༄༅།།གྲོས་མོལ་དམངས་གཙོ་ཕྱོགས་ཡོངས་ནས་འཕེལ་རྒྱས་གཏོང་དགོས།

    འདི་ག་ཚགས་པར་གྱི་དཔྱད་གཏམ་མཁན་གྱིས།

     གྲོས་མོལ་དམངས་གཙོ་ནི་བརྒྱུད་རིམ་ཧྲིལ་པོའི་མི་དམངས་དམངས་གཙོའི་གྲུབ་ཆ་གལ་ཆེན་ཞིག་དང་། རང་རྒྱལ་སྤྱི་ཚོགས་རིང་ལུགས་ཀྱི་དམངས་གཙོ་ཆབ་སྲིད་ལ་དམིགས་སུ་ལྡན་པའི་རྣམ་པ་ཞིག་དང་ཐུན་མོང་མ་ཡིན་པའི་ལེགས་ཆ་ཞིག ཆབ་སྲིད་ཁྱབ་ཁོངས་སུ་ཏང་གི་མང་ཚོགས་ལམ་ཕྱོགས་མངོན་པའི་མཚོན་ཚུལ་གལ་ཆེན་ཞིག་བཅས་རེད། ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་བཙུགས་ནས་ལོ་75འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“གྲོས་མོལ་དམངས་གཙོ་རྒྱ་ཁྱབ་དང་རིམ་པ་མང་བའི་ལམ་ལུགས་ཅན་དུ་འཕེལ་རྒྱས་འགྲོ་བར་རྒྱུན་ཆད་མེད་པར་སྐུལ་འདེད་གཏོང་དགོས”ཞེས་གསུངས་པ་མ་ཟད། གྲོས་མོལ་དམངས་གཙོ་ཕྱོགས་ཡོངས་ནས་འཕེལ་རྒྱས་གཏོང་བར་བཀོད་སྒྲིག་གལ་ཆེན་ཡང་གནང་ཡོད།

    བརྒྱུད་རིམ་ཧྲིལ་པོའི་མི་དམངས་དམངས་གཙོ་འཕེལ་རྒྱས་གཏོང་རྒྱུ་ནི་ཀྲུང་གོའི་ལུགས་ཀྱི་དེང་རབས་ཅན་གྱི་ངོ་བོའི་བླང་བྱ་ཞིག་ཡིན། དུས་རབས་གསར་པ་དང་རྒྱང་ལམ་གསར་པར་བརྒྱུད་རིམ་ཧྲིལ་པོའི་མི་དམངས་དམངས་གཙོའི་ལམ་ལུགས་མ་ལག་དེ་བས་འཐུས་སྒོ་ཚང་དུ་གཏོང་བ་དང་གྲོས་མོལ་དམངས་གཙོའི་ཐུན་མོང་མ་ཡིན་པའི་ལེགས་ཆ་དང་ནུས་པ་གལ་ཆེན་བཏོན་ཏེ་དེ་བས་ལེགས་པའི་སྒོ་ནས་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་ཆེད་མི་སེམས་དང་། ཐུན་མོང་ངོས་འཛིན། བློ་གྲོས། སྟོབས་ཤུགས་བཅས་རྒྱ་ཁྱབ་ངང་གཅིག་སྒྲིལ་བྱེད་དགོས། “ཐོག་མཐའ་བར་གསུམ་དུ་ཡང་དག་པའི་ཆབ་སྲིད་ཀྱི་ཁ་ཕྱོགས་མཐའ་འཁྱོངས་བྱེད་དགོས”“གྲོས་མོལ་དམངས་གཙོའི་མ་ལག་སྤྱི་འདོམས་དང་འཐུས་སྒོ་ཚང་དུ་གཏོང་དགོས”“གྲོས་མོལ་དམངས་གཙོའི་ལམ་སྲོལ་འཐུས་སྒོ་ཚང་དུ་གཏོང་བར་ཤུགས་རྒྱག་དགོས” “གྲོས་མོལ་བྱེད་སྟངས་དང་ལས་སྟེགས་རྒྱུན་ཆད་མེད་པར་རྒྱ་ཆེར་གཏོང་དགོས”“རྣམ་པ་དང་ཆ་རྐྱེན་བཟང་པོ་ཧུར་ཐག་གཏོད་དགོས”ཞེས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གྲོས་མོལ་དམངས་གཙོ་རྒྱ་ཁྱབ་དང་རིམ་པ་མང་བའི་ལམ་ལུགས་ཅན་གྱི་འཕེལ་རྒྱས་ལ་རྒྱུན་ཆད་མེད་པར་སྐུལ་འདེད་གཏོང་བར་བླང་བྱ་ཁ་གསལ་བཏོན་ཏེ་དུས་རབས་གསར་པར་གྲོས་མོལ་དམངས་གཙོ་ཕྱོགས་ཡོངས་ནས་འཕེལ་རྒྱས་གཏོང་བར་འབད་འཐབ་ཀྱི་ཁ་ཕྱོགས་གསལ་སྟོན་གནང་ཡོད་ལ། གཞི་འཛིན་ས་གལ་ཆེན་ཡང་མཁོ་འདོན་གནང་ཡོད།

