཡིས་སྤྲོ་སེམས་འཁོལ་པོས་ཞི་ཅིན་ཕིང་ལ་ཕེབས་བསུ་ཞུས་པ་དང་འབྲེལ་ཞི་ཅིན་ཕིང་ལ་དགའ་བསུ་ཞུ་བའི་མཛད་སྒོ་གཟབ་རྒྱས་འཚོགས་པ་རེད།

     འདི་ག་ཚགས་པར་ཁང་དུ་གྲོང་ཁྱེར་པ་ཞི་ལི་ཡ་ནས་ཟླ་11ཚེས་20ཉིན་གློག་འཕྲིན་འབྱོར་གསལ། ས་གནས་དེ་གའི་དུས་ཚོད་ཟླ་11ཚེས་20ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པ་ཞི་ལི་ཡའི་ཙུང་ཐུང་ལས་ཤག་ལི་མིང་ཕོ་བྲང་དུ་པར་ཙིར་གྱི་ཙུང་ཐུང་ལུའུ་ལཱ་དང་གྲོས་མོལ་གནང་བ་རེད། རྒྱལ་ཁབ་གཉིས་པོའི་གཙོ་བདག་གིས་ཀྲུང་གོ་དང་པར་ཙིར་གྱི་འབྲེལ་བའི་ངེས་གནས་དེ་ལག་གདང་སྦྲེལ་ནས་དེ་བས་དྲང་གཞག་གི་འཛམ་གླིང་དང་དེ་བས་རྒྱུན་མཐུད་ཆོག་པའི་སྐར་མའི་གོ་ལའི་ཀྲུང་གོ་དང་པར་ཙིར་གྱི་ལས་དབང་གཅིག་མཐུན་ཚོགས་པ་འཛུགས་པར་རིམ་སྤོར་བྱ་རྒྱུའི་ཁྱབ་བསྒྲགས་གནང་བ་རེད།

    དབྱར་སྟོད་ཀྱི་པ་ཞི་ལི་ཡའི་ནམ་མཁའ་ཧ་ཅང་དྭངས་ཤིང་། ལི་མིང་ཕོ་བྲང་གི་སྤང་ལྗོངས་སྔོ་ཐིང་ངེར་གནས་པ་དང་རྔམ་བརྗིད་ལྡན་པའི་གུས་དམག་450རུ་སྟར་འགྲིག་པོས་ལངས་ནས་ཡོད། རྟ་དམག་120ཡི་སྲུང་སྐྱེལ་འོག་ཞི་ཅིན་ཕིང་བཞུགས་པའི་རླངས་འཁོར་ལི་མིང་ཕོ་བྲང་མདུན་གྱི་ཐང་ཆེན་དུ་འབྱོར།

     ཙུང་ཐུང་ལུའུ་ལཱ་དང་སྐུ་ཟླ་ལུའོ་སང་རེ་ལ་ཡིས་སྤྲོ་སེམས་འཁོལ་པོས་ཞི་ཅིན་ཕིང་ལ་ཕེབས་བསུ་ཞུས་པ་དང་འབྲེལ་ཞི་ཅིན་ཕིང་ལ་དགའ་བསུ་ཞུ་བའི་མཛད་སྒོ་གཟབ་རྒྱས་འཚོགས་པ་རེད།

