༄༅།།ཀྲུང་གོ་སོགས་རྒྱལ་ཁབ་ཀྱིས་བཏོན་པའི་འགོག་རྐྱེན་མེད་པའི་སྒྲིག་བཀོད་འཛུགས་སྐྲུན་གྱི་ཆེད་དོན་གྲོས་ཆོད་ལ་གྲོས་འཆམ་བྱས་པ།

    འདི་ག་ཚགས་པར་ཁང་དུ་གྲོང་ཁྱེར་པེར་ལིན་ནས་ཟླ་10ཚེས་11ཉིན་གློག་འཕྲིན་འབྱོར་གསལ། རི་ནེ་ཝ་ནས་གནས་ཚུལ་སྤེལ་གསལ། ཚེས་10ཉིན་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལས་འཛིན་ལྷན་ཚོགས་ཀྱི་ཚོགས་འདུ་སྐབས་ང་བདུན་པའི་ཐོག་ཀྲུང་གོས་ཁ་མེ་རོང་དང་། ཧོང་ཏུ་ར་སི། ཕ་ཁི་སི་ཐན། ཐུར་ཁེ་སོགས་རྒྱལ་ཁབ་30ཡི་ཚབ་ཞུས་ནས་ཕུལ་བའི་འགོག་རྐྱེན་མེད་པའི་སྒྲིག་བཀོད་འཛུགས་སྐྲུན་གྱིས་མི་ཚང་མར་འགྲོ་བ་མིའི་ཐོབ་ཐང་ལོངས་སུ་སྤྱོད་པར་སྐུལ་འདེད་གཏོང་རྒྱུའི་གྲོས་ཆོད་ལ་གྲོས་མོལ་བྱས་ནས་གྲོས་འཆམ་བྱུང་བ་རེད། དེ་ནི་མཉམ་འབྲེལ་རྒྱལ་ཚོགས་ཀྱིས་ཆེད་དོན་དེའི་ཐད་ཀྱི་གྲོས་ཆོད་ལ་གྲོས་འཆམ་བྱུང་ཐེངས་དང་པོ་ཡིན་པ་རེད།

    ཁུ་པ་དང་། ཏོ་སྨི་ནི་ཁ། པེ་ནི་ན་སོགས་རྒྱལ་ཁབ་མང་པོས་གཏམ་བཤད་སྤེལ་ནས་གྲོས་ཆོད་དེས་ཕྱོགས་ཁག་གིས་འགོག་རྐྱེན་མེད་པའི་སྒྲིག་བཀོད་གནད་དོན་ལ་ངོས་འཛིན་དང་དོ་ཁུར་བྱེད་ཤུགས་ཆེ་རུ་ནུས་ལྡན་གཏོང་བ་དང་འབྲེལ་ཡོད་ཁྱབ་ཁོངས་ཀྱི་རྒྱལ་སྤྱིའི་མཉམ་ལས་ལ་སྐུལ་འདེད་བཏང་ནས་དབང་པོ་སྐྱོན་ཅན་དང་རྒན་རྒོན་སོགས་རིགས་ཁག་གི་ཚོགས་སྤྱི་འདྲ་མཉམ་ངང་སྤྱི་ཚོགས་འཚོ་བའི་ནང་ཞུགས་པ་དང་འགྲོ་བ་མིའི་ཐོབ་ཐང་ལོངས་སུ་སྤྱོད་པར་འགན་ལེན་བྱ་རྒྱུ་རེད། གྲོས་ཆོད་ཀྱིས་འགོག་རྐྱེན་མེད་པའི་སྒྲིག་བཀོད་བྱ་གཞག་གི་མདུན་སྐྱོད་ཁ་ཕྱོགས་གང་ལེགས་མཚོན་ཡོད་པས་རྒྱལ་སྤྱིའི་འགྲོ་བ་མིའི་ཐོབ་ཐང་གི་བྱ་གཞག་སྐྱོན་བྲལ་དང་ཕུགས་ཀྱི་འཕེལ་རྒྱས་ལ་སྐུལ་འདེད་གཏོང་རྒྱུར་ཕན་པ་ཡོད་ཅེས་བརྗོད་པ་རེད། གྲོས་ཆོད་ལ་གྲོས་འཆམ་བྱུང་རྗེས་ཀྱི་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་གི་མཐོ་རིམ་ཀྲོན་ཡོན་གཞུང་དོན་ཁང་དང་དེ་བཞིན་རྒྱལ་ཁབ་མང་པོས་ཀྲུང་གོར་བཀྲ་ཤིས་བདེ་ལེགས་ཞུས་པ་རེད།