    ཏང་གི་འགོ་ཁྲིད་ནི་གྲོས་མོལ་དམངས་གཙོ་འཕེལ་རྒྱས་གཏོང་བའི་རྩ་བའི་འགན་ལེན་ཞིག་ཡིན། གྲོས་མོལ་དམངས་གཙོའི་ཐད་ཀྲུང་གོ་གུང་ཁྲན་ཏང་གི་འགོ་ཁྲིད་མཐའ་འཁྱོངས་བྱེད་དགོས་ལ། ཕྱོགས་གང་ཅིའི་ཐད་ཀྱི་དགེ་མཚན་ལྡན་པའི་ནུས་པ་འདོན་པ་དང་། མི་དམངས་ཀྱི་བྱེད་པོའི་གནས་བབ་མཐའ་འཁྱོངས་བྱེད་དགོས་ལ། དམངས་གཙོ་གཅིག་སྡུད་ལམ་ལུགས་ཀྱི་འགོ་ཁྲིད་ལམ་ལུགས་དང་རྩ་འཛུགས་ཀྱི་རྩ་དོན་ལག་བསྟར་ཡང་བྱེད་དགོས་པ། མི་དམངས་དམངས་གཙོའི་རྩ་དོན་མཐའ་འཁྱོངས་བྱེད་དགོས་ལ།

    མཐུན་སྒྲིལ་དང་ཞི་མཐུན་གྱི་བླང་བྱ་ཡང་ལག་བསྟར་བྱས་ཏེ། བརྒྱུད་རིམ་ཧྲིལ་པོའི་མི་དམངས་དམངས་གཙོ་ནི་ཆེས་རྒྱ་ཁྱབ་དང་། ཆེས་དོན་དམ། གོ་ཆོད་ཤོས་བཅས་ཀྱི་དམངས་གཙོ་ཞིག་ཡིན་པའི་དོན་སྙིང་གཙོ་བོ་དང་ཁྱད་ཆོས་མངོན་པ་ངེས་པར་དུ་མཐོང་ཐུབ་པ་བྱེད་དགོས། གྲོས་མོལ་དམངས་གཙོ་ཕྱོགས་ཡོངས་ནས་འཕེལ་རྒྱས་གཏོང་བར། ཏང་གི་ཕྱོགས་ཡོངས་ཀྱི་འགོ་ཁྲིད་མཐའ་འཁྱོངས་དང་བློ་བརྟན་འགྱུར་མེད་ངང་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཆབ་སྲིད་འཕེལ་རྒྱས་ཀྱི་ལམ་བུར་བསྐྱོད་ནས། བརྒྱུད་རིམ་ཧྲིལ་པོའི་མི་དམངས་དམངས་གཙོའི་བླང་བྱ་ཕྱོགས་ཡོངས་ནས་ལག་བསྟར་དང་འཕེལ་རྒྱས་གཏོང་བ་དང་། མང་ཚོགས་ཀྱི་གསར་གཏོད་སྙིང་སྟོབས་ལ་བརྩི་འཇོག་དང་མི་དམངས་ལ་དམ་པོར་བརྟེན་ནས་སྐུལ་འདེད་གཏོང་བ། དམངས་གཙོའི་རྨང་གཞིའི་ཐོག་གི་གཅིག་སྡུད་དང་གཅིག་སྡུད་ཀྱི་མཛུབ་ཁྲིད་འོག་གི་དམངས་གཙོ་ཕན་ཚུན་གཅིག་གྱུར་མཐའ་འཁྱོངས་བྱས་ཏེ་ཁྲིམས་ལྟར་གྲོས་མོལ་དང་གོ་རིམ་ལྡན་པའི་ངང་སྤེལ་ཐུབ་པའི་འགན་ལེན་བྱེད་དགོས། མདུན་སྐྱོད་ཀྱི་ལམ་བུར་ཏང་གི་ཕྱོགས་ཡོངས་ཀྱི་འགོ་ཁྲིད་ཐོག་མཐའ་བར་གསུམ་དུ་མཐའ་འཁྱོངས་དང་ཤུགས་སྣོན་རྒྱག་པ་དང་ཡང་དག་པའི་ཆབ་སྲིད་ཀྱི་ཁ་ཕྱོགས་མཐའ་འཁྱོངས་བྱས་ཚེ། གཞི་ནས་གྲོས་མོལ་དམངས་གཙོའི་དེ་བས་ཆེ་བའི་ལེགས་ཆ་མངོན་ཐུབ་ལ་དེ་བས་ཆེ་བའི་ནུས་པ་འདོན་པར་སྐུལ་འདེད་གཏོང་ཐུབ།

    སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“གྲོས་མོལ་དམངས་གཙོ་ཕྱོགས་ཡོངས་ནས་འཕེལ་རྒྱས་གཏོང་བར་ཏང་ཡོངས་དང་རྒྱལ་ཡོངས་ཀྱི་གོང་འོག་ཚང་མས་ཐུན་མོང་ཐོག་འབད་བརྩོན་དང་། འཚོལ་ཞིབ་ཧུར་ཐག ལག་ལེན་ཕུན་སུམ་ཚོགས་སུ་གཏོང་བ་བཅས་བྱེད་དགོས”ཞེས་ནན་བཤད་གནང་ཡོད། རང་རྒྱལ་གྱི་གྲོས་མོལ་དམངས་གཙོའི་ནང་ཚུད་པའི་སྲིད་ཏང་གི་གྲོས་མོལ་དང་། མི་དམངས་འཐུས་ཚོགས་ཀྱི་གྲོས་མོལ། སྲིད་གཞུང་གི་གྲོས་མོལ། སྲིད་གྲོས་ཀྱི་གྲོས་མོལ། མི་དམངས་ཚོགས་པའི་གྲོས་མོལ། གཞི་རིམ་གྱི་གྲོས་མོལ། སྤྱི་ཚོགས་རྩ་འཛུགས་ཀྱི་གྲོས་མོལ་བཅས་ནི་དཀྱུས་གཅིག་ཏུ་འབྲེལ་བའི་གོང་བུ་ཞིག་ཡིན་པ་ངེས་པར་དུ་ཤེས་རྟོགས་གཏིང་ཟབ་ཐུབ་པར་བྱེད་དགོས། གྲོས་མོལ་དམངས་གཙོའི་མ་ལག་སྤྱི་འདོམས་དང་འཐུས་སྒོ་ཚང་དུ་གཏོང་བར། གྲོས་མོལ་ཐབས་ལམ་མི་འདྲ་བའི་ཁྱད་ཆོས་དང་དོན་དངོས་ལ་གཞིགས་ཏེ། རང་རང་གི་ཐུན་མོང་མ་ཡིན་པའི་ནུས་པ་འདོན་དགོས་ལ། གྲོས་མོལ་ཐབས་ལམ་སྣ་ཚོགས་ཀྱི་མཐུན་སྦྱོར་གཞོགས་འདེགས་ལའང་ཤུགས་སྣོན་བརྒྱབ་སྟེ་དམིགས་ཡུལ་གཅིག་གྱུར་དང་མཉམ་ཤུགས་ཆགས་པར་བྱེད་དགོས། དོན་དངོས་དང་ཟུང་འབྲེལ་བྱས་ནས་གླེང་མོལ་སྤེལ་རེས་དང་སྙིང་གཏམ་ཤོད་རེས་ཀྱི་སྟེགས་བུ་བཙུགས་ཏེ་སྤྱི་ཚོགས་ཀྱི་གནས་ཚུལ་དང་དམངས་ཀྱི་འདུན་པ་ཞུ་བའི་ཐབས་ལམ་རྒྱ་ཆེར་བཏང་ནས། དམངས་ཀྱི་བསམ་འཆར་བསྡུ་ལེན་དང་དམངས་ཀྱི་བློ་གྲོས་གཅིག་སྡུད་བྱ་རྒྱུ་དེ་བས་ལམ་སྲོལ་ཅན་དང་རྒྱུན་རྣམ་ཅན་དུ་འགྱུར་བར་བྱེད་དགོས། རྣམ་པ་དང་མཐུན་རྐྱེན་བཟང་པོ་ཧུར་ཐག་བཏོད་དེ་གྲོས་མོལ་དམངས་གཙོའི་རིག་གནས་སྐྱེད་སྲིང་ཧུར་ཐག་བྱས་ནས་གང་བསམ་ལྷུག་གླེང་དང་རང་གི་ལྟ་ཚུལ་བརྗོད་པའི་ཐད་དཔྱོད་ཤེས་ལྡན་ལ་ཚད་ཡོད་པ་དང་ཁྲིམས་མཐུན་སྒྲིག་མཐུན་གྱི་གྲོས་མོལ་གྱི་རྣམ་པ་བཟང་པོ་ཞིག་ཆགས་པར་བྱེད་དགོས།