     དམག་མིའི་རོལ་ཆ་ཚོགས་པས་ཀྲུང་གོ་དང་པར་ཙིར་རྒྱལ་ཁབ་གཉིས་པོའི་རྒྱལ་གླུ་དཀྲོལ་ཞིང་། རྒྱལ་ཁབ་གཉིས་པོའི་གཙོ་བདག་གིས་ལྷན་དུ་གཟབ་སྦྲེང་རུ་ཁག་གི་དམག་རིགས་རྣམ་འབྱེད་ཀྱི་རུ་སྟར་ལ་གཟིགས་པ་རེད། ཀྲུང་གོ་དང་པར་ཙིར་གྱི་བྱིས་པས་རྒྱལ་ཁབ་གཉིས་པོའི་རྒྱལ་དར་གཡུག་གཡུག་བྱས་ནས་ཞི་ཅིན་ཕིང་ལ་སྤྲོ་སེམས་འཁོལ་པོས་དགའ་བསུ་ཞུས་པ་དང་པར་ཙིར་གྱི་སྒྱུ་རྩལ་མཁས་ཅན་གྱིས་རྒྱ་སྐད་ཐོག་ནས《ངའི་མེས་རྒྱལ》ཞེས་པའི་གླུ་གཞས་བཏང་བ་རེད།

     རྒྱལ་ཁབ་གཉིས་པོའི་གཙོ་བདག་གིས་ཁག་སོ་སོར་ཕར་ཕྱོགས་ཀྱི་ཕེབས་རོགས་མི་སྣར་ཕྱག་བཏང་གནང་བ་རེད།

     ཕེབས་བསུའི་མཛད་སྒོ་མཇུག་འགྲིལ་རྗེས་རྒྱལ་ཁབ་གཉིས་པོའི་གཙོ་བདག་གིས་གྲོས་མོལ་གནང་བ་རེད།

     ཞི་ཅིན་ཕིང་གིས་ནན་བཤད་གནང་དོན། དེ་རིང་ང་ཚོས་ཀྲུང་གོ་དང་པར་ཙིར་གྱི་འབྲེལ་བའི་ངེས་གནས་དེ་ལག་གདང་སྦྲེལ་ནས་དེ་བས་དྲང་གཞག་གི་འཛམ་གླིང་དང་དེ་བས་རྒྱུན་མཐུད་ཆོག་པའི་སྐར་མའི་གོ་ལའི་ཀྲུང་གོ་དང་པར་ཙིར་གྱི་ལས་དབང་གཅིག་མཐུན་ཚོགས་པར་རིམ་སྤོར་བྱ་རྒྱུ་མ་ཟད། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དང་པར་ཙིར་གྱི་འཕེལ་རྒྱས་འཐབ་ཇུས་སྦྲེལ་མཐུད་བྱ་རྒྱུ་རེད། འདི་ནི་ཀྲུང་གོ་དང་པར་ཙིར་གྱི་འབྲེལ་བའི་འཕེལ་རྒྱས་ཀྱི་ལོ་རྒྱུས་རང་བཞིན་གྱི་དུས་སྐབས་གཞན་ཞིག་ཡིན་པ་དེ་ལས། རྒྱལ་ཁབ་གཉིས་པོའི་འབྲེལ་བའི་གོ་ལ་ཧྲིལ་པོའི་རང་བཞིན་དང་། འཐབ་ཇུས་རང་བཞིན། ཕུགས་ཀྱི་རང་བཞིན་བཅས་མངོན་ཡོད་ལ། རྒྱལ་ཁབ་གཉིས་པོའི་མི་དམངས་ཀྱི་ཡོངས་ཁྱབ་ཀྱི་རེ་སྒུག་དང་མཐུན་ནས་ཕྱོགས་གཉིས་པོས་རང་སོ་སོའི་དེང་རབས་ཅན་ལ་སྐུལ་འདེད་གཏོང་བར་སྒུལ་ཤུགས་ཀྱི་འདེགས་སྐྱོར་ཐུབ་རྒྱུ་དང་འབྲེལ། ཀྲུང་གོ་དང་པར་ཙིར་གྱིས་ལག་གདང་སྦྲེལ་ནས་རྒྱལ་སྤྱིའི་དྲང་གཞག་དྲང་བདེན་ལ་སྲུང་སྐྱོང་དང་འཛམ་གླིང་གི་ཐུན་མོང་འཕེལ་རྒྱས་ལ་སྐུལ་འདེད་གཏོང་བའི་ཆོད་སེམས་ཀྱང་མངོན་ཡོད། ཀྲུང་གོ་ཕྱོགས་ཀྱིས་པར་ཙིར་ཕྱོགས་དང་མཉམ་དུ་མིའི་རིགས་ཀྱི་མདུན་ལམ་དང་མི་དམངས་ཀྱི་བདེ་སྐྱིད་བློ་ལ་བཅངས་ཏེ་དུས་རབས་གསར་པའི་ཀྲུང་གོ་དང་པར་ཙིར་གྱི་འབྲེལ་བའི་ནང་དོན་རྒྱུན་ཆད་མེད་པར་ཕུན་སུམ་ཚོགས་སུ་བཏང་ནས་ཕན་ཚུན་འདེགས་སྐྱོར་བྱེད་རེས་ཀྱི“ལས་རོགས་ཡག་ཤོས”ཤིག་བྱས་ཏེ་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པ་དང་། དེ་བས་དྲང་གཞག་གི་འཛམ་གླིང་དང་དེ་བས་རྒྱུན་མཐུད་ཆོག་པའི་སྐར་མའི་གོ་ལ་གཏོད་པའི་དམིགས་ཚད་ཀྱི་ཕྱོགས་སུ་རྒྱུན་ཆད་མེད་པར་མདུན་སྐྱོད་ཀྱིས་མིའི་རིགས་ཀྱི་ཞི་བདེ་དང་ཡར་ཐོན་གྱི་བྱ་གཞག་ལ་ལེགས་སྐྱེས་དེ་བས་ཆེ་བ་འབུལ་འདོད་ཡོད།

     ཞི་ཅིན་ཕིང་གིས་འབྱུང་འགྱུར་རྒྱལ་ཁབ་གཉིས་པོའི་འབྲེལ་བ་འཕེལ་རྒྱས་གཏོང་བའི་ཐད་ཕྱོགས་4ཡི་གྲོས་འགོ་བཏོན་པ་སྟེ།

     གཅིག ལས་དབང་གཅིག་མཐུན་བྱས་ནས་འཐབ་ཇུས་ཐད་ཕན་ཚུན་ཡིད་ཆེས་བརྟན་དུ་རྒྱུན་ཆད་མེད་པར་གཏོང་དགོས། བདག་དབང་དང་། བདེ་འཇགས། མངའ་ཁོངས་ས་ཆ་ཆ་ཚང་སོགས་ལྟེ་བའི་ཁེ་ཕན་དང་འབྲེལ་བའི་གནད་དོན་ཐད་ཕན་ཚུན་རྒྱབ་སྐྱོར་མཐའ་གཅིག་ཏུ་བྱས་ནས་ཕན་ཚུན་ཡིད་ཆེས་ཀྱི་འཐབ་ཇུས་རོགས་ཟླ་དང་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་དབར་གྱི་མཐུན་སྒྲིལ་མཉམ་ལས་དང་། གཉིས་ཁེ་གཉིས་ཕན། ཐུན་མོང་འཕེལ་རྒྱས་བཅས་ཀྱི་མིག་དཔེ་གཏོད་དགོས། རིག་གནས་དང་། སློབ་གསོ། གཞོན་ནུ་སོགས་ཁྱབ་ཁོངས་ཀྱི་མི་ཆོས་རིག་གནས་སྤེལ་རེས་ལ་ཤུགས་སྣོན་བརྒྱབ་ནས་ཀྲུང་གོ་དང་པར་ཙིར་གྱི་ལས་དབང་གཅིག་མཐུན་ཚོགས་པའི་དམངས་འདོད་ཀྱི་རྨང་གཞི་བརྟན་དུ་གཏོང་དགོས།