    གྲོས་མོལ་དམངས་གཙོ་ནི་ཏང་གི་འགོ་ཁྲིད་མངོན་འགྱུར་བྱེད་པའི་བྱེད་ཐབས་གལ་ཆེན་ཞིག་ཡིན། དོན་དག་ཡོད་ན་གྲོས་མོལ་བྱེད་པ་དང་དམངས་ཀྱི་དོན་དག་དམངས་ཀྱིས་གྲོས་བསྡུར་བྱས་ཏེ་སྤྱི་ཚོགས་ཡོངས་ཀྱི་བསམ་འདུན་དང་བླང་བྱ་བཙལ་འཚོལ་ཡག་པོ་བྱ་རྒྱུ་ནི་མི་དམངས་དམངས་གཙོའི་སྙིང་དོན་ཡིན། དུས་རབས་གསར་པ་དང་རྒྱང་ལམ་གསར་པར་ཏང་གི་འགོ་ཁྲིད་དང་། འཐབ་ཕྱོགས་གཅིག་གྱུར། གྲོས་མོལ་དམངས་གཙོ་བཅས་ཟུང་འབྲེལ་དམ་ཟབ་མཐའ་འཁྱོངས་བྱེད་པ་དང་། གྲོས་མོལ་དམངས་གཙོ་ཕྱོགས་ཡོངས་ནས་འཕེལ་རྒྱས་གཏོང་བ། དོན་དག་ཡོད་ཚེ་གྲོས་མོལ་མང་ཙམ་བྱེད་པ་དང་། དོན་དག་འཕྲད་སྐབས་གྲོས་མོལ་མང་ཙམ་བྱེད་པ། དོན་དག་སྒྲུབ་སྐབས་གྲོས་མོལ་མང་ཙམ་བྱེད་པ་བཅས་མཐའ་འཁྱོངས་བྱེད་པ། ཆེད་དོན་གྲོས་མོལ་སྒྲིག་གཞི་ཞིག་ཡིན་པའི་མི་དམངས་སྲིད་གྲོས་ཀྱི་ནུས་པ་འདོན་པ། གྲོས་མོལ་བྱེད་རིང་མཐུན་སྒྲིལ་ལ་ཤུགས་སྣོན་རྒྱག་པ་དང་། བློ་གྲོས་གཅིག་སྒྲིལ། སྟོབས་ཤུགས་གཅིག་སྒྲིལ་བཅས་བྱས་ཚེ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཕྱོགས་ཡོངས་ནས་སྐུལ་འདེད་གཏོང་བར་ལེགས་སྐྱེས་གསར་པ་དེ་བས་ཆེ་བ་འབུལ་ཐུབ་ངེས་རེད།