     གཉིས། འཕེལ་རྒྱས་གཅིག་མཐུན་བྱས་ནས་འཕེལ་རྒྱས་ཀྱི་འཐབ་ཇུས་སྦྲེལ་མཐུད་མུ་མཐུད་ཟབ་ཏུ་གཏོང་དགོས། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དང་པར་ཙིར་འཕེལ་རྒྱས་ཀྱི་འཐབ་ཇུས་སྦྲེལ་མཐུད་བྱེད་པའི་ལོ་རྒྱུས་ཀྱི་གོ་སྐབས་ལ་སྟངས་འཛིན་བྱས་ཏེ་དཔལ་འབྱོར་ཚོང་དོན་དང་། རྨང་གཞིའི་སྒྲིག་བཀོད། དངུལ་རྩ། ཚན་རྩལ། ཁོར་ཡུག་སྲུང་སྐྱོང་སོགས་གཙོ་གནད་ཁྱབ་ཁོངས་ཀྱི་མཉམ་ལས་ཟབ་ཏུ་གཏོང་བ་དང་འཇིག་རྟེན་འཕུར་སྐྱོད་དང་། ཞིང་ལས་ཚན་རྩལ། ནུས་རྒྱུ་གཙང་མ་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་རྒྱག་དགོས། ཀྲུང་གོ་ཕྱོགས་ཀྱིས་དབུལ་སྒྲོལ་འགག་སྒྲོལ་དེ་རྒྱལ་སྐྱོང་སྲིད་འཛིན་གྱི་མངོན་གསལ་དོད་པའི་གནས་བབ་ཐོག་བཞག་ནས་པར་ཙིར་ཕྱོགས་ཀྱི“བཀྲེས་ལྟོགས་མེད་པའི”འཆར་གཞིར་རྒྱབ་སྐྱོར་བྱེད་པ་དང་པར་ཙིར་ཕྱོགས་དང་མཉམ་དུ་དབུལ་པོ་ཉུང་གཏོང་གི་མཉམ་ལས་ལ་མུ་མཐུད་ཤུགས་སྣོན་བརྒྱབ་སྟེ་རྒྱལ་ཁབ་གཉིས་པོའི་མི་དམངས་དེ་བས་མཛེས་སྡུག་ལྡན་པའི་འཚོ་བ་སྐྱེལ་ཐུབ་པར་བྱེད་འདོད་ཡོད།

     གསུམ། འགན་འཁྲི་མཉམ་ཁུར་བྱས་ནས་འཛམ་གླིང་གི་ཞི་བདེ་དང་དྲང་བདེན་ལ་སྲུང་སྐྱོང་བྱེད་པར་ཀྲུང་གོ་དང་པར་ཙིར་གྱི་སྟོབས་ཤུགས་མངོན་པར་བྱེད་དགོས། ཕྱོགས་མང་རིང་ལུགས་ངོ་མ་ལག་བསྟར་བྱས་ཏེ་སྐད་ཆ་དྲང་པོ་ཤོད་པ་དང་བྱ་བ་དྲང་གཞག་སྒྲུབ་པ་མཐའ་འཁྱོངས་ཀྱིས་གོ་ལ་ཧྲིལ་པོའི་བཅོས་སྐྱོང་དེ་བས་དྲང་གཞག་དང་ལུགས་མཐུན་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་གཏོང་དགོས། ཀྲུང་གོ་ཕྱོགས་ཀྱིས་པར་ཙིར་གྱི་རྒྱལ་སྤྱིའི་གནས་བབ་དང་ཤུགས་རྐྱེན་ཐེབས་ཤུགས་ལ་ཚད་མཐོའི་མཐོང་ཆེན་བྱེད་པ་དང་རྒྱལ་སྤྱིའི་གར་སྟེགས་ཐོག་པར་ཙིར་གྱིས་ནུས་པ་དེ་བས་ཆེ་བ་འདོན་པར་རྒྱབ་སྐྱོར་བྱ་རྒྱུ་ཡིན་ལ། པར་ཙིར་ཕྱོགས་དང་མཉམ་དུ་མཉམ་འབྲེལ་རྒྱལ་ཚོགས་དང་འབོ་གསེར་རྒྱལ་ཁབ་སོགས་ཕྱོགས་མང་ལམ་སྲོལ་ནང་འབྲེལ་གཏུག་མཐུན་སྦྱོར་ཡོང་བར་ཤུགས་སྣོན་རྒྱག་པ་དང་། པར་ཙིར་གྱིས་སང་ལོར་འབོ་གསེར་རྒྱལ་ཁབ་ཀྱི་ཀྲུའུ་ཞིའི་རྒྱལ་ཁབ་ཀྱི་འགན་འཁུར་རྒྱུའི་ལས་དོན་ལ་རྒྱབ་སྐྱོར་བྱེད་པ། “འབོ་གསེར་ཆེན་པོའི་མཉམ་ལས”ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ཏེ་ཕྱོགས་མང་རིང་ལུགས་མཐའ་འཁྱོངས་དང་གོ་ལ་ཧྲིལ་པོའི་བཅོས་སྐྱོང་འཐུས་སྒོ་ཚང་དུ་གཏོང་བར་འབོ་གསེར་གྱི་སྟོབས་ཤུགས་དེ་བས་ཆེ་བ་འབུལ་འདོད་ཡོད།

     བཞི། སྐྱིད་སྡུག་མཉམ་མྱོང་བྱས་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་ཀྲུང་གོ་དང་པར་ཙིར་གྱི་ལེགས་སྐྱེས་འབུལ་དགོས། འཕེལ་རྒྱས་འགྲོ་བཞིན་པའི་རྒྱལ་ཁབ་ཆེན་པོ་ཡིན་པའི་ཀྲུང་གོ་དང་པར་ཙིར་གྱིས་སྣེ་ཁྲིད་དེ་མཉམ་གྲོས་མཉམ་གླེང་དང་། “གོ་ལ་ཧྲིལ་པོའི་མཉམ་རོགས”ལ་སྐུལ་འདེད་བཏང་ནས་མིའི་རིགས་ཀྱི་མདུན་ལམ་དང་ལས་དབང་དང་འབྲེལ་བ་ཡོད་པའི་གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ནུས་ཤུགས་ཡོད་རྒུས་ཁ་གཏད་གཅོག་དགོས། ལྗང་མདོག་ཕྱོགས་སྒྱུར་དང་། རྒྱུན་མཐུད་ཆོག་པའི་འཕེལ་རྒྱས། གནམ་གཤིས་འགྱུར་ལྡོག་ལ་ཁ་གཏད་གཅོག་པ། མི་ཐབས་རིག་ནུས་བཅོས་སྐྱོང་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་རྒྱག་དགོས། ཀྲུང་གོ་ཕྱོགས་ཀྱིས་པར་ཙིར་གྱིས《མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས》ཀྱི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་ཐེངས་སུམ་ཅུ་པ་ཡག་པོ་འཚོག་རྒྱུར་རྒྱབ་སྐྱོར་བྱེད་འདོད་ཡོད།

     ཞི་ཅིན་ཕིང་གིས་བསྟན་དོན། ལོ་བཅུའི་གོང་ངས་པ་ཞི་ལི་ཡར་ལ་ཏིང་མེ་གླིང་དང་ཅ་ལེ་པིའི་རྒྱལ་ཁབ་ཀྱི་འགོ་ཁྲིད་པ་དང་མཉམ་དུ་ཀྲུང་གོ་དང་ལ་ཏིང་མེ་གླིང་གི་གླེང་སྟེགས་འཛུགས་རྒྱུའི་ཁྱབ་བསྒྲགས་བྱས་ནས་ཀྲུང་གོ་དང་ལ་ཏིང་མེ་གླིང་དབར་གྱི་འབྲེལ་བ་འདྲ་མཉམ་དང་། གཉིས་ཕན། གསར་གཏོད། སྒོ་དབྱེ། དམངས་ཕན་བཅས་ཀྱི་དུས་རབས་གསར་པར་སླེབས་རྒྱུར་སྐུལ་འདེད་བཏང་ཡོད། ཀྲུང་གོ་ཕྱོགས་ཀྱིས་པར་ཙིར་ཕྱོགས་དང་མཉམ་དུ་ཀྲུང་གོ་དང་ལ་ཏིང་མེ་གླིང་གི་གླེང་སྟེགས་མུ་མཐུད་ཡག་པོ་གཉེར་ནས“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དེ་ལ་ཏིང་མེ་གླིང་དང་ཅ་ལེ་པིའི་ས་ཁུལ་གྱི་འཕེལ་རྒྱས་ཀྱི་ལེགས་ཆ་དང་དགོས་མཁོ་དང་སྦྲེལ་མཐུད་སྔར་བས་ཡག་པོ་བྱས་ཏེ། ཀྲུང་གོ་དང་ལ་ཏིང་མེ་གླིང་གི་ལས་དབང་གཅིག་མཐུན་ཚོགས་པ་འཛུགས་པར་གྲུབ་འབྲས་དེ་བས་མང་བ་ཐོབ་རྒྱུར་སྐུལ་འདེད་གཏོང་འདོད་ཡོད།

     ལུའུ་ལཱ་ཡིས་གསུངས་དོན། པར་ཙིར་དང་ཀྲུང་གོ་ནི་ཕན་ཚུན་བརྩི་འཇོག་དང་ཕན་ཚུན་བློས་འགེལ་ཆོག་པའི་གྲོགས་པོ་ཡག་པོ་ཞིག་ཡིན། ཀྲུང་གོ་ནི་པར་ཙིར་གྱི་འཐབ་ཇུས་མཉམ་ལས་རོགས་ཟླ་གལ་ཆེ་ཤོས་དང་ཀྲུང་གོའི་མི་དམངས་ནི་པར་ཙིར་མི་དམངས་ཀྱིས་བློས་འགེལ་ཆོག་པའི་གྲོགས་པོ་ཞིག་རེད། ད་ལོ་ནི་པར་ཙིར་དང་ཀྲུང་གོའི་དབར་ཕྱི་འབྲེལ་བཙུགས་ནས་ལོ་50འཁོར་བའི་ལོ་ཞིག་ཡིན་པ་དང་ཀྲུའུ་ཞི་ཞི་ཅིན་ཕིང་གིས་མཚམས་ཚིགས་གལ་ཆེན་འདིར་སླར་ཡང་པར་ཙིར་ལ་རྒྱལ་དོན་འཚམས་འདྲི་གནང་བར་སྤྲོ་སེམས་འཁོལ་པོས་དགའ་བསུ་ཞུ་རྒྱུ་ཡིན། ད་གིན་དགའ་བསུ་ཞུ་བའི་མཛད་སྒོར་ངས་པར་ཙིར་གྱི་སྒྱུ་རྩལ་མཁས་ཅན་ལ་སྐད་གྲགས་ལྡན་པའི་ཀྲུང་གོའི་གླུ་གཞས《ངའི་མེས་རྒྱལ》ཞེས་པ་གཏོང་དགོས་པ་ཆེད་མངགས་བཀོད་སྒྲིག་བྱས་ནས་ཀྲུང་གོ་ཕྱོགས་ཀྱིས་ན་ནིང་ང་རང་ཀྲུང་གོར་འཚམས་འདྲིར་སྐྱོད་སྐབས་སྤྲོ་སེམས་འཁོལ་པོས་སྣེ་ལེན་ཞུས་པར་ཐུགས་རྗེ་ལེགས་འབུལ་ཞུ་རྒྱུ་དང་འབྲེལ། པར་ཙིར་མི་དམངས་ཀྱིས་ཀྲུང་གོའི་མི་དམངས་ལ་བཅངས་པའི་བརྩེ་སེམས་ཟབ་མོ་མཚོན་པར་བྱ་རྒྱུའང་ཡིན། འདས་ཟིན་པའི་ལོ་50ཡི་རིང་པར་ཙིར་དང་ཀྲུང་གོའི་ཁྱབ་ཁོངས་ཁག་གི་མཉམ་ལས་ལ་གཡུར་ཟའི་གྲུབ་འབྲས་ཐོབ་ཡོད། པར་ཙིར་ཕྱོགས་ཀྱིས་ཀྲུའུ་ཞི་ཞི་ཅིན་ཕིང་གིས་འཚམས་འདྲི་གནང་བ་དེ་འགོ་འཛུགས་ས་གསར་པར་བྱས་ནས་རྒྱལ་ཁབ་གཉིས་པོའི་འབྲེལ་བར་དངོས་དངོས་རྗེན་རྗེན་གྱི་གྲུབ་འབྲས་གསར་པ་དེ་བས་མང་བ་ཐོབ་རྒྱུར་སྐུལ་འདེད་བཏང་སྟེ། དེ་བས་དྲང་གཞག་གི་འཛམ་གླིང་དང་དེ་བས་རྒྱུན་མཐུད་ཆོག་པའི་སྐར་མའི་གོ་ལའི་པར་ཙིར་དང་ཀྲུང་གོའི་ལས་དབང་གཅིག་མཐུན་ཚོགས་པ་ལག་གདང་སྦྲེལ་ནས་འཛུགས་རྒྱུའི་རེ་སྒུག་བྱེད་ཀྱི་ཡོད། པར་ཙིར་གྱིས“མགྱོགས་མྱུར་འཕར་བའི་འཆར་གཞི”དང་། “བཟོ་ལས་གསར་པའི་འཆར་གཞི” “ལྷོ་ཨ་མེ་རི་ཁ་གླིང་གཞི་གཅིག་ཅན་གྱི་ལམ་ཐིག་འཆར་གཞི”སོགས་འཕེལ་རྒྱས་ཀྱི་འཐབ་ཇུས་ལ་སྐུལ་འདེད་ཤུགས་ཆེན་གཏོང་བཞིན་ཡོད། དེ་དག་ཀྲུང་གོ་ཕྱོགས་ཀྱི“རྒྱུད་གཅིག་ལམ་གཅིག”གི་གྲོས་འགོ་དང་ཚད་མཐོའི་གཅིག་མཐུན་བྱས་ནས་ཕྱོགས་གཉིས་པོས་འཕེལ་རྒྱས་ཀྱི་འཐབ་ཇུས་སྦྲེལ་མཐུད་ལ་ཤུགས་སྣོན་བརྒྱབ་སྟེ། པར་ཙིར་གྱི་བཟོ་ལས་ཅན་གསར་པའི་འཕེལ་རིམ་ལ་སྐུལ་འདེད་ཤུགས་ཆེན་གཏོང་བ་དང་ལྷོ་ཨ་མེ་རི་ཁ་གླིང་གཞི་གཅིག་ཅན་འཛུགས་སྐྲུན་ལ་སྐུལ་འདེད་བཏང་ནས་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་མཐུན་སྒྲིལ་མཉམ་ལས་དང་གཉིས་ཁེ་གཉིས་ཕན་གྱི་མིག་དཔེ་གཏོད་དགོས། ཕྱོགས་གཉིས་པོའི་ལས་དོན་ཚོགས་ཆུང་གིས་རྨང་གཞིའི་སྒྲིག་བཀོད་དང་། དངུལ་རྩ། ཐོན་ལས་འཁོར་འབྲེལ། ཚན་རྩལ། སྐྱེ་ཁམས་ཁོར་ཡུག་སྲུང་སྐྱོང་སོགས་གཙོ་གནད་ཁྱབ་ཁོངས་ཀྱི་མཉམ་ལས་ལ་གྲོས་བསྡུར་དང་སྐུལ་འདེད་མགྱོགས་མྱུར་གཏོང་དགོས། ཀྲུང་གོའི་ཁེ་ལས་དེ་བས་མང་བ་པར་ཙིར་དུ་མ་འཇོག་མཉམ་ལས་བྱེད་པར་ཡོང་རྒྱུར་དགའ་བསུ་ཞུ་གི་ཡིན། པར་ཙིར་ཕྱོགས་ཀྱིས་ཀྲུང་གོ་དང་ཕན་ཚུན་སྦྲེལ་མཐུད་དང་ཟོག་འགྲེམས་ཆུ་ཚད་མཐོ་རུ་བཏང་ནས་པར་ཙིར་དང་ཀྲུང་གོ་དང་ལ་ཏིང་མེ་གླིང་དང་ཀྲུང་གོ་ཐུན་མོང་ཐོག་དར་རྒྱས་གོང་འཕེལ་ཡོང་བར་སྐུལ་འདེད་གཏོང་རྒྱུའི་རེ་སྒུག་བྱེད་ཀྱི་ཡོད།

     གྲོས་མོལ་གནང་མཇུག་འགྲིལ་རྗེས་རྒྱལ་ཁབ་གཉིས་པོའི་གཙོ་བདག་གིས《ལག་གདང་སྦྲེལ་ནས་དེ་བས་དྲང་གཞག་གི་འཛམ་གླིང་དང་དེ་བས་རྒྱུན་མཐུད་ཆོག་པའི་སྐར་མའི་གོ་ལའི་པར་ཙིར་དང་ཀྲུང་གོའི་ལས་དབང་གཅིག་མཐུན་ཚོགས་པ་འཛུགས་རྒྱུའི་སྐོར་གྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དང་པར་ཙིར་རྒྱལ་ཕྲན་མཉམ་འབྲེལ་སྤྱི་མཐུན་རྒྱལ་ཁབ་ཀྱི་མཉམ་འབྲེལ་གསལ་བསྒྲགས》ལ་ལྷན་དུ་མཚན་རྟགས་བཀོད་གནང་བ་རེད།

     རྒྱལ་ཁབ་གཉིས་པོའི་གཙོ་བདག་གིས《“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དེ“མགྱོགས་མྱུར་འཕར་བའི་འཆར་གཞི”དང་། “པར་ཙིར་གྱི་བཟོ་ལས་གསར་པའི་འཆར་གཞི” “སྐྱེ་ཁམས་ཕྱོགས་སྒྱུར་འཆར་གཞི” “ལྷོ་ཨ་མེ་རི་ཁ་གླིང་གཞི་གཅིག་ཅན་གྱི་ལམ་ཐིག་འཆར་གཞི”བཅས་དང་སྦྲེལ་མཐུད་བྱ་རྒྱུའི་སྐོར་གྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་སྲིད་གཞུང་དང་པར་ཙིར་རྒྱལ་ཕྲན་མཉམ་འབྲེལ་སྤྱི་མཐུན་རྒྱལ་ཁབ་སྲིད་གཞུང་གི་མཉམ་ལས་འཆར་གཞིར》མཚན་རྟགས་བཀོད་པར་མཉམ་དུ་དཔང་པོ་གནང་བ་རེད།

     འཚམས་འདྲི་གནང་རིང་ཕྱོགས་གཉིས་པོས་ད་དུང་དཔལ་འབྱོར་ཚོང་དོན་དང་། མ་འཇོག ཞིང་ལས། གྲངས་འཛིན་དཔལ་འབྱོར། རྒྱུན་མཐུད་ཆོག་པའི་འཕེལ་རྒྱས། ཚན་རྩལ། མི་ཐབས་རིག་ནུས། གོ་ལ་ཧྲིལ་པོའི་འཕེལ་རྒྱས་མཉམ་ལས་སོགས་ཁྱབ་ཁོངས་ཀྱི་ཕྱོགས་གཉིས་པོའི་མཉམ་ལས་ཡིག་ཆ་ཁག་30ལྷག་ཙམ་ལ་མཚན་རྟགས་བཀོད་གནང་བ་རེད།